Дар Кохи фарҳанги ба номи Абӯабдуллоҳ Рӯдакии маркази вилоят таҳти раёсати Раиси вилояти Суғд Абдураҳмон Қодирӣ бахшида ба Иди касбии кормандони соҳаи тандурустӣ машварати корӣ баргузор гардид.
Дар кори машварат роҳбарони сохторҳои дахлдори Мақомоти иҷроияи ҳокимияти давлатии вилоят, муовинони раисони шаҳру ноҳияҳо, масъулини соҳаи тандурустӣ, роҳбарони муассисаҳои соҳаи тандурустии шаҳру ноҳияҳои вилоят ва фаъолону собиқадорони соҳа ширкат варзиданд.
Машваратро Раиси вилоят Абдураҳмон Қодирӣ бо сухани муқаддимавӣ ҳусни ифтитоҳ бахшида, аз ҷумла зикр дошт, ки соҳаи тандурустӣ яке аз соҳаҳои муҳими давлатӣ маҳсуб ёфта, аз тарафи Ҳукумати мамлакат, бахусус Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ҷиҳати таҳкиму рушд, баланд бардоштани сатҳу сифати хизматрасонӣ ва беҳдошти соҳа тадбирҳои судманд роҳандозӣ мегарданд.
Дар машварат оид ба вазъи иҷрои дастуру супоришҳои роҳбарияти мамлакат дар самти беҳдошти соҳаи тандурустӣ дар вилоят, сатҳи хизматрасонии тиббӣ ва масъалаҳои мубрами соҳа муовини Раиси вилоят Назира Ғаффорӣ маърӯза намуд.
Муовини Раиси вилоят дар маърӯзаи хеш таъкид намуд, ки Мақомоти иҷроияи ҳокимияти давлатии вилоят дар партави дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди бомаром ва ислоҳоти соҳаи тандурустӣ пайваста тадбирҳои муассир меандешад. Сол аз сол афзоиш ёфтани маблағгузорӣ барои соҳаи тандурустӣ, аз ҷумла соли 2017 барои соҳаи тандурустӣ дар буҷети вилоят пешбинӣ гардидани 370 млн. сомонӣ, ки нисбат ба соли 2005-ум 20 баробар зиёд аст, амалишавии беш аз 20 барномаю стратегияҳо вобаста ба солимии аҳолӣ дар ҳудуди вилоят, бо иқдоми Раиси вилоят “Соли фарди солим” эълон шудани соли 2016 ва идома бахшидани он дар соли 2017, андешидани тадбирҳои зарурӣ ҷиҳати таъминоти беморхона, марказу бунгоҳҳои саломатӣ ва дигар муассисаҳои тиббӣ бо таҷҳизоту лавозимоти ҳозиразамони тиббӣ, бунёди бунгоҳу марказҳои саломатӣ ва таъмиру тармими муассисаҳои тандурустӣ — аз ҷумлаи тадбирҳое маҳсуб меёбанд, ки барои баланд бардоштани сатҳу сифати хизматрасонии тиббӣ, беҳдошти саломатии аҳолӣ, вусъати раванди ислоҳоти соҳаи тандурустӣ нигаронида шудаанд.
Шоистаи таъкид аст, ки дар доираи амалисозии Барномаи вилоятии “Соли 2016 – соли фарди солим” бо маблағгузории Мақомоти иҷроияи ҳокимияти давлатии вилоят, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, мақомоти иҷроияи маҳаллии ҳокимияти давлатӣ ва дастгирии соҳибкорону шахсони саховатманд ба тариқи ҳашар дар 45 иншооти тандурустӣ ба маблағи 11,6 млн. сомонӣ корҳои сохтмонӣ ба анҷом расонида шуд ва дар 182 муассисаҳои тиббӣ ба маблағи 24,4 млн. сомонӣ корҳои таъмиру тармим иҷро шуданд, ё худ нақшаи сохтмон тибқи Барнома ба андозаи 215 фоиз ва нақшаи таъмиру тармим ба андозаи 116 фоиз иҷро гардид.
Боиси зикр аст, ки соли равон низ дар идомаи корҳо аз ҳисоби ҳамаи сарчашмаҳо дар вилоят сохтмони 37 иншооти соҳаи тибб ба маблағи умумии 26, 2 млн. сомонӣ ва таъмири 97 иншооти тандурустӣ ба маблағи 11, 2 млн. сомонӣ ба нақша гирифта шуда, корҳо вусъати тоза гирифтаанд.
Рушди соҳаи тандурустӣ ва беҳдошти хизматрасонии тиббӣ ба аҳолӣ, пеш аз ҳама, ба таъминоти муассисаҳои соҳа бо таҷҳизоту лавозимоти зарурӣ ва замонавии тиббӣ вобастагӣ дорад. Бо ин мақсад дар соли амалисозии Барномаи вилоятии “Соли 2016 — соли фарди солим” ба маблағи беш аз 12 млн. сомонӣ 2834 номгӯй таҷҳизот харидорӣ ва дастрас карда шуд, аз ҷумла муассисаҳои тиббӣ бо 79 номгӯй таҷҳизоти муолиҷавӣ, 156 номгӯй таҷҳизоти муоинавӣ, 2512 номгӯй таҷҳизоти ёрирасони тиббӣ таъмин гардиданд.
Бо қарори Раиси вилоят барои харидории маводи гаронарзиш барои ҷарроҳии беморони нуқсони модарзодӣ ва гирифторшудаи дил 687030 сомонӣ маблағ ҷудо ва то ба имрӯз ба 5 нафар бемор ройгон ҷарроҳии мураккаби дил гузаронида шудааст. Имсол низ барои харидорӣ намудани таҷҳизоти тиббӣ аз ҳисоби маблағҳои буҷети вилоят иловатан 1 млн. сомонӣ ҷудо мегардад, ки бешак ин гуна дастгириҳо ба пешрафту баланд бардоштани сатҳи хизматрасонии тиббӣ мусоидат мекунад.
Қобили қайд аст, ки алҳол дар муассисаҳои тиббии вилоят 4846 табибон, 15997 кормандони миёнаи тиб содиқонаву сарбаландона ба аҳолӣ хизмати тиббӣ мерасонанд.
Дар машварат кормандони варзидаи соҳаи тиб, аз ҷумла ҷарроҳи Беморхонаи клиникавии вилоятии ба номи С. Қутфиддинов, профессор Мубинҷон Қаҳҳоров, сардухтури беморхонаи марказии шаҳри Гулистон Гулсанам Пӯлодиён, сардухтури Маркази ҷарроҳии дилу шарёни вилоят Ҳотамҷон Маҳмудов, сардухтури беморхонаи марказии шаҳри Исфара Тайибиддин Муҳаммедов ва дигарон баромад намуда, барои дастгириҳои пайваста, бо таҷҳизоти муосири тиббӣ таъмин намудани муассисаҳои табобатӣ, таъмиру тармими беморхонаҳо, марказу бунгоҳҳои тиббӣ ба Раиси вилоят арзи сипос намуданд.
Ҳамзамон, дар вазъияти тантанавӣ Раиси вилоят ба 20 нафар мутахассисони варзидаи соҳа Сипосномаи Мақомоти иҷроияи ҳокимияти давлатии вилоят, ба як нафар нишони «Аълочии тандурустии Ҷумҳурии Тоҷикистон» ва ба 13 нафар ғолибони озмуни «Беҳтарин табиб ва корманди миёнаи тибби ҷавон» Диплом ва тӯҳфаҳои хотиравиро тақдим намуд.
Дар фарҷом Абдураҳмон Қодирӣ изҳори боварӣ намуд, ки кормандони соҳа дар соле, ки халқу миллати тоҷик ҷашни бузурги миллӣ 25 – солагии Иҷлосияи 16-уми Шӯрои Олии Ҷумҳурии Тоҷикистонро таҷлил мекунанд, бо фаъолияти содиқонаву софдилонаи хеш дастовардҳои худро афзун намуда, баҳри ҳифзи саломатии инсон ва рушди соҳаи тандурустӣ саҳми босазо мегузоранд.
Манбаъ: Сомонаи Суғд ТҶ
Нет комментариев