Муайян гардидааст, ки ҷумҳурии мо ба қатори 18 мамлакат бо вазъи вазнинтарини эпидемиологии шаклҳои ба доруҳои зиддисилӣ мутобиқгаштаи бемории сил ворид гардидааст. Ба вазъи бемории сил ҳолатҳои иқтисодии кишвар, ҷараёни муҳоҷирати меҳнатӣ, норасоии маблағгузорӣ ва иқтидори кадрӣ таъсири муайян мерасонад.
Ба ин хотир дар Ҷумҳурии Тоҷикистон Барномаи миллии ҳимояи аҳолӣ аз бемории сил барои солҳои 2010 — 2015 татбиқ гардид ва ин сеюмин барномаи миллии пешгирии бемории сил аст, ки дар ҷумҳурӣ амалӣ шуд.
Бемории сил, ки иҷтимоист, пешгирӣ ва муолиҷаи он дар Ҷумҳурии Тоҷикистон сол аз сол рӯ ба беҳбудӣ меорад. Дар ин самт ҳам муассисаҳои давлатӣ ва ҳам ҷамъиятиву хориҷӣ чораҳои мухталиф меандешанд. Барои онҳое, ки ба ин беморӣ гирифторанд, муолиҷа ва дорувориҳо ройгонанд. Он чиз боиси хушҳолист, ки рӯз аз рӯз дар бораи бемории сил маълумоти бештар дастрас менамоянд ва сатҳи огоҳиашон дар хусуси ин беморӣ меафзояд.
Аслан, чунонки ҳамеша таъкид мешавад, пешгирии беморӣ аз муолиҷаи он осонтар аст. Минбаъд низ барномаву лиҳаҳои нав барои бартараф кардани чунин беморӣ ба миён хоҳанд омад. Зеро солим нигоҳ доштани ҳар инсон солим будани ҷомеа аст. Аз ин рӯ, ҳамасола, маблағгузории давлатии соҳаи зиддисилӣ беҳтар гардида истодааст. Дар ҷумҳурӣ ҳоло 274 нафар табиби силшинос кор мекунанд, аммо талабот ба онҳо 667 нафар мебошад. Бо мақсади ҷалби мутахассисони ҷавон як қатор имтиёзҳо, аз қабили иловапулӣ дар ҳаҷми сад фоиз ба моҳонаи вазифавӣ, табобати имтиёзнок дар санаторияҳо, рухсатии иловагӣ барои шароити кори вазнин ва ғайра пешбинӣ шудааст. Ҳамасола 24-уми мартро Созмони Милали Муттаҳид (СММ) ҳамчун Рӯзи умумиҷаҳонии мубориза алайҳи бемории сил (ТУТ) эълон доштааст, ки ин ҳам як навъ таваҷҷӯҳ ба гирифторони ин беморист.
Боварӣ ҳаст, ки агар ҳама қишрҳои ҷомеа дар ин самт якҷоя фаъолият баранд, баҳри пешгирии бемории сил ба дастовардҳои бештар ноил мегардем.
Нет комментариев