Ба ифтихори 30-солагии Истиқлолияти давлатии ҷумҳурии азизамон имрӯзҳо дар ҳар гӯшаву канори мамлакат, шаҳру деҳот, ҷамоату маҳаллаҳо омодагиҳо ҷараён доранд. Дар вилоят ба истиқболи ин ҷашн 1300 — рӯзи ободонӣ ва кабудизоркунӣ эълон гардида, дар ин радиф амалҳои созандагиву бунёдкорӣ идома доранд. Тибқи нақшаи чорабиниҳои тайёрӣ ба ҷашни фархундаи мамлакат дар ҳудуди вилоят бунёди беш аз шаш ҳазор иншооти маъмурӣ, таъиноти иҷтимоӣ, маориф, нигаҳдории тандурустӣ, корхонаҳои саноативу муассисаҳои фарҳангӣ дар назар аст.
Мувофиқи нақшаи чорабиниҳо оид ба таҷлили 30-солагии Истиқлолияти давлатии Ҷумҳурии Тоҷикистон дар шаҳру деҳоти Панҷакент сохтмони 225 иншоот ба нақша гирифта шуда буд. Баъди ироа гаштани Паёми Президенти кишвар ба Маҷлиси Олии Ҷумҳурии Тоҷикистон сохтмон ва бунёди 405 иншоот тарҳрезӣ шуд.
Тавре сармеъмори шаҳри Панҷакент Зафар Рофиев иброз дошт, то имрӯз дар 114 биною иншоот корҳо оғоз гардида, то 1 декабри соли 2018-ум 63 иншоот ба истифода дода шуд. Аз ин ҷумла, дар ҳудуди шаҳри Панҷакент бо маблағи беш аз 9 ҳазор сомонӣ кӯдакистон барои 200 ҷой ва Маркази ҷавонон бо маблағи 18 ҳазор сомонӣ бунёд ва ба истифода дода шуд. Бо дастгирии Ҷамъияти саҳҳомии кушодаи «Панҷакентсоз» дар хиёбони Рӯдакӣ
Боғи истироҳатию фарҳангӣ ва майдончаи варзишӣ, ҳамчунин дар маҳаллаи Самарқанд бинои истиқоматии панҷошёна мавриди баҳрабардорӣ қарор гирифт. Бо маблағгузории идораи сохтмони асосии вилоят чаҳор иншоот — варзишгоҳи марказии шаҳр таҷдид, дар хиёбони Рӯдакӣ Маҷмааи устод Лоиқ Шералӣ бунёд, меҳмонхонаи «Саразм» аз нав барқарор ва кӯчаи «50-солагии Тоҷикистон» ва кӯчаҳои дигар мумфарш карда шуданд. Дар деҳаҳои Пағна, Вен, Марғедар ва Бӯстони Ҷамоати деҳоти Вору, деҳаи Ҷомчашмаи Ҷамоати деҳоти Косатарош, деҳаи Хурмии Ҷамоати деҳоти Моғиён, деҳаҳои Ровадин, Марғузор ва Ҳушёри Ҷамоати деҳоти Шинг, маҳаллаи Лаби Чашмаи деҳаи Дашти Маллаи Ҷамоати деҳоти Сӯҷина, деҳаи Ҷанголи Ҷамоати деҳоти Хурмӣ, деҳаи Нури Зиндагӣ, Ҷамоати деҳоти Саразм Хонаи саломатӣ ҳар яке бо маблағи 70-80 ҳазор сомонӣ сохта, ба истифодаи сокинон супурда шуд.
Аз ҳисоби соҳибкорони маҳаллӣ, саховатмандон ва имкониятҳои дохилӣ дар деҳаи Шӯрноваи Ҷамоати деҳоти Саразм мактаб барои 240 хонанда, 4 синфхонаи иловагӣ барои 100 хонанда дар таълимгоҳи №97 деҳаи Ваҳдати Ҷамоати деҳоти Халифа Ҳасан, инчунин бо маблағгузории соҳибкор Э.Эшонқулов дар деҳаи Пушти Қӯрғони Ҷамоати деҳоти Моғиён мактаби №94 барои 200 хонанда бунёд ва ба истифода дода шуд.
Аз ҷониби соҳибкор Асадов дар шаҳри Панҷакент корхонаи коркарди қуму шағал ва масолеҳи бетонӣ, соҳибкор Абдурасул Хӯҷаев дар деҳаи Озодагони Ҷамоати деҳоти Халифа Ҳасан сехи коркарди шолӣ, ҳамчунин соҳибкорон А.Худойназаров, Сайрагул Чиллаева, О.Шодмонова сехҳои қаннодӣ, қолинбофӣ ва дӯзандагӣ ба фаъолият шурӯъ карда, даҳҳо нафар сокинони маҳаллӣ бо ҷойи корӣ фаро гирифта шуданд.
Бо маблағгузории соҳибкорон М.Халифаева, Н.Отабоев, Ш.Аҳмадов, Муҳаббат Fаффорова, ҶСК «Шабакаҳои барқии Панҷакент» ва ҶДММ «Боғи тиллоӣ» дар ҳудуди шаҳр ва деҳаҳои Сӯфиён ва Чорбоғ дар маҷмӯъ 10 майдончаи варзишӣ бунёд ва ба истифодаи мардум дода шуданд. Теъдоди умумии иншооти варзишии дар соли равон сохташуда бошад, 16 ададро ташкил дод. Аз ҳисоби маблағҳои соҳибкорон Гулшанбой Наимов, Ш.Аҳмадов дар шаҳри Панҷакент, деҳаи Чинори Ҷамоати деҳоти Чинор ва деҳаи Чорбоғи Ҷамоати деҳоти Косатарош кошонаи ҳусн, сартарошхона, ҳаммом сохта, ба истифода дода шуд.
Инчунин, баҳри бо меваву сабзавоти тару тоза таъмин намудани аҳолӣ соли равон бо маблағгузории соҳибкор Зафар Одилов дар деҳаи Кабудсанги Ҷамоати деҳоти Халифа Хасан гармхона бунёд гардида, парваришу нигоҳубини сабзавоти барвақтӣ роҳандозӣ гардид. Дар раванди бунёдкориҳо аз ҷониби идораи сохтмони шаҳр аз болои «Сойи Зебон» дар кӯчаҳои Деваштич ва Башори Марвазӣ кӯпрук сохта шуд.
Ҳамчунин, давоми соли равон сокинони шаҳри Панҷакент ба истиқболи ҷашни 30-солагии Истиқлолияти давлатии мамлакат боз чандин иншооти хурду бузурги таъиноти иҷтимоӣ, аз қабили нуқтаҳои хизматрасонии автомобилӣ ва таъминоти сӯзишворӣ, дорхона, тӯйхона, Маркази хизматрасонӣ ва савдоро ба истифодаи сокинон супурданд. То ҷашни 30-солагии Истиқлолияти давлатии мамлакат сокинони шаҳри Панҷакент ният доранд, ҷамъ 20 муассисаи таҳсилоти миёна, 30 бунгоҳи тиббӣ, 31 майдончаи варзишӣ тармим ва бунёд намоянд.
Рафоат МӮЪМИНОВА,
«Ҳақиқати Суғд»
Нет комментариев