Имрӯз, 1 декабр рӯзи нахустини фасли зимистон аст. Тибқи баъзе пешгӯиҳо, имсол дар ҷумҳурӣ зимистон сарду тӯлонӣ мешавад. Барои фаҳмидани он ки сокинони Тоҷикистонро зимистони дар пешистода чӣ гуна ҳаво интизор аст, хабарнигори АМИТ «Ховар» Марзия Саидзода бо муовини директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Ҷамила Байдуллоева ҳамсуҳбат гардид.
-Тибқи таҳлилҳои мутахассисони Агентии обуҳавошиносии Тоҷикистон, зимистони солҳои 2021-2022 дар Тоҷикистон ва дар маҷмӯъ минтақаи Осиёи Марказӣ нисбатан гармтар — 1 дараҷа аз меъёр зиёд гарм ва миқдори бориш аз меъёр кам пешгӯӣ карда мешавад. Ҳарорати миёнаи моҳона моҳи декабр дар Тоҷикистон аз меъёр як дараҷа гармтар мебошад. Дар вилояти Хатлон, навоҳии тобеи марказ ва шаҳри Душанбе ҳарорати миёнаи ҳаво моҳи декабр 6-8 дараҷа гарм, вилояти Суғд 3-4 дараҷа гарм, дар кӯҳҳо аз се дараҷа сард то 2 дараҷа гарм, дар Бадахшон 11-16 дараҷа сард пешгӯӣ карда мешавад. Инчунин тибқи таҳлилҳои ҳавошиносон, моҳи декабр дар ҷумҳурӣ фаромадани туман ва вазидани шамолҳои бошиддат дар назар дошта шудааст,-гуфт Ҷамила Байдуллоева.
Дар моҳи январ, ки яке аз моҳҳои сарди зимистон ба шумор меравад, ҳарорат ва бориш дар ҷумҳурӣ дар ҳудуди меъёр мебошад. Дар моҳи январ ҳарорати миёнаи моҳона дар вилояти Хатлон +1+3 дараҷа гарм, Суғд аз 0 то 2 дараҷа гарм, дар кӯҳҳо -2-7 дараҷа сард ва дар баландкӯҳҳои қисмати Бадахшон -16-18 дараҷа сардӣ пешгӯӣ мегардад.
Тибқи иттилои ҳавошиносони кишвар, имрӯз, 1 декабр ҳаво дар ҷумҳурӣ гарму бебориш буда, дар вилояти Хатлон шабона +3+5, рӯзона +16+18, дар Суғд шабона +3+5, рӯзона +11+13 дараҷа гарм мешавад. Ҳаво дар рӯзи аввали фасли зимистон дар Бадахшон шабона -4-2 дараҷа сард ва рӯзона +9+11 дараҷа гарм, дар навоҳии тобеи ҷумҳурӣ ва шаҳри Душанбе шабона +2+4 ва рӯзона +15+17 дараҷа гарм пешгӯӣ карда мешавад.
Манбаъ: АМИТ «Ховар»
Нет комментариев