Раиси вилояти Суғд Абдураҳмон Қодирӣ ба ноҳияи Бобоҷон Ғафуров сафари корӣ анҷом дод.
Зимни ин сафар Раиси вилоят нахуст дар маросими ифтитоҳи бозори навбунёди «Ваҳдат», ки дар шафати шоҳроҳи Хуҷанд – Ғафуров ҷойгир шудааст, иштирок намуд.
Гуфтанист, ки яке аз ҳадафҳои сиёсати иқтисодии Ҳукумати мамлакат фароҳам овардани шароит барои соҳибкории хурду миёна, фурӯши озоди маҳсулот ва бо ин васила таъмини рушди иқтисодиёт ва муҳайё намудани ҷои корӣ мебошад, ки дар ин самт корҳои назаррасе ба сомон расонида мешаванд.
Ифтитоҳи бозори навбунёди «Ваҳдат», ки дар масоҳати 3,8 гектар доман паҳн кардааст, худ гувоҳи он аст, ки дар кишвар барои фурӯши маҳсулоти коргоҳҳои саноатию кишоварзӣ таваҷҷӯҳи махсус зоҳир карда мешавад.
Чуноне иттилоъ дода шуд, дар ин бозори навбунёд, ки он аз тарафи ҶСП «Фароз» бунёд шудааст, 130 мағозаи фурӯши масолеҳи сохтмонӣ, 300 нуқтаҳои фурӯши маводи сохтмонӣ, бинои маъмурии дуошёна, 2 ошхонаи замонавӣ, коргоҳи кафшергарӣ, нуқтаи фурӯши сӯзишворӣ, нуқтаи ташхиси техникиву таваққуфгоҳ мавҷуд буда, барои роҳандозӣ намудани фаъолияти шаффоф 58 камераҳои назоратӣ насб шудааст.
Ҳамчунин барои хизматрасонии хуб барои аҳолӣ дар ҳудуди бозор утоқҳои хизматрасонии БДА «Амонатбонк», Раёсати ҳифзи муҳити зисти вилоят, Раёсати Агентии суғуртаи иҷтимоӣ ва нафақа таъсис ёфтааст, ки бо усули «Равзанаи ягона» фаъолият мебаранд.
Ба иттилои масъулон дар ҳолати пурра ба фаъолият пардохтани бозори навбунёди «Ваҳдат» беш аз 1 000 нафар шаҳрвандон бо ҷои кори доимии дорои шароити мусоид таъмин мешаванд.
Абдураҳмон Қодирӣ зимни боздид аз ҳудуди бозори навбунёди «Ваҳдат» ва мулоқот бо тоҷирону соҳибкорон изҳори боварӣ намуд, ки кормандон ва фурӯшандагони бозори нав барои ба мардум пешниҳод намудани молҳои аълосифат ва ҷавобгӯ ба талаботи байналмилалӣ, хусусан маҳсулоти ватанӣ саҳми назарраси худро мегузоранд.
Дар ин бора sugd.tj хабар медиҳад.
Нет комментариев