Ҷудокори ҷавон ва умедбахши тоҷик Сомон Маҳмадбеков (-81 кг) дар даври ниҳоии Бозиҳои Осиёии Ҳангжоу -2022 бар намояндаи Кореяи Ҷанубӣ — Ли Ҷунван бо имтиёзи вазарӣ ғалаба карда, соҳиби нишони тилло шуд. Ин аввалин тиллоӣ Тоҷикистон дар Бозиҳои Осиёии Ҳангжоу – 2022 аст.
Ҳамчунин, Сомон Маҳмадбеков дар таърихи ҷудои тоҷик аввалин ҷудокор шуд, ки дар Бозиҳои Осиёӣ соҳиби нишони тилло гардид. Ин 5-умин тиллои Тоҷикистон дар таърихи Бозиҳои Осиёӣ маҳсуб мешавад.
Қобили зикр аст, ки Сомон Маҳмадбеков ғайр аз ҷоизаи Бозиҳои Осиёии Ҳангжоу -2022 аз ҷаноби Пешвои миллат муҳтарам Эмомалӣ Раҳмон бо маблағи 150 000 сомонӣ ва аз ҷониби шаҳрдори Душанбе муҳтарам Рустами Эмомалӣ хонаи сеҳуҷрага инъом карда мешавад.
Сомон имрӯз то ба даст овардани нишони тилло масири ноҳамвореро тай намуд. Ӯ дар даври аввал бо ду имтиёзи вазарӣ бар Муаяд Звайб аз Фаластин пирӯз шуда, ба даври чаҳорякниҳоӣ роҳ ёфт. Дар даври чаҳорякниҳоӣ Сомон бо имтиёзи иппон бар Асад Масабирови қирғиз ғалаба карда, ба даври ниманиҳоии Бозиҳои Осиёи Ҳангжоу -2022 баромад.
Дар даври ниманиҳоӣ Сомон тавонист, ки бо як ҷасорату матонати ба худ хос бар Абулайхан Жубаназари қазоқ бо имтиёзи вазарӣ ғалаба карда, ба финал роҳ ёбад ва он ҷо бар Ли Ҷунван аз Кореяи Ҷанубӣ бо имтиёзи вазарӣ музаффар гардида, соҳиби нишони заррини мусобиқа гардид.
Ёдовар мешавем, ки имрӯз Беҳрӯз Хоҷазода зери вазни то 73 кг аз риштаи ҷудо соҳиби нишони биринҷии Бозиҳои Осиёи Ҳангжоу -2022 гардида буд. Сомон 5-умин тиллои Тоҷикистонро дар таърихи Бозиҳои Осиёӣ соҳиб шуд. Беҳрӯз нишони 18-уми биринҷии Тоҷикистонро дар таърихи Бозиҳои Осиёӣ ба даст овард. Дар умум медалҳои Сомон ва Беҳрӯз 29-ум медали Тоҷикистон дар таърихи Бозиҳои Осиёӣ маҳсуб мешавад.
Манбаъ: ТВ-Варзиш
Нет комментариев