Назорат дар марзи Тоҷикистон пурзӯр мешавад

0
1 760 просмотров

Хадамоти гумруки Тоҷикистон бо кумаки Бритониё дидбонгоҳҳои гумрукиро дар майдонҳои ҳавоӣ ва наздисарҳадии Тоҷикистон бо техникаву технологияи муосири назорати молу бағоҷ ва мусофирон, муҷаҳҳаз мегардонад

Дар шаҳри Душанбе байни Хадамоти гумруки назди Ҳукумати  Ҷумҳурии Тоҷикистон ва қӯшунҳои сарҳадии Департаменти корҳои дохилии Бритониёи Кабир «Номаи ҳамкорӣ» ба имзо расидааст.

Санади мазкурро сардори Хадамоти гумруки Тоҷикистон Хуршед Каримзода ва аз ҷониби Бритониёи Кабир сафири ин кишвар дар Тоҷикистон Меттю Лоусон имзо кардаанд.

Тибқи хабари сарчашма, ҳамкорӣ дар ҳошияи «Номаи ҳамкорӣ»  имкон медиҳад, ки Хадамоти гумруки Тоҷикистон бо кумаки Иттиҳоди Муттаҳида дидбонгоҳҳои гумрукиро дар майдонҳои ҳавоӣ ва дидбонгоҳҳои гумрукии наздисарҳадии Тоҷикистон бо техникаву технологияи муосири назорати гумрукии молу бағоҷ ва мусофирон муҷаҳҳаз гардонад.

Инчунин дар асоси санади мазкур мутахассисони гумруки Британиёи Кабир барои баланд бардоштани иқтидори касбии кормандони мақомоти гумруки Тоҷикистон курсҳои омӯзишиву амалӣ ташкил намуда, таҷрибаи гумруки Британияро дар самти муборизаи муташаккилона бар зидди қочоқ ва дастрас намудани маълумоти пешакӣ оид ба мусофирон бо гумруки Тоҷикистон мубодила хоҳанд кард.

Мақомоти гумруки Тоҷикистон хабар медиҳад, ки дар доираи ба имзо расонидани санади ҳамкорӣ Хуршед Каримзода  бо Меттю Лоусон ва котиби Давлатии қӯшунҳои сарҳадии Департаменти корҳои дохилии Шоҳигарии Муттаҳида мулоқот кардаанд. Зимни он масъалаҳои марбут ба тақвияти ҳамкорӣ дар соҳаи гумрук баррасӣ гардиданд.

Дипломати бритонӣ Меттю Лоусон зикр кардааст, ки Бритониё дар таҳкими ҳамкорӣ  бо Хадамоти гумруки Ҷумҳурии Тоҷикистон, хусусан дар самти таъмини бехатарии гузаргоҳҳои наздисарҳадӣ ҳавасманд аст.

Дар мулоқот ҳамзамон намояндаи қӯшунҳои сарҳадии Департаменти корҳои дохилии Шоҳигарии Муттаҳида Ник Фоулер доир ба фаъолияти  қӯшунҳои сарҳадии Департаменти корҳои дохилии Шоҳигарии Муттаҳида гуфт, ки аз лиҳози мавқеи ҷуғрофӣ Ҷумҳурии Тоҷикистон дар минтақаи ҳассос қарор дорад.

Аз ин рӯ, ташкили Стратегияи муштараки махсус ва ҳамоҳанг сохтани он бо ҳамроҳии шарикони худ барои муқовимат ба таҳдидҳо ва дигар ҷиноятҳои дорои хусусияти фаромиллӣ яке аз масъалаҳои калидии  Бритониёи Кабир мебошад.

Сардори Хадамоти гумруки Тоҷикистон Хуршед Каримзода зикр намудааст, ки дар минтақаи Осиёи Марказӣ Ҷумҳурии Тоҷикистон бо Ҷумҳурии Исломии Афғонистон аз ҳама сарҳади тӯлонитарин дорад, ки  1344 кмро ташкил медиҳад.

Бо дахли фаъолияти мақомоти гумруки Тоҷикистон Хуршед Каримзода афзудааст, ки  Тоҷикистон бо Қирғизистон 5 адад, Узбакистон 17 адад,  Чин 1 адад ва бо Афғонистон 7 адад гузаргоҳҳои сарҳадии расмӣ дорад.

Барои муҷаҳҳаз гардонидани онҳо бо техникаву технологияи муосир маблағҳои муайян ҷудо гардида, инчунин созмонҳои байналмилалӣ низ барои таъминоти онҳо кумак мерасонанд, аммо норасоиҳо дар ин самт ҷой доранд.

Зикр шудааст, ки танҳо пурра муҷаҳҳаз намудани гузаргоҳҳои сарҳадӣ бо техникаи муосир, баланд бардоштани такмили ихтисоси кормандон ва истифода аз таҷрибаи кишварҳои пешрафта дар ин самт имконият медиҳад, ки пеши роҳи қочоқи маводи мухаддир ва яроқу аслиҳа самаранок гирифта шавад.

Манбаъ: https://sputnik-tj.com

 

Нет комментариев

Также рекомендуем

Сообщить об опечатке

Текст, который будет отправлен нашим редакторам: