Ба гуфти раиси Ҳизби либерал — демократи Русия, «Тоҷикистон ҳеҷ гоҳ Сурия ё Афғонистон намешавад». Владимир Жириновский изҳори хушнудӣ кардааст, ки ӯро дар кишвар шарқиёна бо нону намак ва рақсу мусиқӣ пешвоз гирифтанд.
Раиси Ҳизби либерал — демократи Русия Владимир Жириновский, ки бо сафари дурӯза дар Тоҷикистон қарор дорад, аз меҳмоннавозии шарқиёнаи тоҷикон ва оромии кишвар тавсиф кардааст.
Жириновский дар саҳифаи фейсбукии худ хабар додааст, ки ба Тоҷикистон расид ва ӯро хуб пешвоз гирифтанд.
«Бо вакилони ЛДПР ба Тоҷикистон расидам. Мардуми кишвар тибқи анъанаҳои меҳмоннавозонаи шарқиёна, моро бо нону намак ва ҳунармандону рақсу мусиқӣ пешвоз гирифтанд», — менависад вай.
Ӯ изҳори боварӣ кардааст, ки дар Тоҷикистон ҳамеша оромӣ ҳукмфармо хоҳад буд.
«Дар Тоҷикистон доим оромӣ ҳукмфармо хоҳад буд. Ин ҷо ҳеҷ гоҳ Афғонистон ё Сурия намешавад. Мо муносибатҳои некбинонаи Тоҷикистон ва Русияро дастгирӣ мекунем. Ҳамкорӣ ба ҳама муфид аст», — афзудааст вай.
Раиси ЛДПР менависад, ки нақша дорад дар Тоҷикистон бо вакилони парлумон, профессору донишҷӯёни Донишгоҳи славянии Тоҷикистону Русия мулоқот хоҳад кард.
Вай афзудааст, ки ҳамчунин аз маконҳои торихиву фарҳангии Тоҷикистон дидан мекунад.
Манбаъ: Спутники Тоҷикистон
Нет комментариев