Ҷиҳати иҷроиши қарори Раиси вилояти Суғд Абдураҳмон Қодирӣ давоми чанд моҳи охир дар Маҷмаи таърихию фарҳангии ба номи Камоли Хуҷандӣ, рӯзҳои фарҳанги шаҳру ноҳияҳои вилояти Суғд баргузор гардиданд. Тибқи нақшаи тасдиқгардида дар ҷамъбасти он рӯзи якшанбе, санаи 7-уми август Рӯзи фарҳанги шаҳри Хуҷанд баргузор гардид.
Ин шом садои мутантани карнай бошандагон ва меҳмонони шаҳрро барои таҷлили чорабинии «Рӯзи фарҳанги Хуҷанд дар Боғи Камол» даъват кард.
Боғи Камол ба назари мо аз ҳаррӯза дида он рӯз назарработару дилфиребтар менамуд.
Дар ин чорабинӣ шахсиятҳои бузурги шаҳр-уламову удабо ва фузалову шуаро ширкат карданд. Чорабинӣ бо тановули “Оши палави Хуҷандӣ” дар чойхонаи ба номи Хоҷа Камол оғоз ёфт.
Рӯзи фарҳанги Хуҷанд дар Боғи Камол
Роҳбарияти шаҳр дар шахси раиси шаҳр Шариф Шарифзода ва намояндагони Мақомоти иҷроияи ҳокимияти давлатии вилоят аз дастовардҳои меҳнаткашони шаҳр, ки дар даромадгоҳи асосии Боғ ба намоиш гузошта шуда буданд, тамошо карданд. Дар ин раста кулли соҳаҳои хоҷагии халқи шаҳр, аз ҷумла саноатчиёну маорифчиён, аҳли фарҳангу ҳунар, гулкорону гилкорон, табибону маорифчиён дастранҷҳои худро ба маърази тамошо гузошта буданд.
Шариф Шарифзода бо баробари тамошои намоиши дастранҷҳо фикру мулоҳизаҳои худро барои боз ҳам рушд бахшидани ин ё он намуди соҳаву ҳунар баён дошт.
Ба раиси шаҳр ҳамзамон тамошои баромади тарбиятгирандагони боғчаҳои бачагонаи шаҳр ва варзишгарони наврас-боксчиёну бисёрҳарбачиён ва каратэчиён басо писанд омад.
Дар ҳавлии Хоҷа Камол бошад, роҳбарият бо барномаи адабӣ-мусиқии «келинбиёрон» шинос шуд, ки он ҷо сурудҳои қадимаи тӯёнаи «ёр-ёр» ва «нақш» ба таври зинда хонда шуд.
Баъди аёдати марқади шоир Камоли Хуҷандӣ Шариф Шарифзода ва ҳамроҳонаш ба идҷои асосӣ омаданд, ки он ҷо тақрибан 3 ҳазор тамошобин ҷамъ омада буданд.
Меҳмононро аз номи МИҲД-и шаҳр раиси шаҳр Шариф Шарифзода хуш омадед гуфт. Хуҷандиёнро бо ин санаи фархунда аз номи МИҲД-и вилоят муовини Раиси вилоят Заробиддин Файзуллозода муборакбод гуфта, аз сиёсати хирдмандонаву инсондӯстона ва созандаи Асосгузори Сулҳу Ваҳдати миллӣ-Пешвои миллат, Президенти Ҷумҳурии Тоҷикистон, мӯҳтарам Эмомалӣ Раҳмон нисбат ба пешбурди кулли соҳаҳои хоҷагии халқи кишвар ва дар ин замина баланд бардоштани орбрӯву эътибори Ҷумҳурии соҳибистиқлоламон дар арсаи байналмилалӣ ёдовар шуд.
Дар вазъияти тантанавӣ озмунҳои шаҳрии “Хонаи беҳтарин”, “Оилаи беҳтарин” ва “Маҳаллаи беҳтарин”, ки ба истиқболи 25-солагии Истиқлолияти давлатии Ҷумҳурии Тоҷикистон эълон ва гузаронида шудаанд, ҷамъбаст гардид.
Раиси шаҳр Шариф Шарифзода ва муовини Раиси вилоят Заробиддин Файзуллозода дар вазъияти тантанавӣ ба ғолибони озмуни «Оилаи беҳтарин» оилаи Шарифовҳо, Бузуруковҳо ва Файзуллоевҳо, ҳамзамон ғолибони озмуни «Хонаи намунавӣ» — манзили истиқоматии оилаҳои Ҳомидовҳо, Саломовҳо ва Турсуновҳо,
инчунин ғолибони шарти «Маҳаллаи беҳтарин» — Кумитаи маҳаллаи «Сирдарё» (ҷойи аввал), Кумитаи маҳаллаи «Масҷиди савр» (мақоми дуюм) ва Кумитаи маҳаллаи «Чорчароғ» (ҷойи сеюм) «Диплом» ва мукофотҳои пулиро тақдим намуданд.
Барномаи рангини адабӣ-мусиқӣ ва мардумии ҳунармандони гурӯҳҳои худфаъолияти бадеӣ, истеъдодҳои ҷавон ва ҳунармандони халқӣ тибқи Низомномаи озмуни вилоятиии «Рӯзҳои фарҳангӣ» манзури ҳозирин гардид.
Ҳамин тавр, садои мусиқиву суруд дар фазои Боғи Камол то дер мутантан садо дод.
Исломҷон Бобоев,
аксбардор Илҳомҷон Бобоев
Нет комментариев