Мақомоти иҷроияи ҳокимияти давлатии ноҳияи Бобоҷон Ғафуров бо мақсади эҳёи ҳунарҳои миллии ниёгон, бо ҷойи кор таъмин намудани ҳунармандон ва бонувону духтарон, рушди ҳунарҳои дастӣ ва меҳнати хонагӣ имсол гранти раиси нохия дар ҳаҷми 200 000 сомонӣ таъсис дода мешавад.
Дар ин бора хадамоти матбуоти раиси ноҳия дар такя ба суханронии раиси ноҳия Зариф Назирӣ дар маросими намоишгоҳи ҳунарҳои миллии ниёгон, ки дар ҷамоати Хистеварз баргузор гардид, иттилоъ дод.
“Мақомоти иҷроияи ҳокимияти давлатии ноҳия баҳри дастгирии Шумо ҳунармандон омода аст, ҳамаи имкониятҳои мавҷударо истифода намояд то ин, ки ҳамаи қишрҳои ҷомеа аз иқдоми неки Пешвои миллат дар самти рушди ҳунарҳои миллӣ бархурдор бошад.
Гранти мақомоти иҷроияи ҳокимияти давлатии ноҳия дар ду марҳила ҷудо карда шуда, ҳунармандон метавонанд аз он бархурдор бошанд ва лоиҳаҳои худро пешниҳод созанд”, — гуфтааст Зариф Назирӣ.
Тибқи иттилои масъулин ҳоло дар ҳудуди ноҳия зиёда аз 50 навъи ҳунарҳои мардумӣ рушд мекунад ва беш аз ҳафт ҳазор нафар бо ҳунармандӣ машғул ҳастанд.
Яке аз ҳунарҳои милли ин дӯзандаги мебошад. Дӯзандагӣ- ҳунарест, ки аз матоъ либос, чизҳои рӯзгорро ва дигар маснуоти заруриро вобаста ба таъиноти он дар шаклаш барои истифода медӯзанд. Аввал ин ҳунар танҳо бо даст иҷро мешуд. Дар садсолаҳои охир инчунин бо мошини дарздузӣ ин ҳунарро иҷро мекунанд.
Асоси дӯзандагиро дарз ва кӯк ташкил медиҳанд. Намудҳои асосии кӯки дастӣ инҳоянд: кӯки калон, кӯки нусхагирӣ, дарзи печон, дарзи қаткунӣ, ҳалқагӣ, лагандагии уреб, дарзи лаб-лаби канор, дарзи мошинӣ, дарзи паси сӯзан, яккакӯк, дарзи харак, дарзи арча”, дарзи секунҷа ва ғайра.
Дар ҳунари дӯзандагӣ аз мошин хеле васеъ истифода мебаранд. Намудҳои асосии дарзҳои мошинӣ: оддӣ, дукарата, изофадӯхт, домандӯхт, дарзи ҷудо-ҷудо, дарзи болоиҳам, дарзи бахиядӯзӣ, канорӣ, барҷаста, борик, инчунин ангула (ангулаи бахияшуда, ангулаи дарзӣ (кӯкзада), аз таноби дӯхта).
Медиапортали «Тироз»
Нет комментариев