Дар шаҳри Хуҷанд се соли охир автобусҳои замонавӣ ба мусофиркашонӣ шурӯъ карда буданд. Аммо дар рӯзи корӣ мушоҳида намудем, ки қисми зиёди автобусҳо дар қароргоҳ истодаанд. Ин дар ҳолест, ки сокинон ҳамешагӣ аз норасоии хатсайрҳо ва нақлиёти мусофиркашон дар маркази вилоят шикоят мекунанд.
Чӣ воқеа рух дод?
Охирҳои моҳи июл нишасти матбуотии шӯъбаи нақлиёт ва коммуникатсияи вилоят баргузор гардид. Дар нишаст масъулони назорати ин соҳа иттилоъ доданд, ки имрӯз 90 %-и автобусҳо аз фаъолият бозмондааст. Малик Партобов – муовини сардори Раёсати Хадамоте, ки соҳаи нақлиётро назорат ва танзим менамояд, зимни суханрониаш сабаби асосии аз фаъолият бозмондани автобусҳоро аз корношоям гаштани қисмҳои эҳтиётӣ донист. Акнун барои таъмири нақлиётҳо маблағ намерасад.
Акнун мусофиронро бо чӣ мекашонанд?
Ба омадани автобус ҳаракати микроавтобусҳо, ё ба истилоҳи мардум “маршрутка”-ҳои хусусӣ дар дохили шаҳри Хуҷанд манъ шуда буд. Пас аз он ки автобусҳо яке паи ҳам аз кор бозмонданд, роҳбарияти соҳаи нақлиёти мусофиркашонии шаҳр ба фаъолияти дигарбораи 10 адад хатсайри микроавтобусҳо аз нав иҷозат дод. Аммо ин имтиёз барои микроавтобусҳо мушкилоти хизматрасониҳои мусофиркашониро дар шаҳр пурра ҳал карда наметавонад. Боз ҳам нақлиёти мусофиркашон намерасад. Аз ин ҳолат танҳо мусофирон дар азобанд. Агарчи сокинон пас аз омадани автобус изҳори хушнудӣ доштанд, аммо хурсандияшон дер давом накард ва мушкилӣ аз нав рӯи кор омад.
Автобусҳо корношоям шуд, ё “зери коса нимкоса” аст?
Ҷаҳонгир Мирсалимов –сокини шаҳри Хуҷанд бар он назар аст, ки автобусҳо барои он фаъолияташонро қатъ намудаанд, ки донишҷӯён ба таътил баромадаанду автобусҳо маблағи хуб кор карда наметавонанд.“Қаблан дар автобусҳо ҷои сӯзан задан набуд. Мусофирон ҳатто барои рост истодан ҷой намеёфтанд. Ин барои ронандагон ва худи ширкат мувофиқи хоҳишашон буд. Бар замми он, қисмати асосии мусофиронро донишҷӯён ташкил медоданд. Онҳо, ки рафтанд, ронандагон намехоҳанд, ки бо шумораи мусофирони кам кор кунанд”.
Худи масъулин чӣ назар доранд?
Абдухолиқ Қаҳҳоров – сармуҳандиси Корхонаи давлатии “Нақлиёти мусофиркашон”-и шаҳри Хуҷанд мегӯяд, ки аз моҳи сентябр, вақте донишҷӯён ба маркази вилоят меоянд, автобусҳо дубора фаъолияташонро оғоз мекунанд. Ин нукта бо андешаи Ҷаҳонгир Мирсалимов мувофиқат мекунад, аммо корношоям гуфтани 90%-и автобусҳо то куҷо мантиқӣ аст?
Коршинос: Арзон беиллат намешавад!
Бойпочо Фатҳиддинов собиқадори соҳаи танзими нақлиёт, ки замони Шӯравӣ дар Тоҷикистон Низоми идоракуниии автоматики(АСУ)-и соҳаи нақлиёти мусофиркашу борбарро коркард намудааст, мегӯяд, ки автобусҳои нав дар муддати ду-се сол набояд корношоям гардад. Ин ғайримантиқӣ аст. “ — Қисмҳои эҳтиётӣ ҳамон дам корношоям мегардад, ки агар ба идораи автобус, ё нигоҳдошти ҳолати техникии он хунукназарона муносибат карда шавад. Дар ҳоле, ки ҳама манфиати молиявии худашро фикр мекунад ва дар вақташ қисмҳои эҳтиётиро иваз намекунанд, хоҳу нохоҳ ҳолати техникии автобусҳо бад шуда рафтан мегирад. Дигар тарафи масъала он аст, ки набояд ин тамғаи автобусҳо (ЛИАЗ-5292) харидорӣ карда мешуд. Ширкати “ЛИАЗ” аз нуқтаи назари сифат ба стандартҳои ҷаҳонӣ ҷавобгӯ нест. Ин маркаи автобусҳо барои он харидорӣ карда шуд, ки нархаш нисбатан арзон буд.”
Қариб 27 миллион доллар маблағ муамморо ҳал накард?
Лоиҳаи “Нақлиёти ҷамъиятии шаҳри Хуҷанд” моҳи декабри соли 2015 аз ҷониби Бонки Аврупоии Таҷдид ва Рушд дастгирӣ ёфт. Арзиши умумии лоиҳа 26,84 млн. доллари Иёлоти Муттаҳидаи Амрикоро ташкил медод. Моҳҳои август-сентябри соли 2018 ба шаҳри Хуҷанд 100 адад автобусҳои тамғаи “ЛИАЗ” ворид карда шуд. Имрӯз бошад қариб 90%-и он автобусҳо бо тақдири номуайян дар қароргоҳ истодааст.
ИНФОГРАФИКА: Наздики 27 миллион доллар аз куҷо пайдо шуд?
Дар шаш моҳ 4млн.975ҳазор нафар мусофир кашонида шуд
Мувофиқи маълумоти муассисаҳои тобеъи шӯъбаи нақлиёт ва коммуникатсияи вилояти Суғд дар шаш моҳи соли 2021 аз ҷониби автобусҳои Корхонаи давлатии комуналии “Нақлиёти мусофиркашони шаҳри Хуҷанд” 4 млн. 975 ҳазор нафар мусофир кашонида шудааст. Ин шумораро агар ба 100 автобус тақсим намоем, ба ҳар як автобус наздики 50 ҳазор нафар мусофир рост меояд. Барои шаҳри Хуҷанд, ки маркази маъмурии вилояти Суғд мебошад, ин чандон рақамҳои зиёд ҳам нест. Аммо роҳбарияти ин ниҳод то куҷо омода аст, ки ба саволи асосии “чаро автобусҳо аз кор монда истодаанд?” посухи мушаххас гӯяд?
Ба ҷои охирсухан, хулоса аз шумо аст….
Дар рӯзҳое ки ин мавод таҳия мешуд, сомонаи www.sputnik.tj маводеро ҷой дод, ки ба он ин мавзуъ аз паҳлуи тамоман дигар баҳогузорӣ шудааст…. Ростӣ намедонем, ки ба кадом сухани роҳбарияти соҳаи нақлиёти мусофиркашонӣ бовар кунем. Эҳсос мешавад, ки роҳбарияти ин ниҳод барои пӯшонидани “айбҳои автобус” мушкилиро аз берун меҷӯянд.
Салимҷон Саидов
Нет комментариев