Сайри ҷудои ҷаҳон бо Tashkent Grand Slam 2023 идома маёбад, ки дар он варзишгарони тоҷик ширкат мекунанд.
Мусобиқа 3 март оғоз шуда то 5-уми март идома меёбад. Мавриди зикр аст, ки дар мусобиқаи номбурда 384 варзишгар (205 мард, 179 зан) аз 52 давлат ширкат меварзанд. Тоҷикистонро 13 ҷудокор (11 мард, 2 зан) дар ин мусобиқа намояндагӣ мекунанд.
2 март маросими қуръакашии мусобиқа баргузор шуд, ки ҷудокорон рақибони хешро шинохтанд. Аз ҷумла варзишгарони тоҷик бо чунин ҷудокорони хориҷӣ нерӯсанҷӣ мекунанд.
Зери вазни то 48 кг ҷудобонуи кишвар Шукрона Карчива дар даври аввал бо ҷудокори 20 солаи мизбон Фотимахон Турсунбоева нерӯсанҷӣ мекунад.
Шоҳида Қаландарова зери вазни то 57 кг дар даври аввал бо ҷудокори 22 солаи қазоқ Балнур Курманбай мубориза мебарад. Дар сурати пирӯзӣ ҷудокори мо бо намояндаи Ҷопон – Момо Тамаокӣ дар даври дуюм вомехӯрад.
Муҳаммадсолеҳ Қуватов дар вазни то 60 кг дар даври аввал бо намояндаи Қирғизистон – Казюбек Чюнюбеков қувваозмоӣ мекунад.
Ҷудокори ҷавону умедбахши кишвар ва қаҳрамони ҷаҳон миёни ҷавонон ва қаҳрамони Тоҷикистон дар вазни то 66 кило – Эмомалии Нуралӣ дар даври аввал бо Ҳаким Агаммемедови 24 сола нерӯсанҷӣ мекунад. Дар ҳамин вазн ҷудокори дигари кишвар Шаҳбоз Саидабуроров бо ҷудокори тозакори қирғиз Эрбол Абасбеков рӯи татамӣ мубориза мебарад.
Зери вазни то 73 кг ду ҷудокори дигари кишвар Беҳрӯз Хоҷазода бо Нариман Мирзоев аз Озарбойҷон ва Маҳмадшариф Наҷмиддинов бо Параҳат Назарови 19 сола аз Туркманистон қуввасанҷӣ мекунанд.
Дар вазни то 81 кг Тоҷикистонро ду ҷудокори муваффақи кишвар Сомон Маҳмадбеков ва Муҳаммадҷон Абдуҷалилзода муаррифӣ мекунанд. Сомон Маҳмадбеков бо Абдулраҳмон Абдулғани аз Миср ва Муҳаммадҷон Абдуҷалилзода бо Маруф Хидиров аз Ӯзбекистон маҳоратсанҷӣ мекунанд.
Дар вазни то 90 кг ҷудокорони умедбехшу бо маҳорати кишвар Ҷаҳонгир Маҷидов ва Комроншоҳ Устопириён дар даври аввал рақобатҳоро оғоз мекунанд. Ҷаҳонгир дар даври аввал бо Марсело Гомес аз Бразилия ва Комроншоҳ бо Озодбек Муродов аз Ӯзбекистон рӯи татами барои роҳ ёфтан ба даври дуюм талош меварзанд.
Миёни сангинвазнҳо Иброҳим Элмуродов ва Темур Раҳимов баромад мекунанд. Ҳар ду ҷудокори кишвар рақобатҳоро дар даври дуюм оғоз менамоянд. Иброҳим дар даври дуюм бо Гела Заалишвилии гурҷӣ ва Темур Раҳимо бо ғолиби ҷуфти Исломбек Равшанқулов аз Ӯзбекистон ва Эрик Абрамов аз Олмон сабқат мекунад.
Ёдовар мешавем, ки имрӯз мусобиқаи мазкур оғоз мешавад ва ҷараёни ҳамаи рақобатҳоро ба таври мустақим МД Телевизиони “Варзиш” манзури ҳаводорон мегардонад.
Манбаъ: Варзиш-ТВ
Нет комментариев