Раиси вилояти Суғд Абдураҳмон Қодирӣ шанбеи 29 август бо шароити истиқоматии фарзандони оилаҳои аз офати табиӣ зарардидаи Вилояти Мухтори Кӯҳистони Бадахшон, ки айни замон дар урдугоҳи «20 — солагии Истиқлолияти Ҷумҳурии Тоҷикистон»-и ноҳияи Ҷаббор Расулов ба истироҳат фаро гирифта шудаанд, шинос гардид.
Дар арафаи фаро расидани ҷашни бузурги 24-умин солгарди Истиқлолияти давлатии Ҷумҳурии Тоҷикистон ба истироҳату таҳсил фаро гирифтани фарзандони оилаҳои аз офати табиӣ зарардидаи вилояти Бадахшон дар вилояти Суғд нишонаи волои ҳамбастагии мардуми тоҷик аст.
Раиси вилояти Суғд дар остонаи Рӯзи дониш муҳассилини Вилояти Мухтори Кӯҳистони Бадахшонро шодбош гуфта, онҳоро бо хониши хубу аъло ҳидоят намуд. Таъкид бояд кард, ки барои таҳсили хонандагон беҳтарин шароити хониш ва синфхонаҳои муҷаҳҳаз бо технологияҳои замонавӣ дар истироҳатгоҳ омода шудааст. Дар баробари таҳсил мувофиқи барномаи пешбинигардида толибилмон бо мавзеҳои фарҳангӣ, осорхона ва ҷойҳои муҳими таърихӣ ошноӣ пайдо менамоянд. То ин муддат хонандагон аз Маҷмаи фарҳангию таърихии Қалъаи Хуҷанд ва Қасри Арбоб боздид намудаанд. Дӯстиву рафоқат бо ҳамсолони худ, истироҳати бофароғат, иштирок дар маҳфилҳои омӯзишиву шавқмандӣ, тамошои мавзеъҳои тамошобоби Хуҷанди бостонӣ, боиси хушҳолии кӯдакону наврасон гардид.
Кӯдакону наврасон соли нави хонишро дар истироҳатгоҳи «20 — солагии Истиқлолияти Ҷумҳурии Тоҷикистон» оғоз менамоянд. То сохта ба итмом расонидани манзилҳои истиқоматии оилаҳояшон онҳо дар вилояти Суғд ба таҳсил фаро гирифта мешаванд. Дар остонаи соли нави хониш Мақомоти иҷроияи ҳокимияти давлатии вилояти Суғд барои кӯдакону наврасон маҳфилу мулоқоти шавқовар орост. Ба 110 нафар фарзандони оилаҳои аз офати табиӣ зарардида Раиси вилоят сару либоси мактабӣ, пойафзол, ҷузвдон, китобҳои дарсӣ ва дигар лавозимоти зарурӣ тӯҳфа намуд.
Зимни сӯҳбат ба Раиси вилоят хонандагону омӯзгорони ноҳияҳои Шуғнон, Ванҷу Дарвоз ба ғамхорию таваҷҷӯҳи падаронаи Сарвари давлат арзи сипос намуданд.
Тавре гуфта шуд, таҳсили хонандагони оилаҳои аз офати табиӣ зарардида дар синфхонаҳои замонавии дорои шароити зарурӣ сурат мегирад ва хонандагон ба маҳфилҳои атласбофию адрасбофӣ низ ҷалб карда мешаванд.
Раиси вилоят зимни боздид аз синфхонаҳое, ки барои гузаронидани маҳфилҳои атласу адрасбофӣ, кашидадӯзӣ ва расмкашӣ муҷаҳҳаз гардонида шудаанд, дидан намуда, бо ҷараёни ҳунаромӯзии истироҳаткунандагон шинос гардид.
Шафоат Султонсалимшоева ва Қурбонбегим Чоршанбева — хонандагони мактаби таҳсилоти миёнаи №23-и ба номи Раҷаббек Нафасбекови деҳаи Барсени ноҳияи Шуғнон аз номи тамоми наврасон минатдориашонро ба Президенти мамлакат Эмомалӣ Раҳмон ва Раиси вилояти Суғд Абдураҳмон Қодирӣ изҳор доштанд. Дар ин бора http://sugd.tj/index.php/tj/navid/5226-uqobcha хабар медиҳад.
Нет комментариев