Афшураи зардолу чӣ хусусиятҳо дорад?

Шарбати зардолу дорои  калтсийи зиёд мебошад, аз ин лиҳоз он барои кўдакони хурдсол ва занони ҳомиладор хеле муфид аст. 150 гр шарбати зардолу,  талаботи ҳаррӯзаи инсонро дар каротин қонеъ мегардонад. Афшура нисбат ба мева, дар организми инсон хубтар ҳазм мешавад.

Зардолуро барои муолиҷа намудани бемории камхунӣ низ истифода мебаранд. 100 гр меваи зардолу ба раванди хунофарӣ, монанди 250 грамм ҷигари тару тоза, таъсири мусбат мерасонад. Зардолу дар баробари доштани хусусиятҳои зиёди шифобахшаш, ҳамчунин аз моддаи каротин хеле бой мебошад.

Афшураи зардолу танҳо бо гӯшташ омода мегардад. Ба шарофати дар таркиби худ доштани миқдори зиёди провитамини А ва каротин, он барои саломатӣ хеле фоиданок  аст. Витамини асосиву арзишманди он маҳз дар гӯшташ мебошад. Барои  пурра намудани талаботи ҳаррӯза ба витамини А,  кас бояд на бештар аз як шиша шарбати зардолу нӯшад. Шарбати зардолу, ба ғайр аз сафеда, ҳамчунин дорои  витаминҳои гурӯҳи В, оҳан ва фосфор мебошад, ки духтурон онро барои табобати бемориҳои гипертонӣ, дил ва гурдаву ҷигар тавсия медиҳанд.

Шарбати зардолу барои табобати инсон ҳангоми фарбеҳшавӣ, бемориҳои системаи хунгузар ва дил хеле муфид аст. Аз ҳисоби миқдори зиёди магний ва фосфор, шарбати зардолу ба фаъолияти мағзи сар таъсири хуб мерасонад, он хотира ва девораҳои рагҳои хунгузари мағзи сарро мустаҳкам менамояд.

Шарбати зардолу, ки аз оҳан бой аст,  воситаи хубест барои табобати бемориҳои камхунӣ, рӯдаю меъда, пӯст ва луобпардаи даҳон.

Мағзи донаки зардолуро ҳамчун воситаи таскинбахш барои табобати сулфаи сахт, трахеит, бронхит ва ларингит метавон истифода бурд. Барои тайёр кардани омехтаи тиббӣ, 20 гр мағзи  зардолуро аз донак ҷудо намуда, хушк кунед ва то ба хока табдил ёфтанаш нағзакак кӯбед. Маводи тайёршударо метавонед дар як рӯз 1 қошуқчагӣ 3-4 маротиба бо шир ва ё чой истеъмол кунед.

Барои тайёр кардани афшура ба мо лозим аст:

• 1 литр хамираи тарошидашуда
• 500 мл шарбат

Тарзи тайёр намудани афшура: Барои тайёр кардани афшураи зардолу бо гӯшташ, зардолуи пухтарасида, солим ва бенуқсонро бояд интихоб намоем. Зардолуро ба навъҳо ҷудо намуда, мешӯем. Сипас онро ба ду қисм тақсим карда,аз донакаш ҷудо мекунем. Нисфи меваро дар косаи сирдор ҷойгир намуда, ба он андаке об илова мекунем (барои 1 кг мева, 100 мл об), дар ҳарорати миёна 10-15 дақиқа то  мулоим шуданаш меҷӯшонем, сипас аз ғалбер онро мегузаронем. Маҳсулоти тарошидашударо, бо шарбати гармии 25 фоизаи аз шакар омодашуда омехта мекунем (барои 250 гр шакар, 750 мл об), онро дар ҳарорати миёна 10 дақиқа меҷӯшонем. Афшураи ҷӯшидаистодаро оҳиста ба қуттиҳои шишагин мерезем.