Яке аз бонувони зебо, бонувони дилу дида ва қаламкашони моҳиру суханпарвар Меҳрафрӯз Неъмонзода мебошад.
Меҳрафрӯз сардабири рӯзномаи “Зан ва Мард” аст ва ҳамагон мақолаҳои рангини ӯро ҳар ҳафта сатр ба сатр мутолиа менамоянд. Дар ҳақиқат Меҳрафрӯз ба серкорияш нигоҳ накарда, меҷаҳад, меҷӯяд ва меофарад. Соҳиби оилаи обод ва модари се фарзанди дилҷу аст.
Инак, сӯҳбати мо оғоз мегардад. Мутаваҷҷеҳ бошед!
— Меҳрафрӯзи азиз! Бори дигар аз номи кулли хонандагон хушомадед мегӯем.
— Сарбаланд бошед. Умед мебандам, ки аз мутолиаи сӯҳбати мо муштариёни шумо дилгир нахоҳанд шуд.
Савол: Барои зан модар мушкил нест, ҳам вазифаи роҳбарии як ҷаридаи бонуфузро ба ӯҳда доштану модари се фарзанди хурдсол будан, охир ин ҳама масъулият талаб мекунад?
Ҷавоб: Албатта, ки душвор аст, чун фарзандони ман ҳанӯз хурданд, яке 6 солу дигари 4 сол ва саввуми 2 сол доранд. Аммо аз мушкилиҳо ноумед намешавам ва то ҷон дар бадан дорам барои расидан ба ниятҳои некам, ки хеле зиёданд, кӯшиш мекунам. Ноумеди хоси ман нест ва омодаам ҳамеша ранҷ кашам, аммо оянда муваффақ шавам. “Бе ранҷ ганҷ ба даст намеояд”-гуфтаанд.
Савол: Мехоҳем донем, ки Меҳрафрӯз изҳори муҳаббати як одами оддиро чи гуна қабул медорад? Боварӣ дорам, ки ошиқони ин бонуи зебо кам нестанд?
Ҷавоб: Бале, смс-паёмакҳои ошиқонаро зиёд қабул мекунам ва ҳар лаҳза тавре гуфтам ин ё он нафар дарди дил мекунад, аммо қалби ман аллакай соҳиб дорад. Наметавонам дар он дили кӯчак муҳаббати чанд нафарро ҷой намоям. Ман ҳамеша ошиқам ва ошиқ мемонам, зиндагиро бе муҳаббат ҳатто тасаввур карда наметавонам.
Савол: Ташкил намудани силсилаконсертҳо кори осон нест. Боре дар чунин барномахои консертӣ қарздор шудаед ва агар махфи набошад, ошкоро ҳарф мезадед?
Ҷавоб: Бале, дуруст гуфтед, ки ташкил ва баргузор намудани силсилаконсертҳо осон нест, аммо муҳаббат аст ва ё чизи дигар, ки маро ором намегузорад ва равонаам месозад барои ташкил кардани барномаҳои фарҳангӣ. Худ саньатдӯст ҳастам ва бародарони санъаткор дорам ва дар муҳити саропо савту наво камол ёфтаам, аз ин рӯ, аз қарздор шудан ҳарос надорам ва ноумед намешавам. Тавре гуфтам дилшикастагиву ноумеди хоси ман нест, зеро ман ба ҳар нияте оғоз кунам, ҳатман комёб мешавам. Дар мавриди қарздор шудан ҳаминро гуфтаниям, ки дар як сол, яъне соли 2017 ман 5 барномаи консерти ташкил кардам, ки 2 консерташ бохтан буд. Яъне қарздор шудам. Аз яке 8000 аз дигаре 20 000 сомонӣ буд.
Савол: Хеле шодем, ки аз зиндагиву шебу фарозҳои кориятон ба мо хонандагон қисса мекунед. Чунин як зани хушбахтро дар зиндагӣ чӣ руҳафтода месозад?
Ҷавоб: Ман аслан аз ташвишҳои кориву зиндагӣ эҳсоси хастаги намекунам, чун ҳаёт мубориза аст ва майдон аз далер мегӯянд. Ман ҳамеша бар зидди нокомиву ноҷуриҳо меҷангам ва мубориза мебарам. Аммо як хислати инсонҳо маро руҳафтода месозад, медонед чӣ? Вақте мебинам зане ва ё марде худ ҳунар надорад, истеъдод надорад ва ҳатто ҷасорат надорад ва кӯшиш низ намекунад, вале муваффақияти каси дигарро дида наметавонад, ӯро бадгӯи мекунад, ғайбат менамояд ва тӯҳаташ мезанад,бисер ғамгин мешавам ва ояндаи фарзандони онҳоро норӯшан номаълум ва нохуб тасаввур мекунам.
Савол: Барои Меҳрафрӯз дар зиндагӣ чӣ муҳимтар аст: Пулу мол, бахти оилавӣ ва ё машҳур будан?
Ҷавоб: Барои ҳар инсоне, ки каме фарҳанг дорад, савод дорад ва сиёҳро аз сафед фарқ карда метавонад, фикр мекунам оила дар ҷои аввал меистад. Пулу мол наметавонад инсонро хушбахт созад. Машҳур будан барои ман як зани шавҳардор умуман лозим нест, асос зиндагӣ ва фарзандонам аст. Хандаи онҳо бароям сарват аст обрӯ аст хушбахтӣ аст. Шумо тасаввур карда наметавонед, ки ман чи қадар азобҳоро, пастиҳоро, нокомиҳоро дар зиндагии кӯтоҳам аз сар гузарондам. Агар бароям пул муҳим мебуд сабр пеша намекардам.
Савол: Бо шавҳаратон дӯст дошта оиладор шудед ё шаби тӯй ҳамдигарро дида ошиқи ҳам гаштед?
Ҷавоб: На, мо ҳамдигарро намешинохтем ва муносибату робита низ надоштем. Аз рӯи як аксам ӯ хостгорам шуд ва рӯзи шанбе хостгорон омаданд, шанбеи дигар тӯй шудем. Аммо пеш аз туй мо, албатта вохӯрдем, ман шартҳоямро гузоштам ва ҳунарманд будану набуданамро гуфтам.
Савол: Чи қадар зебоед, ки агар солиёни сол васфатон намоем, кам аст. Оё рост аст, ки байни Меҳрнигори Рустам ва Шумо нофаҳмие пайдо шудааст. То куҷо ин овоза ҳақиқат дорад?
Ҷавоб: Воқеан миёни ману Меҳринигор не, балки модараш як моҷарои кори шуд дар моҳи март, аммо имрӯз бо онҳо мушкиле надорам. Меҳринигорро эҳтиром мекунам, аслан ман қадр мекунам ҳама инсонҳоеро, заҳматкаш ҳастанд.
Савол: Зиндагии як бонуи чираддасту кордон имрӯзҳо чи гуна ҷараён дорад. Боре шудааст, ки андешаи тарки кор ва аз дунёи рӯзнома саркашидан хаёлотатонро олуда гардонида бошад?
Ҷавоб: Бале, пинҳон намекунам, аммо чунин ҳолатҳо як соли ахир зиёд буд. Дар хаёл буд тарки кор не, балки бастани рӯзномаҳоям, аммо дил қабул накард ин хаёлро. Сабабаш ранҷу заҳмати бисёр. Ман ки оиладор ҳастаму фарзандони хурдсол дорам ва дар хонаам касе нест, ки пас аз омадани боғча қабулашон кунад, борҳо баъди сарзанишҳои модарам ва хушдоманам хостам фаъолияти корхонаамро катъ намоям, аммо дилам нашуд. Азобҳои барои расидан ба ин зинаҳо дар пеши чашмам мисли навори филм ҷилванамоӣ мекунанд, пас чи гуна тарк кунам? Бовар дорам, ки фарзандонам калон шуданд, ин монеъаҳо дур мешаванд.
Савол: Меҳрафрӯзҷон боре аз фиреби дӯстонатон дилшикаста гаштаед. Оё хислати зудбовари дар шумо дида мешавад ё на?
Ҷавоб: Бале, вақте ту ба касе бовар мекунӣ, вақте ту роз мегӯи, вақте ту дар пасттарин лаҳза паҳлӯи дӯстат ҳастӣ, аммо ӯ аз касби ту, аз барномаҳои ту ва ё дигар корат суиистифода мекунад, шишаи боварат мешиканад. Ман дили соф дорам, бо ҳама якнавъ муносибат мекунам, инсонҳоро ҷудо намесозам ва дӯстро аз душман фарқ карда наметавонам, яъне зудбоварам.
Савол: Шумо меҳафрӯзандаи дилҳои хонандагони нашрияи “Зан ва Мард” ҳастед. Мехоҳам дар бобати моҷарои байни Шумо ва сароянда Наимҷони Сайдалиро фаҳмам. Ин овозаҳо то куҷо асос доранд? Чун замоне дар ҷое шунида будам, ки худи Шумо гуфтаед, ки Наимҷонро бародари худ медонам ва бародарвор дӯсташ медорам. Магар ба дӯстии Шумо чашм расид?
Ҷавоб: Бояд бигӯям, ки дар касбу кор ва зиндаги нофаҳмиҳо зиёд мешаванд, беҳуда намегӯянд, ки модарро бо духтар ҷанг мешавад. Ману Наимҷон борҳо ҷанҷол кардаем ва охирон моҷарои мо ҳамаро бовар кунонд, ки мо дигар якҷо кор намекунем, аммо Наимҷонро он қадар дӯст медорам хаёлам ӯ меваи умри падару модарам аст. Ӯ низ маро эҳтиром мекунад ва агар дар Душанбе бошад бе ман ошхӯрӣ намеравад. (Механдад).
Савол: Меҳрафрӯз ҳар либосе, ки ба бар менамояд, шинаму зебо ва диққатҷалбкунанда аст. Дизайнери либосҳои Шумо ки аст?
Ҷавоб: Ман то зинае нарасидаам, ки дӯзандаи махсус ва дизайнери худро дошта бошам. Чун ман як зиндагии одди дорам, ки натиҷаи меҳнатам ҳамаги барои худаму кӯдаконам ба зӯр мерасад. Аксари куртаҳомро худам медӯзам, апаҳоям медӯзанд ва ҳар чизе бар бар мекунам интихоби худам аст.
Савол: Агар бори дуюм аз модар ба дунё меомадед, чи касбро пеша мекардед?
Ҷавоб: Албатта, ки рӯзноманигор.
Савол: Меҳрафрӯз сароянда мешудед, ҳоло дар қатори Шабнами Сурайё ва Зулайхо Маҳмадшоева мешинохтанд. Боре дар пешаи овозхонӣ хунари худро санҷидаед?
Ҷавоб: Ба хотири обрӯ ва машҳур шудан ҳаргиз ба коре, ки дилам намекашад, даст намезанам. Ҳарчанд ду бародари овозхон дорам ва дар оилаи мо интихоби касб ва ҳамсар ба худи инсон вогузор аст, аммо касбам касби орзуҳои кӯдакиям аст.
Савол: Дӯстони Меҳрафруз бо тоифаи мардон зиёдтар аст ё бо занон? Дар чанд ташкили консертҳоятон мушоҳида намудаам, ки дар паҳлӯятон аз ҷинси мард зиёдтар ба чашм мерасанд.
Ҷавоб: Бале, дуруст қайд кардед, ки паҳлӯям мардон зиёданд ва аксари дӯстонам мардҳо ҳастанд, чун он корҳоеро ки ман анҷом медиҳам кам занҳо метавонанд ба мушкилиҳояшон тоб оранд.
Савол: Номи фарзандони Шумо?
Ҷавоб: Муниса, Анис ва Ворис
Савол: Аз чӣ метарсед?
Ҷавоб: Аз касеву аз чизе ҳарос надорам ва ба касе имкон намедиҳам, ки маро шикаст бидиҳад. Аммо аз Худо метарсам.
Меҳрафрӯзбонуи азиз! Итминони комил дорем, ки сӯҳбати гарму самимии Шумо боиси хушнудии хонандагонамон гашт. Хеле миннатдорем аз ин сӯҳбати ошкоро. Ҳамеша муваффақ ва азизи хонандагон бимонед!
Нет комментариев