Имрӯз, 23 июл маросими ифтитоҳи Бозиҳои тобистонаи олимпии Токио дар Варзишгоҳи миллии шаҳри Токиои Япония баргузор мешавад. Маросими мазкур соати 16:00 ба вақти Душанбе оғоз мешавад. Маросими кушодашавии Бозиҳоро шабакаи ТВ «Варзиш» мустақиман манзури тамошобинон мекунад. Такрори ин маросим ҳамон рӯз соати 21:00 дар назар аст. Чорабинӣ бидуни тамошобинон баргузор мешавад. Дар ин бора намояндаи расмии Кумитаи миллии олимпии Тоҷикистон Умаралӣ Сафаралӣ хабар дод.
Аввалин шуда, ба майдон дастаи мунтахаби Юнон ва охирин — дастаи мунтахаби Япония ворид мешаванд. Баъди савганд ёд кардани варзишгарон, мураббиён ва дигар шахсон Бозиҳо расман кушода мешаванд. Бояд зикр кард, ки ҳайати дастаи мунтахаби олимпии Тоҷикистон шоми дирӯз ба Токио расид. Аъзои ҳайатро масъулони Кумитаи миллии олимпии Тоҷикистон пешвоз гирифта, дар деҳаи олимпӣ ҷобаҷо карданд.
Дар бозиҳои олимпии Токио- 2020 Тоҷикистонро 10 нафар варзишгарон- дзюдочиён: Сомон Маҳмадбеков (вазни то -73 кг), Акмал Муродов (то -81 кг), Комроншоҳи Устопириён (то -90 кг), Темур Раҳимов (то + 100 кг), муштзанҳо: Баҳодур Усмонов (то -63 кг), Шаббос Негматуллоев (то -81 кг), Сиёвуш Зуҳуров (зиёда аз -91 кг); риштаи варзиши сабук: Илдар Аҳмадиев (давидан ба масофаи 100 м), шиноварон: Олимҷон Эшонов (тарзи озод, 50 м) ва Анастасия Тюрина (тарзи озод, 50 м) намояндагӣ мекунанд. Гулсумбӣ Шарифова бо сабаби ҷароҳат бардоштан дар олимпиада иштирок карда наметавонад.
Хотиррасон мешавем, ки олимпиадаи Токио-2020 аз 23 июл оғоз шуда, то 8 август идома меёбад. Дар назар аст, ки дар олимпиадаи мазкур 12 500 варзишгар ширкат варзида, барои 339 ҷоиза миёни ҳам қувва озмоянд. Парчамбардори дастаи мунтахаби Тоҷикистон дар Бозиҳои олимпии Токио паҳлавони маъруфи тоҷик Темур Раҳимов мебошад. Бо назардошти варзишгарон шумораи ҳайати дастаи мунтахаби олимпии Тоҷикистон аз 23 нафар иборат аст.
Ёдовар мешавем, ки Бозиҳои тобистонаи олимпӣ ҳар чаҳор сол доир мегарданд. Бозиҳои олимпии Токио-2020 бояд соли гузашта барпо мегардиданд, вале бо сабаби авҷи бемории коронавирус дар ҷаҳон ба соли 2021 гузошта шуданд.
Манбаъ: АМИТ «Ховар»
Нет комментариев