8-9 августи соли равон гурӯҳи 13-нафараи рӯзноманигорони Ҷумҳурии Ӯзбекистон ба шаҳри Душанбе ташриф меорад.
Тавре аз Раёсати иттилот ва робитаҳои хориҷии дастгоҳи Раиси шаҳри Душанбе ба АМИТ «Ховар» хабар доданд, роҳбарияти мақомоти иҷроияи ҳокимияти давлатии шаҳри Душанбе меҳмононро дар дарвозаи шимолии шаҳр, дар дидбонгоҳи Чорбоғи ноҳияи Варзоб пешвоз мегиранд.
Ба иттилои манбаъ, рӯзноманигорони ӯзбек дар доираи сафари худ ба шаҳри Душанбе аз Китобхонаи миллии Тоҷикистон, Осорхонаи миллии Тоҷикистон, Мамнӯъгоҳи таърихӣ –кишваршиносии «Қаълаи Ҳисор», Ҷамъияти дорои масъулияти маҳдуди «Ноқил Талко», Маҷмааи тандурустии «Истиқлол», Боғи фарҳангию фароғатии ба номи Садриддин Айнӣ, Муассисаи давлатии «Боғи фароғатии «Хайём» боздид ба амал меоранд.
9 август дар Академияи воситаҳои ахбори омма мулоқоти рӯзноманигорони ӯзбеку тоҷик баргузор мегардад.
Тавре сардори Раёсати иттилот ва робитаҳои хориҷии дастгоҳи Раиси шаҳри Душанбе Абдумаҷид Ҳакимзода иттилоъ дод, ба ҳайати гурӯҳ раиси Маркази фарҳангии миллии тоҷикони Ӯзбекистон «Ориёно» ва хабарнигори шабакаи телевизионии Ӯзбекистон Шарофат Эрматова, муовини сармуҳаррири рӯзномаи «Овози тоҷик» Тоҷибой Икромов, муаллифи филми мустанади «Зери осомони ягона» Ҷасур Исҳоқов, профессори Донишгоҳи давлатии Самарқанд Ҷумъа Ҳамроев, муҳаррири рӯзномаи «Ховар» Олим Ҷумъақулов, мудири шуъбаи Агентии миллии иттилоотии Ӯзбекистон Нурулло Насриев, хабарнигори телевизиони «Ӯзбекистон 24» Зебо Тӯхтаева, хабарнигори Агентии иттилоотиии «Uz Report» Абдулло Буварабаев, наворбардори Агентии иттилоотиии «Uz Report» Сӯҳроб Ҷӯраев, муҳаррири шуъбаи рӯзномаи «Халқ сӯзи» Шойим Бутаев, корманди рӯзномаи «Народное слово» Машкура Захидова, хабарнигори телевизиони «Ӯзбекистон 24» Ҷамол Маҳмудов, мудири шуъбаи итилоотии радиои байналмилалии «Ӯзбекистон 24» Шарофиддин Тулеганов шомил мебошанд.
Хотиррасон менамоем, ки ҳайати мазкур рӯзҳои 7-8 августи соли равон ба маркази вилояти Суғд – шаҳри Хуҷанд ворид шуданд. Рӯзноманигорони ӯзбек дар доираи сафари худ ба Хуҷанд аз хонаи табъу нашри «Кохи матбуот» боздид ба амал оварда, бо фаъолияти идораи рӯзномаи ӯзбекии вилоятии «Суғд ҳақиқатӣ» шинос шуда, бо аҳли зиёи вилоят мулоқот анҷом доданд. Меҳмонон ҳамзамон аз бозори марказии шаҳри Хуҷанд — «Панҷшанбе», минтақаи озоди иқтисодии «Суғд» дидан намуда, дар Маҷмааи таърихию фарҳангии «Қалъаи Хуҷанд» дар намоишгоҳи ҳунарҳои мардумӣ ва барномаи фарҳангӣ, ки ба муносибати ташрифи онҳо баргузор гардид, иштирок намуданд.
Меҳмонон 10 август ба вилояти Хатлони Ҷумҳурии Тоҷикистон мераванд. Тавре аз мақомоти иҷроияи ҳокимияти давлатии вилояти Хатлон иттилоъ доданд, мпеҳмонони Ӯзбекистон зимни сафар ба маркази маъмурии вилояти Хатлон шаҳри Бохтар ва навоҳии Данғараву Муъминобод сафар намуда, аз мавзеъҳои сайёҳӣ, таърихиву фарҳанги шаҳру навоҳии номбурда дидан намуда, бо иштироки онҳо мулоқотҳо барпо мегарданд. Шиносоии ҳайати рӯзноманигорони Ӯзбекистон ду рӯз идома меёбад.
Манбаъ: АМИТ «Ховар»
Нет комментариев