Соли 2019 содироту воридоти молу маҳсулот миёни вилояти Хатлон ва Ҷумҳурии Қазоқистон 4,3 миллион доллари ИМА-ро ташкил медод. Дар 8 моҳи соли равон ин рақам ба беш аз 5,7 миллион доллари амрикоӣ расид. Ин нукта 15 сентябр зимни мулоқоти раиси вилояти Хатлон Қурбон Ҳакимзода ва Сафири Фавқулода ва Мухтори Ҷумҳурии Қазоқистон дар Тоҷикистон Аскар Тоҷибоев баён гардид.
Дар ин бора ба мухбири АМИТ «Ховар» аз шуъбаи иттилоотӣ-таҳлилии мақомоти иҷроияи ҳокимияти давлатии вилояти Хатлон хабар доданд.
Зимни мулоқот ҷонибҳо доир ба роҳандозии муносибатҳои дипломатӣ миёни ду давлат ва равобити мутақобилан судманд дар арсаҳои сиёсӣ, иқтисодию тиҷоратӣ, илмӣ-техникӣ ва фарҳангию маърифатӣ ибрози назар намуданд.
Раиси вилоят Қурбон Ҳакимзода зикр намуд, ки вилояти Хатлон аз калонтарин минтақаҳои кишоварзии мамлакат ба шумор рафта, шуғли асосии мардум кишоварзӣ, боғдорӣ, обчакорӣ, чорвопарварӣ ва пахтакорӣ мебошад.
«Барои ҳарду ҷониб рушд додани ҳамкорӣ дар самти бунёди гармхонаҳои парвариши сабзавоти барвақтӣ, таъсиси корхонаҳои хурди коркарди меваю сабзавот бо истифода аз фанноварии муосир ва содироти консерваҳои меваю сабзавот ба Қазоқистон, бунёди корхонаҳои муштарак оид ба коркарди шир, гандум, пашм ва чарм судманд мебошад. Инчунин дар самтҳои рушди туризм, таъсиси корхонаҳои муштараки бофандагию ресандагӣ, фаъолияти муштарак дар минтақаҳои озоди иқтисодии «Панҷ», «Данғара» ва «Кӯлоб», иҷораи дарозмуддати заминҳои таъйиноти кишоварзӣ, пешбурди тиҷорати хурду миёна бо мақсади рушди муносибатҳои тиҷоратӣ бо доираҳои соҳибкории Қазоқистон, иштироки намояндагони вилояти Хатлон ва вилоятҳои Қазоқистон дар ярмаркаю намоишгоҳҳои кишоварзӣ ва саноатӣ бояд ҳамкории мутақобилан судманд ба роҳ монем»,- изҳор дошт номбурда.
Аз Ҷумҳурии Тоҷикистон ба Қазоқистон асосан пахта, маҳсулоти кишоварзӣ ва маводи бофандагӣ содирот шуда, аз Қазоқистон ба Тоҷикистон гандум ва маҳсулоти ордӣ, инчунин маводи сӯзишворӣ ворид карда мешаванд.
Дар ҷараёни мулоқот таъкид шуд, ки самтҳои афзалиятдори ҳамкории иқтисодии ду мамлакат аз саноати истихроҷи маъдан, металлургияи ранга, бахши мошинасозӣ, комплекси агросаноатӣ, эренгетика, саноати сабук, нақлиёт ва коммуникатсия иборат аст.
Ҳамчунин ҷонибҳо доир ба кӯҳ ва талу теппаҳои вилояти Хатлон, ки аз растаниҳои шифобахш бойанд, суҳбат намуда, ҳамкорӣ дар бахши дорусозиро низ муҳим шумориданд.
Сафири Фавқулода ва Мухтори Қазоқистон дар Тоҷискитон Аскар Тоҷибоев зикр намуд, ки «мо чанд сол аст дар бахшҳои гуногун ҳамкории зич дошта, дар бахши маориф, тандурустӣ, сайёҳӣ ва содироту воридоти маҳсулоти кишоварзӣ таҷрибаи хуб ҳосил кардаем. Дар ин замина Ҷумҳурии Қазоқистон нақшаҳои нави ҳамкориро тарҳрезӣ карда, онҳоро дар муҳлатҳои муайяншуда барои баррасӣ пешниҳод менамояд. Дар омода кардани мутахассисони соҳаи кайҳоншиносӣ, техникаю технологияи муосир, телевизион ва радиокоммуникатсия, соҳаи алоқа ва кишоварзӣ метавонем ҳамкориро мустаҳкамтар намоем. Барои сохтани сардхонаҳо ва нигоҳдории маҳсулоти кишоварзӣ низ шароити мувофиқи ҳамкорӣ дар вилоят фароҳам аст».
Зимни мулоқот ҷонибҳо оид ба дурнамои ҳамкории вилояти Хатлони Ҷумҳурии Тоҷикистон ва Ҷумҳурии Қазоқистон табодули андеша карда, барои зиёд намудани ҳаҷми воридоти маҳсулоти нафтӣ ва гандум аз Қазоқистон ва содироти пахта, маҳсулоти сабзавотию меваҷот ҳавасмандӣ нишон доданд.
Манбаъ: АМИТ «Ховар»
Нет комментариев