Сафорати Амрико барои кумак ба амнияти марзӣ дар Тоҷикистон ба нерӯҳои марзбонӣ 18 адад ҷипҳои J8 ҳадя кард. Ба гузориши сайти сафорати Амрико дар Тоҷикистон, ин мошинҳо, ки арзиши беш аз 1 миллиону 300 ҳазор доллар аст, ба нерӯҳои марзбонӣ барои анҷоми амалиёт дар шароити душвори ҷуғрофии манотиқи марзӣ кумак хоҳанд кард.
Сафири ИМА дар Тоҷикистон Ҷон Марк Поммершайм ва генерал-полковник Раҷабалӣ Раҳмоналӣ, фармондеҳи Қӯшунҳои сарҳадӣ дар маросими супоридани мошинҳо ширкат доштанд. Сафир Поммершайм зимни суханронӣ дар маросим қайд кард, ки “ин кумак танҳо як мисоли кумакҳои фанниест, ки мо ба Тоҷикистон барои ҳифзи сарҳади давлатӣ мерасонем. Мо аз Тоҷикистон барои ҳамкории зич дар соҳаи амнияти сарҳадӣ миннатдорем ва аз дастовардҳои худ ифтихор мекунем. Мо дар мубориза бо терроризм, қочоқи маводи мухаддир ва силоҳи қатли ом шарик боқӣ мемонем. Ба хотири пуштибонӣ аз равобити худ мо нақша дорем, ки дар соли оянда ба бахши амнияти Тоҷикистон ҳудуди 60 миллион доллар сармоягузорӣ кунем”.
Қобили зикр аст, ки Иёлоти Муттаҳидаи Амрико 30 сол боз бо Тоҷикистон ҳамкорӣ дорад ва дар чаҳорчӯби барномаҳои пуштибонӣ аз бахши амният, рушди иқтисод, беҳдошт, ҷомеаи шаҳрвандӣ ва маорифи Тоҷикистон беш аз 1,8 миллиард доллар барои ҳамкориҳои рушд ва низомӣ ихтисос додааст.
Аз рӯйи маводи sugdnews.com
Нет комментариев