Раиси вилояти Суғд Раҷаббой Аҳмадзода ба ноҳияи Мастчоҳ сафар намуда, бо рафти ҷамъоварии пахта дар ноҳия шинос шуд.
Тавре зимни боздид аён гардид, айни замон дар хоҷагиҳои пахтакори ноҳия ғуну чини пахта идома дошта, то имрӯз дар ноҳия 16 902 тонна “тиллои сафед” ҷамъоварӣ гардидааст.
Дар асоси уҳдадорӣ ноҳияи Мастчоҳ бояд имсол 25600 тонна пахта истеҳсол намояд. Аммо таҳлилҳо нишон медиҳанд, ки нисбат ба ҳамин давраи соли гузашта дар чиниши пахта ба миқдори 5 ҳазор тонна қафомонӣ мавҷуд буда, теъдоди зарурии чинакчиён ба маъракаи пахтачинӣ сафарбар нагардидаанд.
Раиси вилоят Раҷаббой Аҳмадзода аз ҷараёни сусти ҷамъоварии пахта изҳори нигаронӣ намуда, барои ҷалби бештари чинакчиён ва ба 1 сомониву 20 дирам расонидани ҳақи чиниши пахта ба роҳбарияти ноҳия супоришҳои мушаххас дод. Таъкид гардид, ки ҳар рӯзи офтобиро ғанимат бояд донист ва ҳосили бо арақи ҷабин рӯёнидаи деҳқонон сари вақт ҷамъоварӣ карда шавад.
Изҳори боварӣ карда шуд, ки пахтакорони ноҳия бо истифода аз боду ҳавои мусоид нақшаи муайяншударо пурра иҷро менамоянд.
Манбаъ: Хадамоти матбуоти Раиси вилояти Суғд
Нет комментариев