Вақте ки Гуласал мегўӣ, симои як бонуи нозанин, соҳиби чашмони шаҳло ва пайкари нозуку саропо ишқу эҳсоси ҷавонӣ пеши назар меояд. Ўро Худованд ба ҷуз ҳусни беназир, инчунин ҳунари нотакрор ато намудааст. Гўё маҳз барои саҳна офарида шудааст. Дар саҳна хиромидану нозу адои ба худаш зебандааш ҳаводоронашро мафтуни худ намудаву маҳбуби дилҳояшон гаштааст.
Чанде қабл Гуласал Пӯлодова меҳмони радиои мо буду ба чанд саволе, ки мо пешкашаш намудем, посух дод.
Гуласал, қаблан Шуморо ба кошонаи радиои «Тироз» хайрамақдам мегӯем.
Саломат бошед, салом арз мекунам ба кулли мухлисону ҳаводорони радиои «Тироз».
Дар оғоз чанд сухан атрофи фаъолияти худ мегуфтед?
Гуласал Пӯлодова: Айни ҳол ман барои консертҳои солинавие, ки дар пеш истодаанд, омодагӣ мебинам.
Соли 2015 аз нигоҳи Гуласал хотирмон буд ва ё ин, ки на он қадар?
Гуласал Пӯлодова: Бовар кунед соли 2015 аз нигоҳи ман хеле соли пурбарор буд, чунки дар ҳамин сол тавонистам барои мухлисони азизам консерти ҳисоботии худро пешкаш намоям.
Гуласал ҳамчун як бонуи ҳунарманд имрӯз ба чӣ ниёз дорад?
Гуласал Пӯлодова: Албатта ҳар нафаре, ки дар ҷодаи ҳунар қадамҳои нахустини хешро мениҳад, ниёз ба дастгириву пазироии гарми мухлисон дорад.
Суруди «Тақдир», ки Шумо бо сӯзу гудоз онро зам-зама кардед, барои кӣ буд, зеро мухлисонатон аз мо зиёд ҳамин таронаро мепурсанду дархост мекунанд?
Гуласал Пӯлодова: Бале аз ман ҳам бисёртар ҳамин сурудро мепурсанд. Дар бораи суруди «Тақдир» фақат ҳаминро қайд карданӣ ҳастам, вобаста ба ҳамин тарона, ки ҳаёти инсон пастӣ дорад, баландӣ дорад ва тақдир ҳаррӯз ба ҳама тӯҳфа тақдим намекунад. Ҳамин буд мақсади ман, ки тақдири инсонро дар ҳамин суруд аз рӯи мушоҳидаҳои худ ҷой диҳам ва сабаб ҳам дар ҳамин буд.
Шумо худро бонуи ба орзуи дили хеш расида мепиндоред?
Гуласал Пӯлодова: Орзуҳо албатта хеле зиёданд ва рӯз аз рӯз тавлид мешаванд. Вале ман фикр мекунам, ки ҳатман рӯзе худро чунин бонуи ба кулли орзуҳои хеш расида хоҳам дид.
Сабаб чӣ буд, ки Гуласал дигар касбро неву маҳз санъатро ихтиёр кард?
Гуласал Пӯлодова: Сабаби санъаткор шудани ман ҳам дар он аст, ки равонашон шод падарам ҳунарманд буданд ва ман ҳам ҳамин роҳро интихоб кардам ва шукрона аз он ҳам мекунам, ки имрӯз ман ҳам санъаткор шудаву дар ин роҳ ҳастам.
Мегуфтед, ки ба ҷуз хондани сурудҳои эстрадӣ аз ӯҳдаи хондани сурудҳои классикӣ ҳам баромада метавонед?
Гуласал Пӯлодова: Албатта метавонам, ҳаминро қайд бояд кунам, он санъаткоре, ки сурудҳои классикиро хонда наметавонад аз ӯҳдаи хондани дигар намуди сурудҳо ҳам баромада наметавонад. Чун ман ба хубӣ аз иҷрои хондани сурудҳои классикӣ мебароям.
Агар зиндагӣ бори дигар такрор мешуд, Шумо кадом чизро аз худ тағйир медодед?
Гуласал Пӯлодова: Агар зиндагӣ бори дигар такрор шавад ҳам, ман ҳеҷ чизро аз худ иваз намекардам ва боз роҳи санъатро интихоб менамудам. Зеро, ин касбу ҳунари дӯстдоштаи ман аст.
Агар нафаре пайдо шаваду болои сари Шумо фишор овардаву бигӯяд, ки дигар ҳамин корро намекунӣ, яъне дигар бас аст ҳунармандӣ, дар ин маврид чӣ кор мекардед?
Гуласал Пӯлодова: Ҳеҷ кас ҳақ надорад болои сари ман фишор биоварад ва маро аз ин роҳ боз дорад, чун интихоби ман аст, санъаткорӣ боз ба ҳамин роҳ хоҳам рафт.
Гуласал аксар нафар санъаткорон дар шабакаҳои иҷтимоӣ ҳастанд, яъне дар интернет Шумо ҳам дар ягон шабакаи иҷтимоӣ худро ба қайд гирифтаед ва ё на?
Гуласал Пӯлодова: Бале, ман дар шабакаҳои иҷтимоии интернет ҳастаму бо мухлисонам зиёд сӯҳбат мекунам, аммо баъзе чунин саволҳоро равона месозанд, ки аз посух доданаш оҷизӣ мекашаму зуд мебароям.
Манбаи даромади Шумо асосан чист? Ба тиҷорат низ машғул ҳастед?
Гуласал Пӯлодова: Ба ҷуз дар тўю маъракаҳои мардум хизмат намудан, дигар ба ҳеҷ гуна тиҷорат машғул нестам. Обод бошанд мардуми азизи мо, ки моро дастгириву қадрдонӣ мекунанд.
Таманниёти Шумо ба мухлисонатон дар арафаи Соли нав?
Гуласал Пӯлодова: Дар арафаи Соли нав сараввал кулли мухлисони азизамро бо Соли нав табрику муборак бод мегӯям. Ҳамеша сарбаланду муваффақ бошанду ҳамеша дар хонаашон хушнудиву хурсандӣ бошад?
Поён клип ва сурудҳои тоза аз Гуласал Пӯлодова:
Gulasal Pulоtova_Tojikiston from Portal Tiroz on Vimeo.
Gulasal_Pulotova_-_Masuzon from Portal Tiroz on Vimeo.
Нет комментариев