Мақомоти иҷроияи ҳокимияти давлатии шаҳри Норак дар рӯзи якуми гусели наваскарон ба сафи Қувваҳои Мусаллаҳи Ҷумҳурии Тоҷикистон бо баргузории маъракаи тантанавӣ 28 нафар ҷавононро барои хизмат ба Ватан сафарбар намуданд. Дар ин кор бахусус занону модарони шаҳр саҳми калон гузоштанд. Дар ин бора мудири шуъбаи рушди иҷтимоӣ ва робита бо ҷомеаи шаҳри Норак Ҳабиба Сафарова ба хабарнигори АМИТ «Ховар» иттилоъ дод.
Раиси ҲХДТ дар шаҳри Норак Қумринисо Гулмуродзода иброз дошт, ки модари яке аз ин аскарон зимни маъракаи гусел баён дошт, ки «роҳнамоӣ ва гусели фарзандон ба сафи Қувваҳои мусаллаҳи ҷумҳурӣ вазифаи муҳимтарини ҳар як модар мебошад. Мақсад аз даъвати ҷавонон ба хизмати ҳарбӣ ҳимояи марзу буми ватан ва баланд бардоштани донишу малакаи низомии ҷавонон мебошад. Зеро хизмат ба Ватан-хизмат ба модар, ба пайвандони худашон аст. Аз ин хотир ҷавононро зарур аст, ки аз хизмат дар сафи Қувваҳои мусаллаҳ худро канор нагиранд ва ба қадри тинҷию оромии мамлакат ва пешрафти вазъи иқтисодии ҷумҳурӣ расида, ватани азизамонро дӯст доранд».
Тибқи иттилои масъулин, аз 28 нафар ҷавонони сафарбаргардида 20 нафари онҳо ҳамчун ронанда ба хизмат шомил гардиданд.
Хизмат дар сафи Қувваҳои Мусаллаҳ вазифаи муҳими ҳар як ҷавони бонангу номус мебошад. Мақсад аз даъвати ҷавонон ба хизмати ҳарбӣ- пурзӯр намудани иқтидори мудофиавии мамлакат, ҳимояи марзу буми Тоҷикистон ва баланд бардоштани донишу малакаи низомии ҷавонон аст. Барои ҳамин, онҳоро зарур аст, ки аз хизмат дар сафи Қувваҳои Мусаллаҳ худро канор нагиранд, ба қадри неъматҳои мавҷуда, тинҷию оромӣ ва шукуфонии мамлакат расанд.
Манбаъ: АМИТ «Ховар»
Нет комментариев