Суруди тозаэҷоди сарояндаи маъруфи тоҷик Нигина Амонқулова, ки бо номи «Ёри мусофир» пешниҳод гардид, ба мардони муҳоҷири тоҷики Русия ва мавзӯи барҳамхӯрии оилаи тоҷик бахшида шудааст.
Бино ба навиштаи расонаҳо, мавзӯи суруд бозгӯи муҳоҷирати мардони тоҷик аст, ки дар аксар маврид занону кӯдакони худро танҳо гузошта, ба Русия мераванд ва дар он ҷо зиндагӣ ва ҳатто, оилаи нав бунёд мекунанд.
Ин таронаро сарвари ширкати «Huseniyon Production»Азамат Ҳусейниён сабт кардааст, ки ба гуфти ӯ тарона бо дархости дафтари Созмони байналмилалии муҳоҷират дар Тоҷикистон омода шудааст. Ӯ афзуд «чун Нигина дар миёни мардум аз маҳбубият бархурдор аст, онҳо тасмим гирифтанд, ки тариқи садои ӯ барҳамхӯрии оилаҳои муҳоҷиронро нишон диҳанд ва аз сӯи дигар, муҳоҷиронро ба ҳифзи хонаводаҳояшон ташвиқу тарғиб кунанд.»
Азамат илова кард, дар ҳоле ки бисёре аз ҳамсарони муҳоҷирон аз сӯи шавҳарҳояшон парасторӣ намешаванд ва дар чорсӯи зиндагӣ бо тифлони хурдсол қарор мегиранд, онҳо тавассути ин клип роҳи берунравӣ аз ин душвориро барои занон нишон додаанд.
«Дар клип саҳнае ҳаст, ки зан ба шавҳари муҳоҷираш борҳо занг мезанад, аммо шавҳараш муддати дароз посух намедиҳад. Ӯ бо тифлони хурдсол танҳо мемонад, аммо бо вуҷуди ин рӯҳафтода нашуда, кор бо компютерро меомӯзад. Баъдан дар клип мо нишон додем, ки зан ҷойи кор пайдо карда, алакай бо халтаҳои пур ба хона бармегардад,» — шарҳ дод ӯ.
Ин клип баръакси қиссаи воқеӣ, бо саҳнаи ба истилоҳ «ҳеппи энд» анҷом меёбад. Марди муҳоҷир пас аз солҳои саргардонӣ ба хона баргашта, оилаи худро барқарор мекунад.
Оҳангу таронаҳои дар мавзӯи ғарибию муҳоҷират дар Тоҷикистон пурхаридору сершунаванда мебошанд. Дар репертуари аксар сарояндагони ҷавони Тоҷикистон ҳадди ақал як суруде пайдо кардан мумкин аст, ки ба мавзӯи ғарибӣ бахшида шуда, дар он ранҷу азоби муҳоҷирони меҳнатии тоҷик дар хориҷи кишвар тасвир мешавад.
Дар клипи сароянда Нигина Амонқулова саҳнае ба навор гирифта шудааст, ки дар он марде ба муҳоҷират рафта, баъдан парастории оилаи хеш дар Тоҷикистонро фаромӯш мекунад. Аммо бо вуҷуди ин, зани танҳои ӯ ба тақдир тан надода, барои раҳоӣ ёфтан аз мушкилоти рӯзгор, курси компютериро мегузарад ва шуғле пайдо карда, зиндагии худ ва фарзандонашро то қадре обод менамояд.
Суруди навсабтшуда беш аз 5 дақиқа идома карда, он хеле таъсирбахш омода шудааст.
Сарояндагон ба хотири маҳбубият пайдо кардан дар ин мавзӯъ, сурудҳо эҷод менамоянд ва дар клипҳои худ, ҳаёти сангини муҳоҷирони тоҷикро дар Русия нишон медиҳанд. Таронаи “Эй муҳоҷирбачаи саргардони тоҷик” аз маҳбубтарин таронаҳоест, ки дар мавзӯи муҳоҷират эҷод шудааст ва аксар муҳоҷирон фиттаи ин таронаи сарояндаи маъруф Баҳром Ғафуриро ҳангоми ҳиҷрат бо худ мебаранд.
Ҳамчунин, сарояндагони дигар, аз қабили, Фарҳоди Милод таҳти унвони «Ба Тоҷикистонам баред» ва суруди Наимҷони Сайдалӣ “Эй бачаи мардикор чӣ ҳол дорие” миёни мардум ҳаводорони зиёде пайдо кардаанд.
Хулоса, Соли нави мелодии 2016-ум шоу-бизнеси тоҷик аз пешниҳоди суруд ва клипи нави Нигина Амонқулова бо номи «Ёри мусофир» ва суруди “Мамнунам”-и Зулайхо Маҳмадшоева оғоз гардидааст.
Суруди Н.Амонқулова ба мавзӯи муҳоҷират бахшида шуда, дар он аз ёри мусофир даъват шудааст, то баргардаду хонаро обод нигоҳ дорад. З.Мамадшоева низ аз дӯстдорию дилбастагӣ суруд хонда, таъкид ба вафодорӣ кардааст.
Нет комментариев