Рӯзи 22 марти соли 2018 бахшида ба Иди Наврӯзи байналмилалӣ дар ипподроми Ҷамъияти саҳҳомии ба номи Абдураҳим Ҷумъаеви ноҳияи Бобоҷон Ғафуров мусобиқаҳои миллии «Бузкашӣ» ва «Пойга» баргузор шуд.
Пеш аз оғози мусобиқаҳои варзишӣ Раиси вилоят Раҷаббой Аҳмадзода суханронӣ намуда, кулли тамошобинон ва ҳаводорони бозиҳои миллиро ба муносибати фарорасии Наврӯзи хуҷастапай табрик гуфт. Иттилоъ дода шуд, ки имрӯзҳо дар вилоят 8400 сар асп парвариш карда мешавад ва гузаронидани мусобиқаҳои варзишии «Пойга» ва «Бузкашӣ» дар арафаи Наврӯз ба ҳукми анъана даромадааст. Бист сол инҷониб баргузор шудани чунин мусобиқаҳо худ гувоҳи он аст ки «Пойга» ва «Бузкашӣ» аз маъруфияти хосе бархурдор аст.
Мусобиқаи варзишии «Пойга» дар ҳашт давр ҷараён гирифт ва дар натиҷа ҷойи аввалро аспи Шукрулло Усмонов бо номи «Ректор» соҳиб шуд. Ҷойҳои дуюму сеюмро аспҳои Муъминҷон Ҳоҷибоев ва Олимбек Юлдошзода бо номҳои «Достон» ва «Вазир» соҳиб гардиданд.
Ба ғолибони мусобиқаи «Пойга» аз ҷониби Раиси вилоят мукофотпулиҳо дар ҳаҷми аз ҳазор то се ҳазор сомонӣ супорида шуд.
Дар ин рӯз ҳамчунин мусобиқаи «Бузкашӣ» баргузор гардид, ки дар он паҳлавонон аз тамоми навоҳии вилоят иштирок доштанд.
Манбаъ: Хадамоти матбуоти Раиси вилояти Суғд
Нет комментариев