Ин навбат муаррифии Лоиҳаи “Харитаи экологӣ”-и шаҳри Хуҷанд ва ҳам вохӯрии гурӯҳи корӣ бо устодону хонандагони Муассисаи таҳсилоти миёнаи умумии рақами 6-уми шаҳри Хуҷанд доир гардид. Дар он наздик 150 нафар омӯзгорон ва толибилмони мактаб иштирок намуданд.
Директори мактаб Ҳасанҷон Юсуфов ҷамъомадро оғоз карда, гурӯҳи кории лоиҳаро ба муассиса хайра мақдам гуфт.
Муҳаррири лоиҳа Исломҷон Бобоев дар бораи ҳадаф ва вазифаҳои асосии Лоиҳаи мултимедиявии “Харитаи экологӣ”-и шаҳри Хуҷанд ба таври муфассал сухан гуфта, лоиҳаро муаррифӣ кард.
Қайд гардид, ки бо иқдоми ШТРР “Тирози Ҷавонӣ” ва Медиапортали “Тироз” Лоиҳаи мултимедиявӣ (бисёррасонавӣ)-и “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ (пляж) ва ҳоҷатхонаҳои ҷамъиятии шаҳри Хуҷанд” роҳандозӣ ва бо дастгирии Мақомоти иҷроияи ҳокимияти давлатии шаҳри Хуҷанд давоми наздик як моҳ дар амал татбиқ шуда истодааст.
Ҳадафи лоиҳа – ҳамкории ВАО бо аҳолӣ ва сохтору идораҳои дахлдори Мақомоти иҷроияи ҳокимияти давлатии шаҳри Хуҷанд мебошад, ки он барои иттилоотонии саривақтии шаҳрвандон ва тарбияи экологии насли наврас ва ҷавонон равона гардидааст.
Гуфта шуд, ки огоҳии иттилоотӣ ва баланд бардоштани маърифати экологии шаҳрвандон, бахусус ҷавонон ва насли наврас аз ҳадафҳои асосии лоиҳа маҳсуб мешавад.
Аз ин лиҳоз, вохӯрии гӯрӯҳи корӣ ва муаррифии лоиҳа маҳз дар мактабҳои миёна низ баргузор мегардад.
Вазифаҳои асосии лоиҳа ин муайян кардани вазъияти кунунии (маҳаллаву микроноҳияҳо, шумора, ҷадвали корӣ) бак ва нуқтаҳои партов, ҳоҷатхонаҳои ҷамъиятӣ, нуқтаҳои қабули фурӯзонакҳои каммасрафи корношоям мебошад.
Лоиҳа бо дастгирии Намояндагии Интернюс дар Тоҷикистон ва Мақомоти иҷроияи ҳокимияти давлатии шаҳри Хуҷанд амалӣ шуда истодааст. Лоиҳа инноватсионӣ буда, формати он мултимедиявӣ (бисёррасонавӣ) мебошад.
Зимни муаррифӣ гуфта шуд, ки мӯҳлати давомнокии марҳилаи аввали лоиҳа 3 моҳ буда, дар он 10 маҳаллаи шаҳри Хуҷанд: Пахтакор, Раззоқ, Панҷшанбе, Гулбаҳор, Бофандаи соҳили чапи дарё ва микроноҳияҳои 8-ум, 13-ум, 20-ум, 32-юм ва 34-уми соҳили рости дарё мавриди истифода ва санҷиш қарор мегиранд.
Қайд гардид, ки шаҳрвандони фаъол, бахусус ҷавонону насли наврас – мактабхонони синну соли гуногун дар амалишавии лоиҳаи “Харитаи экологӣ”-и шаҳри Хуҷанд саҳми арзандаи хешро гузошта метавонанд. Барои ин онҳо метавонанд аксҳои бо таҷҳизоти мобилии худ гирифтаашонро вобаста ба мавҷудияти партов дар кӯчаҳо ва маҳаллаҳои ҷои зист, тавассути Вотсапп (Whatsapp) ба рақами 92-882-66-66 ирсол намоянд. Иштирокчиёни фаъолро тӯҳфаҳои арзанда интизор аст!
Дар қисми дуюми вохӯрӣ байни гурӯҳи корӣ ва устодону толибилмон дар мавзӯи тарзу усули гирифтан ва фиристодани аксҳо саволу ҷавоб сурат гирифт.
Ҳамин тариқ, муаррифии Лоиҳаи мултимедиявии “Харитаи интерактивии бакҳо ва қуттиҳои партов, нуқтаҳои қабули фурӯзонакҳои каммасрафи корношоям, макони оббозӣ (пляж) ва ҳоҷатхонаҳои ҷамъиятии шаҳри Хуҷанд” хеле ҷолиб ва барои иштирокдорон – устодону хонандагони Муассисаи таҳсилоти миёнаи умумии рақами 6-уми шаҳри Хуҷанд низ муфид ва хотирмон ба интиҳо расид.
Гурӯҳи кории Лоиҳаи “Харитаи экологӣ”
Нет комментариев