Бо дастури Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон субҳи 25 май аз шаҳри Москва 237 шаҳрвандони Ҷумҳурии Тоҷикистон ва 13 ҷасади ҳамватанон ба шаҳри Душанбе таҳвил дода шуданд.
Тавре АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад, аз теъдоди умумии шаҳрвандони баргашта 197 нафар дар марказҳои нигоҳдории муваққатии шаҳрвандони хориҷии Федератсияи Россия қарор доштанд.
Ёдовар мешавем, ки бино ба дастури Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тасмим гирифта шудааст, ки шаҳрвандони Тоҷикистон, ки ба иллати ҳамагирии COVID-19 дар хориҷа дармондаанд, тибқи нақша тадриҷан ва марҳила ба марҳила бо роҳҳои ҳавоӣ ва заминӣ ба Ватан баргардонида мешаванд.
Ҳамзамон бояд таъкид кард, ки раванди бозгардонидани шаҳрвандон аз хориҷа ба Ватан ба фароҳам оварда шудани шароити зарурӣ, аз ҷумла омода будани ҷойҳои кофӣ барои карантин ё муроқибати тиббии онҳо дар Тоҷикистон вобаста хоҳад буд.
Ситоди ҷумҳуриявӣ шаҳрвандони Тоҷикистонро бовар мекунонад, ки сарфи назар аз мушкилоти зиёди бесобиқа тамоми чораҳои зарурӣ барои солиму эмин нигоҳ доштани шаҳрвандон дар дохил ва хориҷи мамлакат ва ҳарчи зудтар раҳоӣ ёфтан аз ин бемории ҳамагир андешида хоҳанд шуд.
Манбаъ: АМИТ «Ховар»
Нет комментариев