Рӯзи шанбеи 29 октябр дар Кохи фарҳанги Суғдиёни маркази вилоят Фестивали вилоятии “Атласу адраси Суғд — 2016” баргузор шуд.
Ин фестивал аз руи номинатсияҳои гуногун бо мақсади тарғибу ташвиқи либоси миллӣ, тарбияи зебоипарастӣ, баланд бардоштани мақому манзалати либоси миллӣ, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ, рушди атласу адрасбофӣ, рушди соҳаи саноати сабук, аз ҷумла ривоҷу равнақ бахшидан ба истеҳсоли матоъҳои атласу адрас, тарғиби сарулибос аз матои табии аз ҷиҳати экологӣ безарар бо истифодаи услубҳои миллии дӯзандагӣ, рушди меҳнати хонагӣ ва ба муносибати 25-солагии Истиқлолияти давлатии Ҷумҳурии Тоҷикистон гузаронида шуд.
Ғолибони фестивал аз руи номинатсияҳои “Беҳтарин либоси кӯдакона”, “Беҳтарин либоси рӯзмарра”, “Беҳтарин либоси расмӣ”, “Беҳтарин либоси миллии қадима” ва “Беҳтарин либоси идона” муайян карда шуданд.
Тибқи хулосаи ҳайати ҳакамони ин чорабинӣ дар бахши“Беҳтарин либоси миллии қадима” ҷои якум насиби Барно Шехсаидова, ҷои дюм насиби Зиёда Муҳаммадиева, ҷои сеюм насиби Мавлуда Бобоева гардид. Мубина Содиқова (ҷои якум), Ганҷинаи Шӯҳрат (ҷои дуюм) ва Сабоҳат Ҷӯраева (ҷои сеюм) ғолибони бахши “Беҳтарин либоси идона” шуданд. Дар бахши “Беҳтарин либоси рӯзмарра” ҷойҳои якум, дуюм ва сеюмро Зайнура Қодирова, Нилуфар Қурбонова ва Дилафрӯз Каримова соҳиб гардиданд. Дар бахши “Беҳтарин либоси расмӣ” ҷои аввалро Оиша Сатторова, ҷои дуюмро Махфират Деҳқонова ва ҷои сеюмро Нигора Бобоҷонова ишғол карданд. Орзугул Бердиева, Зарина Бобокалонова ва Садоқат Сулаймонова ғолибони бахши “Беҳтарин либоси кӯдакона” эълон шуданд.
Аз ҷониби Раиси вилояти Суғд Абдураҳмон Қодирӣ ба ҳар кадоме аз соҳибони ҷои аввал ба миқдори 3 ҳазор сомонӣ, ба ҳар кадоме аз соҳибони ҷои дуюм 2,5 ҳазор сомонӣ ва ба ҳар кадоме аз соҳибони ҷои сеюм 2 ҳазор сомонӣ мукофотпулиҳо тақдим карда шуд.
Манбаъ: sugd.tj
Нет комментариев