Шиносоии Раиси вилоят бо сохтмони корхонаҳои саноатӣ дар шаҳри Бӯстон

0
300 просмотров

Раиси вилояти Суғд Раҷаббой Аҳмадзода дар шаҳри Бӯстон бо рафти сохтмони корхонаи саноатии ҶДММ “Нуртез”, корхонаи истеҳсол ва коркарди фулузоти ҶДММ “Ганҷофар” ва корхонаи заргарии “Зари Суғд” шинос гардид.

Тавре маълум аст, Пешвои миллат муҳтарам Эмомалӣ Раҳмон бо мақсади рушди бештари иқтисодиёт, зиёд намудани корхонаҳои саноатӣ ва ташкили ҷойҳои нави корӣ солҳои 2022-2026-ро панҷсолаи рушди саноат эълон намуданд. Ин тадбири муҳим саривақтӣ буда, ба амалигардонии ҳадафи чоруми стратегӣ- саноатикунонии босуръати кишвар мусоидат менамояд.

Маҳз дар асоси дастуру ҳидоятҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ташкили корхонаҳои нав ва таъмини аҳолӣ бо ҷойи корӣ дар шаҳри Бӯстон айни замон сохтмон ва муҷаҳҳазсозии се корхонаи нав — ҶДММ “Нуртез”, корхонаи истеҳсол ва коркарди фулузоти ҶДММ “Ганҷофар” ва корхонаи заргарии “Зари Суғд” ҷараён дорад.

ҶДММ «Нуртез» бо назардошти талаботи бозор ва ба роҳ мондани истеҳсоли маҳсулоти воридотивазкунанда сохта шуда, дар он 60 намуди мехҳои гуногун барои сохтмон истеҳсол карда мешавад. Корхонаи мазкур метавонад дар як моҳ 40 тонна мехҳои гуногунҳаҷмро истеҳсол намояд.

Дар ҶДММ «Ганҷофар» истеҳсоли профилҳо барои сохтмон ва қубурҳои калонҳаҷм ба роҳ монда шуда, баъди ба истифода додани корхона 25 нафар соҳиби ҷойи кор мегарданд.

Дар корхонаи заргарии «Зари Суғд» бошад васлу насби таҷҳизот идома дошта, барои воридсозии дастгоҳҳои муосир бо ширкатҳои истеҳсолии Олмону Чин ва Туркия шартномаҳо баста шудааст. Маҳсулоти корхона барои қонеъ гардонидани талаботи аҳолӣ истифода шуда, марҳила ба марҳила то 50 нафар ба кор таъмин хоҳанд шуд.

Раиси вилоят зимни шиносоӣ барои пурра омода кардани корхонаҳои саноатӣ, ташкили ҳарчи бештари ҷойҳои корӣ, бунёди дӯкони фурӯши маҳсулоти заргарӣ дар маркази вилоят ва ба фурӯш гузоштани маҳсулоти корхонаи «Зари Суғд», ба ободониву кабудизоркунӣ фаро гирифтани гирду атрофи корхонаҳои бунёдшаванда ба масъулин супоришҳо дод.

Манбаъ: Хадамоти матбуоти Раиси вилояти Суғд

Нет комментариев

Также рекомендуем

Сообщить об опечатке

Текст, который будет отправлен нашим редакторам: