Раиси шаҳри Хуҷанд Маъруф Муҳаммадзода се нафар муҳассилини муассисаҳои таълимии шаҳр, ки аз рӯйи натиҷаҳои ҷамъбасти соли таҳсили 2018-2019-и Вазорати маориф ва илми Ҷумҳурии Тоҷикистон медалҳои тилло ва нуқраро ба даст оварданд, ба ҳузур пазируфт.
Раиси шаҳри Хуҷанд Маъруф Муҳаммадзода зимни суҳбат бо барандагони медалҳои тиллою нуқра ва сарварони муассисаҳои таълимӣ, ки хонандагонашон ба чунин шарафмандӣ комёб шудаанд, табрику таҳният намуда, аз ҷумла афзуд, ки соҳаи маориф нақши калидӣ дар ҳамаи соҳоти хоҷагии халқ дорад. Маҳз аз ин нукта маориф дар меҳвари асосии сиёсати давлатдории Асосгузори сулҳу Ваҳдати миллат, Пешвои миллат, Президенти мамлакат муҳтарам Эмомалӣ Раҳмон қарор гирифтааст. Ҳамасола таваҷҷӯҳи доимӣ зоҳир гардидан ба соҳаи маориф, таҳким бахшидан ба пойгоҳи илмию техникии соҳа, қадршиносии нерӯйи зеҳнӣ имконият фароҳам овардааст, ки дар муассисаҳои таълимӣ насли ҷавони баркамол мусаллаҳ бо донишҳои муосир таълиму тарбия гиранд.
Шаҳрдор гуфт, ки соли ҷорӣ аз рӯйи натиҷаҳои олимпиадаи вилоятӣ хонандагони шаҳри Хуҷанд бо гирифтани 102 медал мақоми ифтихории якумро ба даст оварданд. Дар олимпиадаи сатҳи ҷумҳурӣ миёни шаҳру навоҳии мамлакат бо бадастории 47 медал макоми сеюмро соҳиб гардиданд, ки боиси ифтихору саодатмандист. Соли ҷорӣ беш аз 2000 нафар хонандагони шаҳри Хуҷанд тариқи ММТ назди Президенти Ҷумҳурии Тоҷикистон ҳуҷҷатҳои хешро ба донишгоҳҳои олии мамлакат супориданд ва умедворем, ки сазовори унвони баланди донишҷӯйӣ мегарданд.
Раиси шаҳр ба роҳбарияти шуъбаи маориф ва сарварони муассисаҳои таълимии шаҳр, аз ҷумла гимназияҳои №1, 4 ва МТМУ №16 барои тарбияи чунин хонандагони пешсаф ва намунавӣ миннатдории Мақомоти иҷроияи ҳокимияти давлатии шаҳри Хуҷандро расонд.
Барандагони медали тилло Некрӯз Шораҷабов, муҳассили гимназияи №1, медалҳои нуқра Нилуфар Ғоибназарова, хонандаи гимназияи №4 ва толибаи МТМУ №16 Зебо Солибоева аз истиқболи самимонаи Раиси шаҳри Хуҷанд миннатдорӣ баён намуда, таъкид доштанд, ки ин дастоварди тамоми муҳассилини шаҳр аст. Эшон кӯшиш ба харҷ медиҳанд, ки дар заминаи сиёсати ҷавонпарварони Асосгузори сулҳу Ваҳдати миллат, Пешвои миллат, Президенти мамлакат муҳтарам Эмомалӣ Раҳмон ба макотиби олии дохиливу хориҷӣ таҳсил намуда, мутахассисони варзида гардида, ба Ватану миллати хеш содиқона хизмат менамоянд.
Манбаъ: Дафтари матбуоти Раиси шаҳри Хуҷанд
Нет комментариев