Дар наҳорӣ бештар чӣ истеъмол мекунем, албатта ҳар гуна шириниву хӯришҳои лазиз. Аммо истеъмоли шириниро, ки ба мардуми мо одат шудааст, бахусус дар наҳорӣ тановул кунанд, бе каҳва ё чой тасаввур карда намешавад. Дар бахши имрӯза оид ба интихоби «Ҳалво»-и аълосифат маълумот медиҳем.
Дар таркиби ҳалво қанд, ширингализ ва зироатҳои равғанӣ бояд бошад. Ба намуди зоҳирии ҳалво диққат диҳед. Ҳалво бояд қабат-қабат бошаду каме нам. Ҳангоми буридан ва ё ба даст гирифтан набояд майда-майда шавад. Агар ҳалво равғанин бошад ин аз вайрон кардани ҷараёни технологӣ ҳангоми истеҳсол ва ё нигоҳдории бисёр шаҳодат медиҳад. Оид ба вайрон кардани ҷараёни технологӣ ҳангоми истеҳсол боз аз он фаҳмидан мумкин аст, ки ҳангоми шикаста ва ё буридан шираи карамели сафед ҷудо мешавад. Глазури шоколадӣ низ бояд якхела ва ҳамвор пӯшида шуда бошад ва ягон чиз ва ё хат дида нашавад. Ҳалвое, ки аз офтобпараст тайёр карда мешавад, дар таркибаш пӯчоқи донаи офтобпараст дорад, ки ҳангоми истеҳсол он ба пуррагӣ ихроҷ карда намешавад. Ҳалвое, ки аз чормағзи заминӣ ё арахис тайёр карда мешавад, дар таркибаш афлатоксин дорад, ки коршиносон онро ба заҳр баробар медонанд. Аз ҳама ҳалвои фоиданок ва хушхур ин ҳалвое ҳисоб меёбад, ки аз кунчит ва тахин истеҳсол мешаванд. Дар таркиби онҳо витамини Е (ки инро витамини ҷавонӣ мегӯянд) ва амега-кислота зиёд мебошад. Ҳамчунин аз хотир фаромӯш накунед, ки пурхӯрии ҳалво низ зарарӣ зиёд дорад.
Нет комментариев