Инак, то фарорасии Соли нави мелодӣ рӯзҳои бошумор боқӣ мондаанд. Пас аз чанд рӯз ба диёри хушманзараву ободи мо тоҷикон “маймуни чолоку ҳушёр” қадам ранҷа мекунад. Умед бар он мебандем, ки Соли нав ба хонадони ҳар яки мо шодиву нишот, файзу баракот ва сарбаландиву некномиҳо оварад. Ноомадиву пастиҳои зиндагӣ, хотираҳои начандон хуб дар соли куҳан боқӣ мемонанду ин ҳама бо мо абадан падруд мегӯянд.
Ҳоло бошад, ҳамдиёрони мо дар ташвиши хубу хотирмон пешвоз гирифтани ин ид ҳастанд. Аллакай дар маркази шаҳр — майдони ситораҳои шаҳри Хуҷанд арчаи сарсабзу зебо қомат афрохта, ба намуди шаҳр ҳусни дигар зам намудааст. Дидани ин манзараи зебо ба кас хушнудӣ мебахшад. Бояд гуфт, ки шурӯъ аз санаи 15-уми декабри соли ҷорӣ чорабиниҳои солинавӣ оғоз гардида, дар назар аст зери ин арчаи зебо то оғози соли нави 2016 консерту барномаҳои солинавӣ доир гарданд.
Ҳамин тавр, дар ин шабу рӯзҳои омодагӣ ба ид, яке дар хона арчаи солинавӣ оро медиҳаду дигаре мехоҳад бо тӯҳфаҳои ғайричашмдошт табъи кӯдакон ва дигар аъзои оилаашро болида созад.
Дар ин рӯзҳо роҳбари ШТРР “Тироз” Хуршед Ӯлмасов низ хеле серташвиш аст. Ӯ ва дастаи эҷодии радиоҳои “Тироз” ва “Тирози ҷавонӣ” кӯшиш мекунанд, ки дар рӯзҳои таҷлил гирифтани Соли нави мелодӣ барномаҳои шавқовару қобили таваҷҷӯҳро пешкаши шунавандагонашон гардонанд.
Ҳангоми сӯҳбат Хуршед Ӯлмасов ба саволи “Соли 2015-ум барои ШТРР “Тироз” чӣ гуна сол буд?” чунин посух дод: “ Соли 2015-ум андаке инҷиқиҳо дошт, тавре ба ҳама маълум аст, мо соли вазнини бӯҳрони иқтисодиро аз сар гузаронидем, аммо набояд ин солро бо чунин камбудиҳояш ба хотир орем.
Соли куҳан — соли кашфиёт ва соли навовариҳо барои кормандони радиои “Тироз” буд. Тавре мебинем, имрӯз аксарияти шабакаҳои телевизиониву радиоӣ ба журналистикаи чандрасонаӣ— мултимедиа рӯ овардаанд. Бояд гуфт, ки дар ин сол ман ва дастаи эҷодии ШТРР “Тироз” ба пешравиҳои зиёд ноил гаштем, ки ин ҳам бошад, тавлид ёфтани сомона, медиапортали “Тироз” мебошад. Тавассути он мо робитаро бо шунавандагону истифодабарандагони интернет мустаҳкамтар намудем. Имрӯз моро ҳам мешунаванд ва ҳам мебинанд.
Соли нави омадаистода, соли маймун аст. Маймун ҳайвони хеле чолоку ҳушёр аст, умед мебандем, ки ин сол пурфайзу накӯ хоҳад омад”
Шурӯъ аз санаи 18-уми декабри соли ҷорӣ, мо қарор додем, ки барномаҳои солинавии худро пешкаши истифодабарандагон ва шунавандагони радио гардонем. Кунун барномаҳои “Ҳамроз”, “Ҳозирҷавоб”, “Радиомикс» ранги дигар гирифта, дар онҳо бо сомеон бозиҳои гуногун гузаронида мешаванд. Шунавандагону истифодабарандагони фаъолро то фарорасии иди соли нави мелодӣ тӯҳфаҳои ғайричашмдошт интизоранд.
Нет комментариев