Дар асоси пешниҳоди Раёсати корҳои илмӣ-тадқиқотии Донишгоҳи давлатии Хуҷанд ба номи академик Бобоҷон Ғафуров бо мақсади пешбурди ҳамаҷонибаи илм дар донишгоҳ, ба корҳои муҳиму бунёдии соҳаҳои гуногуни маърифат ҷалб намудани муҳаққиқон, сомон додани фаъолияти босамари таҳқиқӣ фармони ректори донишгоҳ Анвар Мақсудов таҳти №299 аз 22 сентябри соли 2015 ба тавсиб расид, ки дар он муҳаққиқоне, ки рисолаю монографияҳо, пажӯҳишҳо ва маҷмӯаҳои илмии худ, инчунин матнҳои илмию адабиро ба андозаи на камтар аз 10 ҷузъи чопӣ барои бахши улуми дақиқ ва 12 ҷузъи чопӣ барои бахши улуми гуманитарӣ ва ҷомеашиносӣ ба табъ расонидаанд, бо мукофотпулии якдафъаина дар ҳаҷми 1500 (ҳазору панҷсад) сомонӣ қадршиносӣ мешаванд.
Дар ин бора аз раёсати корҳои илмӣ-тадқиқотӣ иттилоъ доданд. Манбаъ афзуд, ки ҳар як муҳаққиқ дар як соли тақвимӣ як маротиба қадршиносӣ мешавад. Ба гирифтани мукофотпулӣ ҳамон муаллифоне сазовор дониста мешаванд, ки китобу рисолаҳо, маҷмӯаҳо ва матнҳои таҳиякардаашон бо қарори Шӯрои табъу нашри донишгоҳ ба чоп мерасанд. Мукофотпулии нашри асарҳои илмиро ҳамон устодону омӯзгороне сазовор мешаванд, ки ҳамчун корманди штатӣ дар донишгоҳ фаъолият намоянд.
Дар ин бора аз Хадамоти матбуоти Раиси вилояти Суғд хабар доданд
Нет комментариев