Бо мақсади шиносоӣ бо вазъи имрӯзаи коргоҳи «Хуҷандатлас» Раиси шаҳри Хуҷанд Раҷаббой Ахмадзода ба коргоҳи «Хуҷандатлас» омад. Имрӯз дар корхонаи «Хуҷандатлас» бинобар маҳдудияти ашёи хом абрешим теъдоди маҳдуди кормандон фаъолият доранд.
Лекин новобаста ба ин то имрӯз маҳз бо кӯшиши роҳбарияти корхона истеҳсоли беш аз 30 намуди беҳтарини атласи машҳури Хуҷанд имкон дошта, барои таҳияи нақшу намудҳои нави атлас кор идома дорад.
Дар баробари ин коргоҳ беҳтарин кормандону ҳунармандони атласбарорӣ аз қабили «Абрбандон», «Қаткушоён», «Йормачиён» ва бофандагонро ба кор ҷалб намуда сатҳу сифати атласи хуҷандиро нигоҳ медоранд.
Баъди шиносоӣ Раиси шаҳри Хуҷанд бо ҳайати масъулини Мақомоти иҷрояи ҳокимияти давлатии шаҳри Хуҷанд, корхонаҳои номбурда, ва олими фарҳангшинос Наим Ҳакимов ҷаласаи корӣ доир намуд.
Дар машварати корӣ таъкид гардид,ки имрӯз барои таъмини фаъолияти мунтазами корхонаи «Хуҷандатлас» ва корхонаи коркарди пиллаи «ВЕТТОҶ» таъмини саривақтии онҳо бо ашёи хом, таҳияи дурнамои муштарак, тарғиби атласи ватанӣ, баргузории чорабиниҳои фарҳангӣ ва тарғиботӣ бо мақсади ҷалби ҳар чӣ бештари харидорон ва ҳаводорони матои атлас чораҳои мушаххас андешида шаванд.
Раиси шаҳри Хуҷанд Раҷаббой Аҳмадзода баргузории фестивал-озмуни беҳтарин тарроҳон ва дӯзандагони либоси миллӣ бо истифодаи матои атласи истеҳсоли Хуҷандро мувофиқи мақсад донист. Барои ин ташкили мағозаҳои махсуси фурӯши матои атласи Хуҷанд дар шаҳрҳои Душанбе ва Қурғонтеппа дастур дода шуд.
Дар баробарии ин чанде аз пешниҳоди олими шинохта Наим Ҳакимов барои боло бурдани эътибори матои атлас чун як ҷузи арзиши модди миллати тоҷик қобили қабул ва дастгирӣ пазируфта шуд.
Дар ин бора аз хадамоти матбуотии Раиси шаҳри Хуҷанд иттилоъ медиҳанд. http://khujand.tj/tg/arhiv/1394-atlas
Нет комментариев