Насиба Наимхонова , донишҷӯи 19-солаи Донишгоҳи муштараки славяниву қирғизии шаҳри Бишкек дар озмуни зебоии “Мисс Университет” байни донишҷӯдухтарони Қирғизистон сазовори ҷои аввал шудааст. Ӯ ҳоло барои ширкат дар озмуни байналмилалии зебоӣ байни духтарони донишҷӯ, ки рӯзи 19  январ бо айни номи “Мисс Университет” дар Пекин, пойтахти Чин доир мешавад, омодагӣ мегирад. Ин духтари тоҷик дар ин озмуни байналмилалии зебосанамҳо аз Қирғизистон намояндагӣ хоҳад кард.

Насиба Наимхонова зодаи ноҳияи Ишкошими вилояти Бадахшони Тоҷикистон буда, дар Душанбе ба воя расидааст. Насиба  бо кӯмаки барномаи Бунёди рушди Оғохон барои таҳсил ба Қирғизистон омадааст ва ҳоло дар соли сеюми бахши тарҷумонӣ аз забонҳои англисиву фаронсавии Донишгоҳи славяниву қирғизии Бишкек таҳсил дорад.

Насиба Наимхонова рӯзи 29 декабр дар як мусоҳибаи ихтисосӣ бо Радиои Озодӣ гуфт, хабари озмуни зебоӣ байни духтарони донишҷӯи донишгоҳҳои Қирғизистонро тасодуфун аз Интернет хонда, барои ширкат дар он дархост додааст: “Духтарони зиёде дар кастинг ширкат карданд. Ибтидо аз байни онҳо 40 нафарро интихоб карданд. Худи озмун аз 4 бахш – роҳгардӣ, сабқати истеъдодҳо, рақси умумӣ ва баромади шомгоҳӣ – иборат буд. Аз ин 40 нафар танҳо 22 нафараш ба даври ниҳоӣ роҳ ёфтанд ва ман аз миёни онҳо ҷои аввалро гирифтам.”

Ширкати “Р-Стайл” – масъули баргузории ин озмуни зебосанамҳо ба Насиба Наимхонова ба ҳайси ҷоиза роҳхати бепули сайёҳӣ ба Туркияро эъто кардааст. Ӯ ҳамчун ғолиби озмун акнун муваззаф аст, дар барномаву ҷашнҳои солинавӣ ширкат кунад. Насиба ҳамин тавр, моҳи январ дар озмуни байналмилалии зебоӣ дар Пекин аз Қирғизистон намояндагӣ хоҳад кард. Ӯ мегӯяд: “Хеле умедворам, ки дар ин озмун ҳам ғолиб биоям. Вале азбаски ман шаҳрванди Қирғизистон нестам, бароям пайдо кардани спонсорҳое, ки сафарам ба Пекинро таъмин кунанд. Бо ин вуҷуд, умед дорам, ки ҳам спонсор пайдо кунам ва дар Пекин ҳам пирӯз шавам. Мехоҳам дар Пекин бо либосҳои тоҷикӣ ҳунарнамоӣ кунам ва фарҳанги тоҷикиро муаррифӣ намоям.”

Насиба мегӯяд, пирӯзии вай дар озмуни зебоии Қирғизистон ба таври зиддунақиз қабул шуд: “Сӯҳбатҳое ҳам буданд, ки чигуна як духтари бегона дар озмуни Қирғизистон пирӯз шудааст? Чунин гапу калочаҳо шуд, вале аксарият пуштибонӣ карданд аз ман.”

Дар маҷмӯъ дар донишгоҳҳои Қирғизистон ҳудуди 400 нафар аз Тоҷикистон таҳсил мекунанд. Бахши аъзами онҳо аз вилояти Бадахшонанд ва бо кумаки Бунёди Оғохон барои таҳсил ба Қирғизистон омадаанд. Насиба Наимхонова мегӯяд, Бунёди Оғохон донишҷӯёни тоҷикро бо стипендияи хубе таъмин мекунад, вале худи ӯ баъди пирӯзӣ дар озмуни зебоии Қирғизистон дигар метавонд худашро мустақилона таъмин кунад.

Бо ин вуҷуд, Насиба Наимхонова мехоҳад баъди хатми таҳсил ба Душанбе ба пеши хонаводааш баргардад. Падари Насиба дар Душанбе  тиҷорат дорад ва модараш, ки дорусоз будааст, ҳоло ҷое кор намекунад. Наимхоновҳо 5 фарзанд доранд ва Насиба фарзанди калонии онҳост. Дар ин бора радиои Озодӣ хабар медиҳад.