Аз 18 то 30-юми октябри соли 2018 дар майдони варзишии футболи Муассисаи давлатии «Мактаби варзишии №1» мусобиқаи шаҳри Хуҷанд оид ба футбол байни духтарони муассисаҳои таҳсилоти миёнаи умумӣ, литсей ва гимназияҳои шаҳр баргузор гардид.
Мусобиқаи мазкур бахшида ба соли 2018 — Соли рушди сайёҳӣ ва ҳунарҳои мардумӣ ва Рўзи Конститутсияи Ҷумҳурии Тоҷикистон бо мақсади тарғиб ва рушду инкишофи бозии футбол байни тамоми қишрҳои ҷомеа, ташвиқу тарғиби тарзи ҳаёти солим, пайдо намудани бозингарони беҳтарин ва муайян намудани дастаи якачини шаҳр сурат гирифта, дар он 12 даста бо иштироки зиёда аз 150 нафар иштирок намуданд.
Дар бозии ниҳоӣ ҷои якумро дастаи духтарони футболбози гимназияи №24, ҷои дуюмро дастаи МТМУ №11 ва ҷои сеюмро дастаи МТМУ №8 соҳиб гардиданд.
Ба ғолибон аз ҷониби Иттифоқи касабаи кормандони маориф ва илми вилояти Суғд Ҷом, медал ва ифтихорнома тақдим карда шуданд.
Ҷоиз ба зикр аст, ки мусобиқаи мазкур ҷиҳати татбиқи Қонуни Ҷумҳурии Тоҷикистон «Дар бораи тарбияи ҷисмонӣ ва варзиш», қарори Раиси шаҳри Хуҷанд аз 14-уми ноябри соли 2017, № 629 “Дар бораи тасдиқи Барномаи маҳаллии рушди футбол дар шаҳри Хуҷанд барои солҳои 2017-2021” тақвими ягонаи чорабиниҳои оммавию варзишӣ, омодагию солимгардонӣ ва иштироки варзишгарон дар мусобиқаҳои вилоятӣ, ҷумҳуриявӣ ва байналмилалӣ барои соли 2018 дар асоси нақшаи якчояи бахши кор бо ҷавонон ва варзиш, шуъбаи маориф, Федератсияи футболи шаҳри Хуҷанд ва Иттифоқи касабаи кормандони маориф ва илми вилояти Суғд баргузор шуд.
Манбаъ: Дафтари матбуоти Раиси шаҳри Хуҷанд
Нет комментариев