Ҳамасола панҷшанбеи дуюми моҳи октябр Рӯзи байналмилалии биноӣ ҷашн гирифта мешавад. Ин рӯз аз ҷониби Созмони ҷаҳонии тандурустӣ эълон шуда, мақсад аз он ҷалби таваҷҷуҳи ҷомеаи ҷаҳонӣ ба мушкилоти нобиноӣ, вайроншавии биниш ва сафедшавии қувваи босираи одамон мебошад.
Сабабҳои аслии бемориҳои чашмро табибон ба риоя накардани гигиенаи босира, сироятҳо, осебҳо ва истифодаи аз меъёр зиёди воситаҳои техникӣ (компютер, телевизор, телефонҳои мобилӣ) вобаста медонанд.
Тавре дар суҳбат бо хабарнигори АМИТ «Ховар» духтури бемориҳои чашм Дилбар Мирзоева изҳор дошт, ҳоло гирифторони бемории чашм ниҳоят зиёд буда, миёни кӯдакон низ бисёр ба назар мерасанд.
«Имрӯз мо дар асри технологияҳои компютерӣ, суръатҳои кайҳонӣ, муҳит ва авзои номусоиди экологӣ умр ба сар мебарем, ки ин ҳама ба биноиши чашмони мо таъсири манфӣ мерасонанд»,- хотиррасон намуд табиб.
Имрӯз бештари табобат ва барқарор намудани бемориҳои чашм аз худи инсон вобаста аст. Бояд ҳар нафар дар ҳолати гирифтор шудан ба ин беморӣ сари вақт ба духтур муроҷиат намояд. Бемориҳои пардаи чашм, хуншории дохили чашм, наздикбинӣ, дурбинӣ, дурбинии синну солӣ, бемориҳои илтиҳобии чашм ва баъзе оризаҳое, ки аз бемориҳои диабети қанд вобастагӣ доранд, аз ҷумлаи бемориҳое маҳсуб мешаванд, ки дар ҳолати сари вақт ба духтур муроҷиат намудан метавон биноии чашмро барқарор намуд. Аз ин рӯ табибон тавсия медиҳанд, ки ҳар инсон бояд дар як сол на камтар аз ду — се маротиба аз ташхиси духтури чашм гузарад.
Никоҳи хешу таборӣ метавонад яке аз омилҳои бо нуқсони чашм таваллуд шудани кӯдак гардад. Яке аз сабабҳои нуқсони модарзодии чашм, ба монанди бемориҳои оби марворид бештар дар ҳолати никоҳи хешутаборӣ ба амал меояд. Нарасидани витаминҳои А ва Е низ сабаби камшавии нури чашм шуда метавонад. Аз ин рӯ, ба нафарони биноии чашмашон суст истеъмоли меваҳои дорои ранги зард, гӯшт, равғани моҳӣ ва ҷигар тавсия дода мешавад.
Ҳоло дар Ҷумҳурии Тоҷикистон барои табобати бемориҳои чашм ва барқарор кардани биноӣ тамоми шароит фароҳам оварда шудааст. Бо ворид шудани беҳтарин таҷҳизоти муосир, амсоли визометрия, авторефкератометрия, ретиноскопия, биомикроскопия, танометрия ва линзметрия кори табибон осон гардида, беморон метавонанд акнун на танҳо дар хориҷ аз мамлакат, балки дар дохили Тоҷикистон чашмони худро ташхису табобат ва ҷарроҳӣ кунанд.
Мувофиқи маълумоти Агентии байналмилалии пешгирии нобиноӣ, дар ҷаҳон тақрибан 253 миллион нафар мушкили биноӣ дошта, аз ин 36 миллион тамоман дида наметавонанд. Гуфта мешавад, ки 82% одамони дорои нуқсони биниш нафароне ҳастанд, ки синнашон аз 50 боло мебошад.
Чашм аз узвҳои асосии инсон буда, 80-90 фоизи маълумоти атрофро қабул мекунад. Нафароне, ки пайваста бо компютер кор мекунанд, бояд реҷаи кориро риоя кунанд ва барои паст нашудани биноии чашм пайваста аз назорати табибон гузаранд. Инчунин ҳангоми кор бо компютер ҳар нафар бояд аз айнакҳои махсус истифода барад, то нурҳои электромагнитие, ки аз компютер пош мехӯранд, ба чашми онҳо зарар нарасонанд.
Манбаъ: АМИТ Ховар
Нет комментариев