Шуруъ аз 3-юми август дарсҳо барои синфҳои 1-ум дар муассисаҳои таҳсилоти миёнаи умумии кишвар оғоз гардид. Тибқи супориши Ҳукумати Тоҷикистон, Вазорати маориф ва илми ҶТ барномаи якмоҳаро таҳти унвони «Омодагӣ ба мактаб» таҳия намуд. Мақсад аз таҳияи барнома омода намудани кӯдакони 6-7 сола ба мактаб мебошад. Ба гуфтаи масъулини Вазорати маориф ва илми ҶТ сабаби асосии таҳсили як моҳ қаблии хонандагони синфҳои якум омода набудани бархе аз кӯдакон ба таълим мебошад. Ҳарчанд дар кишвар сол то сол шумораи муассисаҳои томактабии ҳам давлатӣ ва ҳам хусусӣ бештар шуда бошад ҳам, онҳо тамоми кӯдаконро фаро гирифта наметавонанд. Бинобар ин вазорат тасмим гирифт барномаеро таҳия намояд, ки кӯдакони синни мактабиро дар муддати як моҳ ба мактаб омода созад. Тавре ки Маҳбуба Одинаева муаллимаи синфҳои ибтидоии муассисаи таҳсилоти миёнаи умумии 1-уми пойтахт гуфт: «Ин барномаи таълимӣ барои омада намудани кӯдакон ба мактаб, шиносоии онҳо бо муҳити барои онҳо нав, озодона муошират кардан бо ҳамсолон ва рафтор дар мактабро дар бар мегирад». «Вазифаи мо омӯзгорон дар муддати як моҳ баланд бардоштани сатҳи ҷисмонӣ ва ақлонии кӯдакон, ташаккули тасаввурот оид ба муҳити атроф, инкишофи нутқ ва ғайра мебошад. Мо аз рӯйи барномаи тайёр тӯли ин як моҳ дарсҳоро ба роҳ хоҳем монд. Миқдори машғулиятҳо ба нақша гирифта шуда, аз шиносоӣ бо муҳити атроф, санъати тасвирӣ, тарбияи ҷисмонӣ, мусиқӣ иборат мебошад. Мо зимни бозиҳои шавқовар хонандагонро бо ҳарфу рақамҳо низ шинос хоҳем кард»,- гуфт ҳамсӯҳбати мо. Ба андешаи М.Одинаева чунин навъи таълим барои кӯдаконе, ки ба боғча нарафтаанд, хуб аст. Зеро дар тӯли ин як моҳ кӯдак вақт пайдо мекунад дар муҳити озод бо омӯзгор ва ҳамсинфон шинос гардида, дар бораи мактаб тасаввурот пайдо кунад.
Дар ин бора jahonnamo.tj
Нет комментариев