Дар маҷлисгоҳи Мақомоти иҷроияи ҳокимияти давлатии вилоят таҳти раёсати Раиси вилояти Суғд, Раиси Маҷлиси вакилони халқи вилоят Раҷаббой Аҳмадзода ва бо иштироки муовинони Раиси вилоят, раисони шаҳру навоҳӣ, шаҳраку деҳот, роҳбарони ташкилоту муассисаҳои вилоятӣ, сохторҳои ҳифзи ҳуқуқ, фаъолони вилоят ва дигар шахсони дахлдор иҷлосияи шонздаҳуми Маҷлиси вакилони халқи вилояти Суғд, даъвати панҷум доир гардид.
Иҷлосия бо садо додани Суруди миллӣ ба кори худ оғоз намуд ва дар он 6 масъала мавриди баррасии вакилони халқ қарор гирифт.
Аз рӯи масъалаи якум оид ба рафти иҷрои қарори Ҳукумати Ҷумҳурии Тоҷикистон за 31 августи соли 2012, №450 «Дар бораи тасдиқи Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020» муовини Раиси вилоят, вакил аз ҳавзаи интихоботии «Исфисор», №62 Хоҷазода Ориф Ашурӣ маъруза намуд.
Аз ҷумла, мавсуф зикр дошт, ки дар партави сиёсати хирадмандона ва дастгирию ғамхориҳои ҳамешагии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси вилоят Раҷаббой Аҳмадзода дар вилоят баҳри рушди босуботи соҳаҳои мухталифи иқтисодиву иҷтимоӣ ва некӯаҳволии мардум, инчунин амалисозии Барномаҳои давлатӣ ва дастуру супоришҳои гузошташуда тадбирҳои саривақтӣ андешида мешаванд.
Боиси таъкид аст, ки дар самти истифодаи самаранок ва оқилонаи замин дар миқёси ҷумҳурӣ як қатор барномаҳои мақсадноки давлатӣ, аз ҷумла Барномаҳои рушди соҳаи боғу токпарварӣ, тухмипарварӣ, картошкапарварӣ ва ғайра қабул гардида, дар сатҳи вилоят бобати татбиқи он қарорҳои дахлдор қабул ва аз ҷониби мақомоти иҷроияи ҳокимияти давлатии шаҳру ноҳияҳо амалӣ шуда истодаанд. Ба тасвиб расидани қарори Ҳукумати Ҷумҳурии Тоҷикистон аз 31 августи соли 2012, №450 «Дар бораи тасдиқи Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020” дар амалисозии ин раванд мусоидат менамояд.
Мувофиқи барномаи мазкур дар миқёси вилоят давоми солҳои 2012 — 2020 азхудкунии 940 гектар заминҳои нави кишоварзӣ пешбинӣ гардидааст.
Тибқи маълумоти пешниҳод намудаи Раёсати беҳдошти замин ва обёрӣ дар вилоят тайи солҳои 2012-2018 ҳамагӣ дар масоҳати 3219 гектар заминҳои нав азхуд гардида, мавриди истифодаи кишоварзӣ қарор дода шудааст.
Мувофиқи Барномаи давлатии азхудкунии заминҳои нави обёришаванда ва барқарорсозии заминҳои аз гардиши кишоварзӣ берунмонда дар Ҷумҳурии Тоҷикистон барои солҳои 2012-2020 дар миқёси вилоят дар солҳои 2012-2020 барқарорсозии 1400 гектар заминҳои аз гардиши кишоварзӣ берунмонда пешбинӣ шудааст. Аз он ҷумла, дар ноҳияҳои Бобоҷон Ғафуров 500 гектар, Мастчоҳ 400 гектар ва Зафаробод 500 гектарро ташкил медиҳад.
Дар натиҷаи ба роҳ мондани фаъолияти пурсамар тибқи маълумоти Раёсати беҳдошти замин ва обёрӣ дар вилоят аз соли 2012 то ба имрӯз ҳамагӣ дар масоҳати 9850 гектар замин ба гардиши кишоварзӣ ворид карда шудааст.
Муовини Раиси вилоят дар маърӯзаи хеш қайд намуд, ки тибқи нақша давоми солҳои 2016-2020 ба гардиши кишоварзӣ ворид кардани 6753 гектар замини боир (партов) пешбинӣ гардида, тибқи он чораҳои зарурӣ андешида мешавад. Танҳо давоми 9 моҳи соли 2018-ум дар масоҳати 468 гектар замини боир ба гардиши кишоварзӣ ворид шуда бошад ҳам мутаассифона, дар шаҳру ноҳияҳои Деваштич, Истаравшан, Мастчоҳ, Спитамен ва Ҷаббор Расулов нисбат ба иҷрои нақшаи тасдиқ гардида, умуман чораҷӯӣ карда нашудааст.
Воқеан ҳам яке аз роҳҳои беҳтар гардонидани вазъи некӯаҳволии мардуми кишвар ва фаровонии маҳсулот, ин самараноку оқилона истифода бурдани заминҳои кишоварзӣ маҳсуб меёбад.
Дар робита ба ин, бо таваҷҷуҳ ва дастгириҳои пайвастаи Раиси вилоят давоми се соли охир ҷудо гардидани наздик 12 миллиону 100 ҳазор сомонӣ, аз ҷумла дар соли 2018-ум 3 миллиону 950 ҳазор сомонӣ маблағ барои беҳтар кардани ҳолати мелиоративии замин, барои омодасозии пойгоҳҳо ва иншоотҳои обрасонии шаҳру ноҳияҳои Ашт, Зафаробод, Мастчоҳ, Панҷакент ва Муассисаи давлатии канали «Хоҷабоқирғон», ки солҳои зиёд аз ҳисоби истифодаи тӯлонӣ ба таъмири куллӣ ниёз дошт, мусоидат намуд.
Дар заминаи дастуру супоришҳои Раиси вилоят дар Ҷамоати деҳоти Равшани ноҳияи Зафаробод 20 чоҳи амудӣ кофта, барои беҳтар намудани таъминоти оби полезии зиёда аз 540 гектар заминҳои 36 хоҷагии деҳқонии поёндасти канали ТМ-2 мавриди истифодабардорӣ қарор дода шуд.
Дар доираи сафари кориашон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳои вилояти Суғд санаи 29 марти соли равон ба фаъолияти пойгоҳҳои обкашии “Қизилӣ — 1, 2, 3 ва 4” расман оғоз бахшиданд. Ба фаъолият оғоз намудани пойгоҳҳои мазкур, дар хусуси саривақт таъмин кардани замини мавзеи Қизилии шаҳри Истаравшан ва ноҳияи Деваштич бо оби полезӣ такони ҷиддӣ бахшид.
— Таҳлилҳо нишон медиҳанд, ки фаъолияти силсилаи пойгоҳҳои обкашии ноҳияҳои Зафаробод, Мастчоҳ, Ашт, Бобоҷон Ғафуров, Ҷаббор Расулов, Спитамен, Панҷакент, ки аҳамияти стратегӣ доранд, боиси нигаронӣ мебошанд. Умуман, вазъи баамаломада зарурияти азнавбарқарорсозии системаҳои ирригатсионӣ ва мелиоративӣ, таъмири биноҳои пойгоҳҳои обкашӣ, иваз намудани агрегатҳои обкашӣ, барқарорсозӣ ва афзоиши қобилияти обгузаронии каналҳо, тоза кардан ва таъмири обанборҳо, таъмири асосии лӯлаҳои обгузарро ба миён овардааст, — таъкид дошт Хоҷазода Ориф Ашӯрӣ.
Раиси вилоят Раҷаббой Аҳмадзода аз мутасаддиён сабабҳои аз гардиши кишоварзӣ берун мондани заминҳои кишоварзиро пурсон шуда, бобати иҷрои босифати Барнома, сарфаи оби полезӣ, маданияти истифодаи самараноки замин, ҳавасманд намудани соҳибкорон ва кишоварзон ба масъулон дастуру ҳидоятҳои амиқ дод.
— Ба обу замин муносибати дилсӯзона мебояд! — гуфт Раҷаббой Аҳмадзода. — Дар шаҳру навоҳии вилоят барои обёрии саривақтӣ имкониятҳо мавҷуданд. Боиси таассуф аст, ки бархе масъулон, аз ҷумла баъзе раисони ҷамоатҳо дар ин самт хунукназарӣ менамоянд. Чунончӣ, дар ин давр ба 163 қарори раисони шаҳру ноҳияҳои вилоят, ки вобаста ба истифодаи замин мебошанд, эътироз оварда шудааст.
Раҷаббой Аҳмадзода ҳамзамон, ба масъулони соҳаи кишоварзии вилоят бобати самаранок истифода намудани ҷангалзорҳо ва чарогоҳҳо супоришҳои мушаххас дод.
Қарор карда шуд, ки масъулони Кумитаи идораи замини вилоят, Раёсати беҳдошти замин ва обёрии вилоят ва раисони шаҳру ноҳияҳо барои ба гардиши кишоварзӣ ворид кардани 3249 гектар, аз ҷумла 3119 гектар замини корами обӣ, ки соли равон аз гардиши кишоварзӣ берун мондааст, чораҳои заруриро роҳандозӣ намоянд.
Дар иҷлосия вакилон аз ҳавзаи интихоботии «Ғончӣ», №45 Фирӯза Солиева, аз ҳавзаи интихоботии «Оббурдон», №52, раиси ноҳияи Мастчоҳ Ғайрат Азиззода, аз ҳавзаи интихоботии “Пахтакор”, №50, раиси ноҳияи Зафаробод Ашӯрзода Раҷаб Рӯзӣ ва раиси шаҳри Панҷакент Шафеиён Ислом Зиёзода ба сухан баромада, доир ба корҳои бафарҷомрасида дар самти истифодаи самараноки замин ва беҳтар намудани ҳолати мелиоративии замин, таъмини мардум бо маҳсулоти хушсифати кишоварзӣ ва ислоҳи камбудиҳои ҷойдошта фикру андешаҳои худро баён доштанд.
Роҷеъ ба фаъолияти комиссияи доимии Маҷлиси вакилони халқи вилоят оид ба масъалаҳои сохтмон, саноат, нақлиёту алоқа, хоҷагии роҳ ва хоҷагии рифоҳӣ раиси комиссия, вакил аз ҳавзаи интихоботии “Навобод”, № 14 Дилшод Расулзода гузориш пешниҳод намуд ва ҳамзамон, вакили Маҷлиси вакилони халқи вилоят аз ҳавзаи интихоботии «Дӯстӣ», №44 Шӯҳрат Мамадҷонов оид ба иҷрои ваколати вакилиаш ҳисобот дод.
Вакилони иҷлосия масъалаи “Дар бораи ворид намудани тағйиру иловаҳо ба буҷети вилоятӣ барои соли 2018” – ро низ баррасӣ ва тасдиқ намуданд.
Муовини Раиси вилоят Назира Ғаффорӣ оид ба номгузории объектҳои физикию ҷуғрофӣ, аз ҷумла дар ноҳияҳои Ашт ва Ҷаббор Расулов маълумот дод ва вакилони халқ пешниҳодро тасдиқ намуданд.
Дар иҷлосия ҳамчунин, як қатор қарорҳои Раиси вилояти Суғд тасдиқ гардид.
Дар иҷлосияи шонздаҳуми Маҷлиси вакилони халқи вилоят, даъвати панҷум Раиси вилоят Раҷаббой Аҳмадзода сухан ронда, роҷеъ ба татбиқи дастуру ҳидоят-ҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳарф зад. Раиси вилоят, бахусус масъулонро бобати таъмини супоришҳое, ки дар Маҷлиси навбатии Ҳукумати Ҷумҳурии Тоҷикистон санаи 24 сентябри соли равон ҷиҳати омодагии соҳаҳои иқтисодиву иҷтимоӣ ба давраи зимистони солҳои 2018 – 2019 баён гардиданд, вазифадор намуд.
Ҳамзамон, Раиси вилоят ба масъулон дастур дод, ки бобати захираи маҳсулоти кишоварзӣ дар сардхонаҳо, ҷамъоварии беталафи ҳосили бо ранҷ парваридаи деҳқон, бахусус пахта, иҷрои сифатноки нақшаи буҷети давлатӣ, вусъати тоза бахшидан ба бунёди иншооти истеҳсолӣ ва иҷтимоӣ, пешгирии амалҳои номатлуб, аз қабили гаравидани ҷавонону наврасон ба гурӯҳҳои ифротӣ ва террористӣ ва ҳифзу густариши дастовардҳои даврони соҳибистиқлолӣ пайваста тадбирҳои амиқ роҳандозӣ намоянд.
— Ҷашни муқаддаси 30 – солагии Истиқлолияти давлатии Ҷумҳурии Тоҷикистон ҳар як фарди ватандӯстро водор месозад, ки дар ободиву пешрафти кишвари азизи худ бо меҳнати шоиста, иқдомҳои наҷиб ва корҳои ободониву созандагӣ саҳми шоиста гузорад, — зикр дошт дар фарҷоми иҷлосия Раиси вилоят.
Манбаъ: Хадамоти матбуоти Раиси вилояти Суғд
Нет комментариев