Як зан дар вилояти Суғд чоргоник ба дунё овардаст. Назокат Ҳодибоева, зани 35-солаи сокини ҷамоати Овчӣ Қалъачаи ноҳияи Бобоҷон Ғафуров шаби 12 ба 13-уми июн дар зоишгоҳи вилоятӣ дар шаҳри Хуҷанд чоргоники худро ба дунё овард.
Аз таваллудхонаи вилоятии Суғд субҳи 14-уми гуфтанд, ки 3 тани ин навзодҳо писар ва яке духтар мебошанд. Ба гуфтаи табибон, ҳар яке аз писарон бо вазни 2,3 килограм ва духтар бо вазни 1,7 кг, ба дунё омадаанд.
«Онҳо дар 35-ҳафтаӣ ва каме барвақттар зода шуданд. Вазъи саломатии онҳо қаноатбахш аст ва зери назорати табибон даруни шиша парасторӣ мешаванд»,-гуфт яке аз табибон.
Рӯзи 13-уми июн намояндагони ҳукумати Бобоҷон Ғафуров ба аёдат модару кӯдакон рафта ва гуфтаанд, ки дар парасториву бузург кардани онҳо ёрӣ хоҳанд расонд. Назокат Ҳодибоева, модари навзодон дар маҳали зисташ ба фаррошӣ машғул буда, шавҳараш ронандаи мошини «Ёрии таъҷилӣ» будааст. Ин ҷуфт то таваллуди ин чоргоник, боз чаҳор фарзанди дигар доштанд, ки аз ҳама бузурги онҳо 15-сола мебошад.
Давоми камтар аз як моҳи ахир ин бори дувум аст, ки дар Тоҷикистон чоргоник ба дунё меояд. Рӯзи 14-уми май Зарина Неъматоваи 22-сола, як сокини шаҳри Бохтар (Қӯрғонтеппаи собиқ) дар таваллудхонаи рақами яки шаҳри Душанбе чаҳор тифл — се духтар ва як писар ба дунё овард.
Бар асоси омори расмӣ шумораи аҳолии Тоҷикистон ҳар сол ба ҳисоби миёна то 2,2 дарсад ё 200 ҳазор нафар афзоиш меёбад. Афзоиши мунтазами аҳолӣ ҳоло Тоҷикистонро ба яке аз кишварҳои ҷавонтарини дунё табдил додааст.
Сомонаи «Тоҷикистонтаймс» низ дар ин бора хабар дода, чунин овардааст:
Назокат Ҳодибоеваи 35 сола, ки сокини ҷамоати Овчӣ Қалъаи Ноҳияи Бобоҷон Ғафуров мебошад шаби 12 ба 13 июн чоргоник ба дунё овардааст.
Табибон гуфтаанд, ки тифлакон ҳарчанд каме пеш аз мӯҳлат дар 35 ҳафтагиашон ба дунё омада бошанд ҳам вазъи саломатиашон қаноатбахш аст. Айни замон ин чоргоника, ки сетоаш писар ва якеаш духтар мебошад зери назорати табибон қарор дошта, дар даруни шиша парасторӣ мешаванд. Намояндагони ҳукумати Бобоҷон Ғафуров баҳри аёдати модару навзодон ба беморхона рафта, гуфтаанд, ки дар парасториву калон кардани онҳо кумак мекунан.
Падари ин чоргоника ронандаи мошини “Ёрии таъҷилӣ” буда, модар дар маҳалли зисташ фаррош шуда кор мекардааст. Онҳо то ба таваллуди ин чоргоника аллакай соҳиби 4 фарзанд буданд ва фарзанди калонии онҳо 15 сола мебошад. Бояд қайд кард, ки ин аввалинҳолати тавлиди чоргоник дар таваллудхонаи вилоятӣ мебошад.
Медиапортали «Тироз»
Нет комментариев