Соли нав — иди зебост ва омодагӣ ба он таваҷҷӯҳи хурду калонро ҷалб менамояд.
Пеш аз баргузории ин ид кӯдакон барои худ либосҳои гуногуни солинавиро фикр карда мебароянд. Баъзан ин фикру андешаҳо ҳанӯз дар фасли тобистон тавлид ёфта, он ҳар гоҳ тағйир меёбад. Охирон кӯдак ба қароре меояд, ки ӯ дар чароғаки солинавӣ нақши киро мебозад ва ҳамин тавр модару бибӣ дар ҳайрат мемонанд, ки барои ҷигарбанди худ чӣ тавр либоси интихобкардаи ӯро омода намояд.
Чӣ тавр барои кӯдак бо дастони худ либоси солинавӣ омода намоем? Шояд бо ин савол аксарияти занҳо рӯ ба рӯ шуда бошанд.
Ин лаҳза мехоҳем чанд маслиҳати худро оид ба тайёр кардани ниқобу либосҳои идона баҳратон пешниҳод намоем, мутаваҷҷеҳ бошед:
Маслиҳати аввал — либоси масхарабоз
Барои омода намудани чунин либос ба шумо лозиманд: тоқичаи сафед, свитери сафед, эзорчаи сафед, колготкаҳои сурх, пойафзол, маҷмӯи исфанҷҳо (губка)-и рангаи даврашакл. Се адад исфанҷро мебояд ба курта ва эзорчаҳо дӯхта часпонед. Ду исфанҷро дар болои тоқича дӯхта, ду исфанҷи дигарро ба ресмони пойафзолҳо шинонед. Боқимондаи исфанҷҳоро аз ресмон гузаронед – шаддаи калони тобон ҳосил мегардад. Масхарабоз ба баромад омода аст!
Маслиҳати дуюм. Либоси тортанакча.
Омода намудани чунин либос хеле осон аст! Барои иҷрои ин амал номгӯи чунин маҳсулот заруранд: 3 ҷуфти дастпӯшакҳои якхела, куртачаи кулоҳдор, чор остини ҳамранг ба куртача, шил – шилаҳо. Ба шумо сохтани чор дастони иловагӣ барои тортанакча зарур аст. Баъдан мебояд дастпӯшакҳо ва дастчаҳоро бо пахта пур намуд ва бо ҳам пайванд кард.
Маслиҳати сеюм. Либоси арча.
 |
 |
Ба шумо матои сабз (2 бар 1 метр), коғази ғафс (картон)-и ранга, коғази сабзу зард барои тоқича заруранд. Матоъро болои ҳамдигар таҳ кунед (квадрати 1×1 метр ҳосил мегардад, онро ду бора болои ҳамдигар гузоред), дар он акси арчаро тасвир намуда, барои даҳана ҷой гузоред ва бо қайчӣ бурида гиред.
Маслиҳати чорум. Либоси гавазн
Лавозимоти зарурӣ: свитери қаҳваранг, колготкаҳои қаҳваранг, кафшчаҳои сиёҳ, кулоҳчаи қаҳваранг, дастпӯшакҳои сафеди газворӣ. Дастпӯшакҳоро бояд нағзакак аз пахта пур кард, баъдан онро ба кулоҳча пайваст намуд. Метавон кулоҳчаро бо гӯшчаҳо оро дод ва ба рӯйи кӯдак биничаи қаҳварангро тасвир намуд.
Маслиҳати панҷум. Либоси баррача.
Лавозимоти зарурӣ барои тайёр намудани ин либос: колготкаҳои сиёҳ, свитери сиёҳ, камзӯлчаи беостини кулоҳдори сафед, 500 дона саққочаи пахтагин (дар дорухонаҳо ба фурӯш гузошта шудааст ), матоъ ва коғази сафеду сиёҳ. Ба шумо зарур аст, ки саққочаҳои пахтагинро ба камзӯлча дӯзед ва агар имконият бошад, онро метавонед бо ширеш часпонед. Баъдан аз шумо талаб карда мешавад, ки аз коғаз ва матоъ гӯшчаҳо бурида гирифта, коғазро ба даруни матоъ гузоред, ин тадбир барои ба шакл даровардани гӯшчаҳо хизмат мерасонад.
Маслиҳати шашум. Либоси аждаҳо
Лавозимоти зарурӣ: Исфанҷҳои сабз барои шустани зарф, қайчӣ, ширеш ва ё ришта бо сӯзан, кулоҳи сабз, куртачаи сабз. Исфанҷҳоро ба таври секунҷа мебурем, сипас секунҷаҳои ҳосилшударо ба шил-шила пайваст мекунем. Шил – шиларо ба кулоҳча ва куртача бо ширеш пайваст мекунем. Дар қисмати поёнии либос каме думча гузоред!
Маслиҳати ҳафтум. Либоси ҳаштпо (осьминог)
Лавозимоти зарурӣ: чор ҷуфт колготка. Як ҷуфти онро ба худи кӯдак мепӯшонем, боқимондаашро аз пахта пур намуда, ба камарбанд пайваст мекунем. Метавонед ба ҷои миёнбанд рӯймолро истифода баред, ки ҳамаи чизҳои зиёдатиро пинҳон мекунад.
Ана ин аст, чанд маслиҳати мо барои модарону бибиҳо, ки аз ҳама бештар барои хурсандии кӯдаконашон заҳмат мекашанд.
Таманно мекунем, ки Соли нави омадаистода барои хонаводаи шумо файзу баракот ва шодиву нишот оварад!
Нет комментариев