Дар Қасри ҷавонони ба номи Лоиқ Шералӣ бо ҳузури Раиси шаҳри Хуҷанд Маъруф Муҳаммадзода ва беш аз 700 нафар ҷавонони фаъоли шаҳр Шӯрои васеи кор бо ҷавонони назди Раиси шаҳри Хуҷанд ва маросими супоридани идрорпулии Раиси шаҳри Хуҷанд баргузор гардид.
Бо танинандозии Суруди миллии Ҷумҳурии Тоҷикистон ҷаласаи Шӯрои васеи кор бо ҷавонони назди Раиси шаҳри Хуҷанд оғоз гардид.
Раиси шаҳри Хуҷанд Раиси Шӯро Маъруф Муҳаммадзода ҷаласаро оғоз намуда, иттилоъ дод, ки дар баррасии рӯзномаи ду масъала: Гузориш оид ба амалӣ намудани нақшаи чорабиниҳои мақомоти иҷроияи ҳокимияти давлатии шаҳри Хуҷанд оид ба иҷрои дастуру супоришҳои Президенти Ҷумҳурии Тоҷикистон, Пешвои миллат, Раиси Шӯрои миллии кор бо ҷавонон дар назди Президенти Ҷумҳурии Тоҷикистон муҳтарам Эмомалӣ Раҳмон зимни баргузории ҷаласаи якуми Шӯрои миллии кор бо ҷавонон ва тасдиқи нақшаи кори Шӯрои васеи кор бо ҷавонони назди Раиси шаҳри Хуҷанд дар соли 2019 қарор дорад.
Аз рӯйи масъалаи якум, Абдувосит Ғафуров, мутахасиси пешбари бахши кор бо ҷавонон ва варзиши шаҳри Хуҷанд баромад намуда, аз ҷумла афзуд, ки боиси ифтихор ва сарфарозист, ки дар даврони соҳибиқстиқлолӣ мо ҷавонон ба сифати як неруи ниҳоят пуриқтидори бунёдкор ва пешбарандаи ҳаёти ҷомеаи навин эътироф гардидаем. Мо ҷавонон бояд аз файзи Истиқлолият бештар баҳра гирифта, ба қадри соҳибистиқлолӣ расем ва онро чун неъмати бебаҳо ҳифзу ҳимоят намоем. Зеро Истиқлолият бародарию баробарии ҳамаи аъзои ҷомеа, хонаи обод, руйи сурх, сари баланд ва рузгори осудаи ҳар фарди соҳибдавлату соҳибватан мебошад. Мусаллам аст, ки Тоҷикистон давлати ҷавону ҷавонон аст, синни миёнаи аҳолӣ 24 сол ва 70 фоизи сокинони онро шахсони синни то 30 сола ташкил медиҳад. Аз ин рў, ба татбиқи сиёсати давлатӣ доир ба ҷавонон ҳамчун нерўи фаъоли ҷомеа афзалияти бештар муқаррар шуда, дар самти баланд бардоштани нақши ҷавонон дар ҳаёти ҷомеа, муҳайё сохтани шароити мусоид барои таълиму тарбия, илму касбомӯзӣ, аз худ кардани забонҳои хориҷӣ ва технологияҳои муосири иттилоотию коммуникатсионӣ тамоми шароитҳои зарурӣ муҳайё ва барои амалӣ гардидани ташаббусҳои ҷавонон заминаи мусоид фароҳам оварда шудааст.
Сипас, зимни музокира Усмонҷон Юсуфӣ, мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Хуҷанд баромад намуда, аз ҷумла қайд кард, ки тарбия ва ба камол расонидани насли ватандўсту меҳанпараст ва худшиносу худогоҳ вазифаи муқаддаси ҳар як мақомоти давлативу ҷамъиятӣ, муассисаҳои таълимӣ, ҷомеаи шаҳрвандӣ, оила ва падару модар ба ҳисоб меравад. Зеро тарбия маҳз аз оила, мактаб ва ҷомеа сарчашма гирифта, ҷавонон ва наврасон мафҳумҳои Ватан, Модар, дўст доштани Ватан ва ҳифзи марзу буми кишварро аз ҳамин ҷо меомўзанд, дарк менамоянд ва дар ҳаёт татбиқ менамоянд.
Таъкид гардид, ки тавре ҳамагон огаҳӣ дорем, бо назардошти саҳми ҷавонон дар рушди ҷомеа ва иштироки фаъолона дар ҳаёти сиёсию иқтисодии мамлакат аз ҷониби Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2017 «Соли ҷавонон» эълон гардида буд. Ин иқдоми неки Пешвои миллат барои татбиқи боз ҳам васеи сиёсати давлатӣ оид ба ҷавонон мусодиат намуд ва фазои кору фаъолияти моро дар муҳимтарин соҳаҳои ҳаёти ҷамъиятӣ; аз ҷумла сиёсат, иқтисод ва фарҳанг тақвият бахшид. Ба ин восита тарбияи ватандустӣ миёни ҷавонон муҳимтарин фишанги ҳаракатдиҳандаи пешрафти ҷомеа дониста шуд.
Дар ҷараёни музокира ҳамзамон ҷавонони фаъол Некрӯз Шораҷабов ва Парвина Азимова низ баромад карда, андешаҳои хешро доир ба беҳтар шудани имконоту шароит барои ҷавонон аз ҷониби Давлату Ҳукумат иброз доштанд.
Маъруф Муҳаммадзода бо натиҷагирӣ аз ҷабҳаҳои фаъолияти Шӯрои кор бо ҷавонони назди Раиси шаҳри Хуҷанд изҳори андешаронӣ намуда, аз ҷумла таъкид дошт, ки Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии хеш зикр намуданд, ки «Ҷавонон мояи ифтихор ва сарбаландии Тоҷикистони азиз мебошанд. Мо ба ҷавонон эътимоди комил дорем, дастгирии самимонаи онҳоро аз сиёсати пешгирифтаи давлату Ҳукумат қадрдонӣ мекунем ва нақши арзишмандашонро дар ҳамаи ҷанбаҳои ҳаёти кишвар эҳсос менамоем». Аз ин рў ватандустии мо ҷавонон дар шароити кунунӣ бояд аҳамияти хоса касб намуда, ҳар як ҷавони бонангу номуси кишварро зарур аст, ки ба омухтани илму дониш, касбу ҳунар машщул шуда, таърихи халқи худро азбар намоем, Ватанамонро аз ҷон дуст дорем, арзишу суннатҳои милливу фарҳангиро эҳтиром кунем ва худогоҳу худшинос бошем, ба боварӣ ва эътимоди Сарвари давлатамон сазовор бошем!
Раиси шаҳр гуфт, ки рӯ овардан ба сиёсати ҷавонон тақозои таърих ва назари хирадмандонаи Пешвои миллат муҳтарам Эмомалӣ Раҳмон мебошад. Ҷавонон бояд ҳисси баланди миллию фарҳангӣ дошта, пояҳои давлатдории миллиро ҳамчун гавҳари ноёб эҳтирому нигоҳ дошта, роҳнамоиҳои созандаи Сарвари давлатро сармашқи зиндагиномаи худ қарор диҳанд. Пайваста бо меҳри Ватан, миллат, давлати соҳибистиқлол ва забону фарҳанги миллии хеш ифтихор намуда, барои ҳимояи дастовардҳои Истиқлолияти давлатӣ, якпорчагии марзу буми он ҳамеша омода бошанд. Ҳар як кишвари олам барои рушду нумӯ ва таҳкими давлатдорӣ, нуфуз ва эътибори баланд, пеш аз ҳама ба ақлу хирад, бунёдкориву созандагии ҷавонон такя намуда, ояндаи дурахшони хешро бо онҳо мепайвандад. Зеро мавқеи иҷтимоӣ ва сиёсии онҳо дар баробари неруи демократии ҷомеа ва давлат хусусиятҳои таҳаввулот, стратегияи рушд ва ояндаи давлатро муайян месозад. Ҷомеа ё кишваре, ки дар навбати аввал ба таълиму тарбия, рушди маърифатнокӣ ва фаъолияти ҷавонон таваҷҷуҳ зоҳир намекунад, ба сатҳи баланди инкишоф расиданаш ба гумон аст.
Маъруф Муҳаммадзода таъкид дошт, ки дар раванди пешбурди сиёсати давлатии ҷавонон, ҳамчунин, зарур аст, ки усулҳои боз ҳам муассири ҳамкориро тақвият бахшида, ҳамоҳангсозии фаъолияти мақомоти марказӣ ва маҳаллии ҳокимияти давлатиро бо ташкилоту созмонҳои ҷавонон мустаҳкам карда, ҷавонон ба корҳои муҳимми давлативу ҷамъиятӣ ҳарчи бештар ҷалб карда шаванд, зеро чунин тарзи кор имконият медиҳад, ки пешниҳодоти ҷавонон ҳарчи бештар дастгирӣ ёбанд, мушкилоти мавҷудаи онҳо сари вақт баррасӣ гардида, роҳу усулҳои фаъолияти минбаъдаи ҷавонон боз ҳам дақиқу мушаххас гарданд.
Дар анҷоми суханронии худ Маъруф Муҳамадзода кулли ҷавонони шаҳри Хуҷандро бо Рӯзи ҷавонони Тоҷикистон таҳният гуфта, аз ҷумла зикр дошт, ки орзуи онро дорам, ки ҳамеша толеи нек, бахти баланд ва хушиву хубиҳои ҷавонӣ ороишгари саҳифаҳои рўзгоратон бошад. Итминони комил дорам, ки шумо, ҷавонони азиз, чун насли ояндасоз вазифаю масъулияти худро дар назди ҷомеа, давлат ва Пешвои муаззами худ хуб дарк намуда, бо омӯхтани илму донишҳои муосир ва касбу ҳунарҳои замонавӣ дар ояндаи наздик чун мутахассисони соҳибмаълумоту соҳибистеъдод, номбардорони давлату миллат ва ҳомиёни воқеии сулҳу оромӣ ва ваҳдати миллӣ кору зиндагӣ хоҳед кард.
Сипас, Раиси шаҳри Хуҷанд Маъруф Муҳаммадзода дар вазъияти тантанавӣ ба 100 нафар хонандагону донишҷӯёни муассисаҳои миёнаву касбӣ ва олии шаҳр ва варзишгарони беҳтарин идрорпулии Раиси шаҳри Хуҷандро ба андозаи 1000 сомонӣ тақдим намуд.
Барномаи рангини консертӣ табъи ҳозиринро болида намуд.
Манбаъ: Дафтари матбуоти Раиси шаҳри Хуҷанд
Нет комментариев