Ин навбат қаҳрамони маводи мо, ки дар доираи силсиламаводҳои ҷашнӣ ба ифтихори 15-умин солгарди пахши нахустин барномаи Радиои “Тироз” омода ва пешниҳоди Шумо-хонандагони азизу арҷманд мегардад, собиқ Сарвари иҷроиявии ШТРР “Тироз”, шахсе, ки симо ва садояш барои ҳамагон мусаллам аст, Сарвари кулли Ширкати телевизион ва радиои “АЗИЯ” Аъзамхон Акбаров мебошад.
Аъзамхон Акбаров, хуш омадед ба даргоҳе, ки бароятон хеле азизу муқаддас аст.
Саломат бошед. Бисёр хурсандам, ки дар арафаи ҷашнгирии 15-умин мавлуди Радиои дӯстдоштаи ҳамаи мо – Радиои “ТИРОЗ” имкон дорам радиои маҳбуби худро бо ҷашни зодрӯз табрик карда бошам. Гуфтан ҷоиз аст, ки малакаи роҳбарию малакаи эҷодии ман ҳамчун корманди телевизион, ҳамчун корманди радио маҳз дар заминаи Радиои “Тироз” маншаъ гирифтааст ва ман бо тамоми масъулият гуфта метавонам, ки ҳамчун шахси эҷодкор ва ҳамчун шахсе, ки имрӯз яке аз телевизионҳои маҳаллии вилояти Суғдро роҳбарӣ мекунам, обу оташи кори эҷодиро ман дар Радиои “Тироз” гузаштаам ва фахр аз он менамоям, ки ҳоло ҳам бо ин радио ҳамкорӣ дорам ва солҳои 2000 то 2006-ум дар Радиои “Тироз” фаъолият бурдаам.
Гуфтан ҷоиз аст, он дониш ва он малакае, ки мо-гурӯҳи ҷавонони ҳамон вақтҳо дар Радиои “Тироз” таҳти роҳбарии бародари азизи ман Хуршед Азимҷонович Ӯлмасов кор карда, муштоқи кору фаъолият будем. Яъне, барои мо муҳимаш он буд, ки эҷод кунем, баромад кунем, кореро анҷом диҳем, ки обрӯву нуфузи радиои мо боз ҳам бештар шавад. Ва гумон мекунам, ки шунавандагони имрӯзаи радио, он нафароне, ки аз оғози фаъолияти Радиои “Тироз” ин радиоро гӯш мекунанд, дар хотир доранд, ки дар ҳамон солҳо чӣ хел фаъолият мебурдему чӣ хел кори радиоро пеш мебурдем ва чӣ хел барномаҳоро таҳия мекардем. Гумон мекунам, он дастае ки ҳамон солҳо дар радио кор мекарданд, албатта буданд нафароне, ки пеш аз ман ба кор омада буданд ва дар он замоне, ки ман ба кор ба ин радио омада будам ва ба ҳайси директори иҷроиявӣ ва ҳам ба ҳайси продюсер, ҳамон даста як тими сарҷамъе буд, ки вазифаҳо ва нақшаҳои дар пеш гузоштаро бомуваффақона иҷро мекард. Боварии комил дорам, ки дирӯз ва имрӯз ҳам Радиои “Тироз” яке аз маҳбубтарин ва сершунавандатарин радиоҳои вилоят буд, ҳаст ва дар оянда хоҳад монд!
- Оғози солҳои 2000, ҳама Шуморо ҳамчун яке аз ситорагони лигаи КВН—и ҳамонвақта мешинохтанд. Пас тақдир Шуморо чи гуна ба ВАО равона кард?
Медонед, охирҳои солҳои 90-ум ва дар оғози соли 2000-ум дар ҳақиқат дар вилоят, дар шаҳри Хуҷанд равияи КВН бисёр дар пояи мустаҳкам гузошта шуда буд. Мо дар ҳақиқат дар Клуби ҳозирҷавобон ва зарифони Лигаи Хуҷанд баромад мекардем. Яъне, аллакай ҳамон солҳо заминаи эҷодӣ дар асоси КВН дар мо пайдо шуда буд. Воқеан ҳам дар бозиҳое, ки мо дар Лигаи Хуҷандии КВН ташкил мекардем, худи Хуршед Азимҷонович Ӯлмасов ҳам ба ҳайси тамошобин ва ҳам ба ҳайси аъзои ҳакамон иштирок менамуданд ва шояд ҳамон вақтҳо аллакай маро ҳамчун шогирди ояндаи худ ба гуфти хуҷандиҳо “таги чашм” карда бошанд. Фасли гарм – тобистон буд, ҳар дафъае, ки аз кор ба хона бармегаштам, ман аз назди “Грилбари Сайф”, воқеъ дар кӯчаи ба номи Мақсудҷон Танбӯрӣ, аз ҳамон ҷо мегузаштам. Ҳар дафъае, ки мо бо якдигар рӯбарӯ мешудем, саломи гарму ҷӯшон мешуд ва рӯзе аз рӯзҳо Хуршедаком маро ба утоқи кории худ, воқеъ дар ошёнаи дуюми бинои “Грилбари Сайф” даъват намуданд. Ва гуфтанд, ки байни мо имконияти хамкорӣ кардан мавҷуд аст ва гуфтанд, чӣ мешуд, ки Шумо меомадеду дар Радиои “Тироз” бо хам фаъолият мекардему дар радио ҳам худро месанҷидед. Ростӣ ана ҳамин таклифи Хуршедако ба ман хеле писанд омад ва ба худам савол додам, ки барои чи не? Барои он ки кори КВН-ро пеш бурдем дар Маскаву Алмаатову Тошканд, дар Сочӣ баромадҳо карда будем. Шояд ин барои ман боз як имконе буд, ки боз як ҳунари дигар, ҳунари наттоқи радиоро азхуд кунам. Таклифи Хуршедакоро хуш пазируфтам ва пас аз оне, ки ба кор шурӯъ кардам, аввал дар маркази продюсерии “Садо” ба кор оғоз намудам, ба хайси продюсер ва баъдан оҳиста-оҳиста ба кори радио ҳам гузаштам ба ҳайси наттоқ, баъд ба ҳайси продюсер ва ниҳоят фаро расид он лаҳзае, ки роҳбарияти радио ба ман боварӣ карда, ба ман вазифаи директори иҷроиявии радиоро вогузор карданд. Ҳамин тавр, аз оғози солҳои 2000-ум тақдир маро бо Хуршед Азимҷонович ва бо Радиои “Тироз” пайваст.
- Медонем, ки солҳои 2004-2006, Шумо Сарвари иҷроиявии ШТРР «Тироз» будед. Аз ин даргоҳ чӣ омӯхтед ва чӣ хизмате ба он кардед?
Дар масъалаи хизматҳои кардагиам ба гумонам камтар агар худам гӯям, ки ягон кори назаррасеро анҷом додам, дуруст нахоҳад буд. Аммо, дуруст аст, ки ҳамчун сарвари иҷроиявии Радиои “Тироз” кор кардаам. То охири соли 2005 ман дар “Тироз” фаъолият кардам ва ҳамон солҳо дар ҳақиқат кӯшиш мекардем, ки радиои мо — радиои сершунаванда бошад, барномаҳои ҷолиб дошта бошад, қариб, ки охири ҳар ҳафта мо бо ҳайати эҷодӣ ва бо кормандони техникӣ машваратҳо гузаронида, дар фикри он будем, ки боз чӣ гуна барномаҳои шуниданбоб омода кунем ва шунавандагони Радиои “Тироз” бештар гарданд.
Дар оғози сӯҳбат гуфтам, ки заминаи назаррас ва заминаи аввалини роҳбарӣ ва эҷодкорӣ, сухангӯӣ, наттоқиро ман дар Радиои “Тироз” омӯхтам. Яъне, радио заминае буд, майдоне буд, ки ман дар он ҳунару истеъдоди наттоқии худ ва қобилияти роҳбарии худро боз ҳам сайқал додам ва албатта, ин зери роҳбарӣ ва роҳнамоиву маслиҳатҳои муфиди Хуршед Азимҷонович сурат гирифт ва ман дар ҳақиқат қаноатманд аз он ҳастам, ки дар Радиои “Тироз” кор кардам ва имрӯз ба ҳайси роҳбар, ба ҳайси продюсер, ба ҳайси наттоқ низ фаъолияти худро дар Телевизиони “Азия” давом дода истодаам ва ҳамин чизҳоро ман аз ҳамин даргоь, яъне ки аз Радиои “Тироз” омӯхтам ва имрӯз Мактаби бузурги Радиои “Тироз” ба ман хеле ва хеле кӯмаки худро расонида истодааст.
- Чорабиниҳои оммавӣ—фарҳангӣ, ки Шумо дар ҳайати гурӯҳи кории он будед, имрӯзҳо ҳамчун намунаи коркард ва гузаронидани ин намуди намоишҳои тамошобоб қабул шудаанд. Пас чаро имрӯз Шуморо дар ҳайати кории ин намоишҳо намебинем?
Ман имрӯз ҳам бо баргузор намудани чорабиниҳо ва консерту намоишномаҳои оммавию фарҳангӣ машғул шуда истодаам. Дар заминаи телевизиони “Азия” дар тӯли даҳ соле, ки дар он ҷо кор мекунам мо зиёда аз 20 чорабинии оммавию фарҳангӣ ташкил, баргузор ва манзури тамошобинон кардем. Гумон мекунам, он таҷрибае, ки бо ҳамкорӣ бо Хуршед Азимҷонович ҳангоми дар ҳайати корӣ буданамон оид ба ташкили чорабиниҳои оммавию фарҳангии шаҳриву вилоятӣ кор мекардем, ана ҳамон таҷрибаи бузург буд, ки имрӯз бо истифода аз ҳамон корбариҳо бо муваффақият чорабиниҳоро ташкил карда истодаем. Ман гумон намекунам, ки имрӯз дар ҳайати кории ин намоишҳо нестам, намоишҳову чорабиниҳои фарҳангӣ зиёданд ва гумон мекунам, ки дар бахши хусусии ташкили чунин чорабиниҳои оммавию фарҳангӣ мо хеле фаъол ҳастем. Ба гумонам тамошобинони Телевизиони “Азия” ҳам инро пай бурда истодаанд. Шахсан ман дар ҳамон солҳо дар ҳамкорӣ бо Хуршед Азимҷонович бо Барзу Абдураззоқов ва дигар шахсони намоён ҳамкорӣ доштем ва аз онҳо ҳам бисёр чизҳоро омӯхтем. Шояд онҳо ҳам аз мо чизеро омӯхта бошанд. Гумон мекунам, ки ана ҳамин ҷараёне, ки мо дар чорабиниҳо иштирок мекардем, мактаби бузурги таҷрбаи корӣ буд. Хулоса, мо имрӯз дар ин ҷода фаъолияти худро идома дода истодаем.
- ШТР «Азия» — 15-солагии худро таҷлил менамояд. Бисёр суханҳо дар ин мавзӯъ гуфта шуданд. Боз ягон гапи ногуфта ё нав доред?
Дар анҷоми чорабинии солинавиамон, ки бо таҷлили мавлуди 15-солагии Телевизиони “Азия” рост омада буд, дар Кохи фарҳанги Рӯдакӣ ҳамаи суханҳои зарурӣ ва ишораҳои заруриро карда будам. Нафароне, ки имрӯз худро дӯсти телевизиони “Азия” мешуморанд, нафароне, ки ба ман ҳаққи устодӣ доранд, имрӯз ҳам мо ришта ва пайвандҳои дӯстӣ дорем, ҳамин суханонро агар шунида бошанд, хулосаҳои аниқи худро бароварда тавонистанд. Радиои “Тироз”, ки имрӯз 15-солагии худро таҷлил мекунад, бигзор ба синни баланди камолот бирасад. Имрӯз аллакай гуфта метавонем, ки Радиои “Тироз” камолоти худро таҷлил кардаи стодааст. Гумон мекунам, ки майдон барои корбариву барои эҷод бисёр васеъ мебошад. Ҳоло қуллаҳои аз ин ҳам баландтар Радиои “Тироз”-ро интизор ҳастанд.
- Шумо то ба имрӯз якчанд шогирд низ тарбия кардед. Дар вақти худи Шумо шогирд будан, шароит ва устодон чӣ гуна буданд?
Медонед ҳар чи қадар, ки устод серталаб бошад, ҳар чи қадаре, ки вазифаҳо ҳассос бошанд, ҳамон қадар самараи кор, ҳамон қадар муваффақияти кор бештар мешавад, яъне ҳамон солҳо Хуршед Азимҷонович ҳамчун роҳбари “Тироз” аз мо бисёр чизҳоро талаб мекарданд. Мо кормандони ҷавонтар ва ё шогирдон вақте, ки мақсад муайян ва мушаххас аст, онро ба таври қаноатбахш иҷро мекардем ва фарқияти ҳамонвақтаи Радиои “Тироз” ҳам ҳамин буд, ки дар мо вазифагузорӣ бисёр мушаххас буд. Он шароите, ки ҳоло радио дорад, мо надоштем, 15 сол пеш ва имрӯз доштани бисёр таҷҳизоти техникӣ ҳам аз ҷиҳати садо, ҳам аз ҷиҳати персонал гумон мекунам, ки Радиои “Тироз” боз ҳам пештар рафтааст. Ин муваффақияти Радиои “Тироз” аст.
- Хотираҳо аз ҳамкорони Тирозӣ…
Ҳамон вақтҳо дар мо этузиаизми корӣ дар қалбамон мавҷуд буд, яъне, ки ҳама дӯстдошта ва сарсупурдаи кори худ буданд. Ман бо камоли эҳтиром ҳамон нафароне, ки дар он солҳо ҳамроҳ кор мекардем, масалан, Салимҷон Камолов, Қаҳрамонҷон Ахмедов, Маҳмудҷон Мӯъминов, баъдан Пайравҷон Маъсаидов, Юсуфҷон Маюсуфов ва дигарон буданд, ки мо бо ҳам кор кардем.
- Таманниёти Шумо.
Ба таъсисёбиву пахши нахустин барномаи Радиои “Тироз” 15 сол пур шуд. Аз ин лиҳоз, куллии кормандон ва қабл аз ҳама шунавандагони азизу сершуморро бо ҷашни таърихӣ таҳният менамоем. Орзу дорам, ки ҳамеша саломату сарбаланд, некному соадатманд, дар зиндагӣ ва фаъолият муваффақ бошанд! Ҷашни таърихӣ мубораку фархунда бод!
Ташаккур барои мусоҳибаи пурмазмуну муфид, дар симои Шумо, ки солҳои дароз дар ШТРР “Тироз” фаъолият карда будед, кулли ҳамкоронамон ва шунавандагону арҷманду гиромиро сидқан муборакбод намуда, хоҳони некномиву пирӯзӣ ва хонаободиву тансиҳатии Шумо ҳастем!
Ҷашни хуҷастаи 15-умин баҳори бехазону шукуфони Радиои “ТИРОЗ” барои ҳамагон фархунда бод!
Нет комментариев