Дар ҳар давру замон, бахусус, дар марҳилаи соҳибистиқлолии Ҷумҳурии Тоҷикистон нақши васоити электронӣ ва чопии ахбори омма дар иттилоотонии саривақтии ҷомеа, баланд бардоштани фарҳангу маънавиёти шаҳрвандон, тарбияи насли наврас ва ҷавонон дар рӯҳияи ватандӯстиву меҳанпарастӣ, хештаншиносиву инсондӯстӣ бузург аст.
Президенти Ҷумҳурии Тоҷикистон, Пешвои миллат, Ҷаноби Олӣ, мӯҳтарам Эмомалӣ Раҳмон борҳо зимни суханрониву баромадҳояшон зикр намудаанд: “Радиову телевизион ва рӯзномаву маҷалла ба маънои томаш пулест миёни давлат ва ҷомеа. Яъне, бидуни васоити ахбори омма (ВАО) иртибот барқарор намудан хеле душвор аст. Ба ин хотир мардум ба ВАО, бахусус, ба телевизион ва радио эътимоди зиёд дорад”.
Маҳз ин нуктаҳои пурмӯҳтавои Сардори давлат дар Шимоли Тоҷикистон – вилояти Суғд баръало эҳсос гардида, шаҳрвандони касбу кори мухталиф аз барномаҳои радиову телевизион ва маводи дарҷшудаи матбуоти давр пайваста баҳраманд мегарданд.
Яке аз чунин ВАО-и маъруфи вилояти Суғд, ки аз гуфтору барномаҳои ҷолибу муфид ва пурмазмунаш мардум ҳамарӯза бархурдор мегарданд, Шабакаи радиоии “Тироз” маҳсуб мешавад.
Оё Шумо доир ба таърихи таъсисёбии радиои дӯстдоштаи хеш маълумот доред?
Ҷамъияти дорои масъулияташ маҳдуди Ширкати телевизион-радио ва рекламавии «Тироз» аслан моҳи июли соли 2000 таъсис ёфтааст. Ба пахши барномаҳо бошад, санаи 1-уми марти соли 2001 оғоз намудааст.
Воқеан, понздаҳ сол муқаддам, санаи 1-уми марти соли 2001 бо дастгирии бевоситаи Кумитаи телевизион ва радиои назди Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилояти Суғд радиои «Тироз» ба пахши барномаҳои хеш шурўъ намуда буд. Радиои «Тироз» чун нахустин шабакаи радиои мустақили маҳаллӣ дар шабакаи FM, дар таърихи ҷумҳурӣ бо ҳарфҳои заррин сабти ном шудааст.
Яъне, аввалин FM-шабакае аст, ки дар Тоҷикистон ба мавҷ баромад. Мавҷи пахш — 103,7 FM. Формати асосӣ — мусиқавӣ-фароғатӣ мебошад. Ҳамчунин, барномаҳои иттилоотӣ, иқтисодӣ, иҷтимоӣ, таҳлилӣ ва маърифатӣ пахш карда мешаванд. Доираи фарогирии мавҷи радио 65 фоизи вилояти Суғдро ташкил медиҳад. Аудиторияи шунаванда омехта буда, забони пахши барномаҳо тоҷикӣ ва русӣ мебошад. Давомнокии пахши барномаҳо 21 соатро дар як шабонарӯз ташкил медиҳад.
Радио дар давоми ин солҳо ба монанди воситаҳои дигари ахбори омма, дар зиндагии аҳли ҷомеа мавқеи намоён пайдо намуд. Ба ин комёбӣ агар аз як ҷониб озодии сухан мусоидат намуда бошад, аз ҷониби дигар худи замона тақозо мекунад, ки фазои холии иттилоотӣ бо ягон роҳу васила пур карда шавад.
Дар байни воситаҳои ахбори оммаи электронии вилояти Суғд ширкати телевизион ва радио-рекламавии «Тироз» мавқеи намоёнро соҳиб гашт. Он аз оғози таъсисёбиаш тавонист соҳиби эътимоди шунавандагон ва дар маҷмӯъ, аҳли ҷомеа гардад. Радиои «Тироз» аз рӯзи нахустин таҳти шиори “Гӯш кун ва ҳаловат бар!” фаъолият намуда, сазовори боварии шунавандагони сершумор шудааст.
«Тироз» — нахустин ширкати телевизион ва радио-рекламавии мустақил маҳсуб мешавад, ки пахши барномаҳои худро дар шабакаи FМ ба роҳ мондааст. Таҳти роҳбарии Муассис ва Сарвари кулли Ҷамъияти дорои масъулияташ маҳдуди Ширкати телевизион ва радио-рекламавии “Тироз”, шахси кордону меҳнатдӯст ва фидоии касбу кори хеш Хуршед Азимҷонович Ӯлмасов нахустин кормандони эҷодиву техникии радио Анна Клюева, Сергей Даведович, Андрей Столбецов, Екатерина Ким, Алфия Хамидуллина, Елена Зеликович, Стас Зеликович, Акмал Мансуров, Пайрав Мирсаидов, Юсуф Маюсуфов, Маҳмуд Мӯъминов, Олим Мирзобоев, Дилшод Юлдошев, Зафар Мамадҷонов, Зариф Зарифов ва дигарон на танҳо ҳамарӯза, балки ҳамасоата кӯшиш намуданд, то бо маводи ҷолибу шуниданӣ таваҷҷӯҳи шунавандагонро бештар ба радиои “Тироз” ҷалб намоянд. Яъне, маҳз онҳо тавонистанд, ки аз рӯзи нахустини пайдоиш ва ба мавҷ баровардани аввалин барномаву гуфторҳои радио дар дилу дидаи шунавандагон маскан гиранд ва азизи дилу дидаи сомеони арҷманду мухлисони доимии барномаҳои радио гарданд. Қалби шунавандаро тасхир кардаву мафтуни садои хушу гӯшнавоз ва ҷаззобашон намоянд. Меҳмони кошонаи шаҳрвандон гардида, ба хонадони онҳо файзу равшанӣ ва баракоту нусрат ворид кунанд.
Ба мушоҳида мерасад ва ба осонӣ эҳсос намудан мумкин аст, ки кормандони эҷодиву техникии имрӯза ташаббусу корҳои назарраси онҳоро пайваста идома дода, кӯшиш менамоянд, то ба монанди собиқ кормандони ин даргоҳи фарҳангу маърифат фидоии касбу кори хеш гарданд. Вобаста ба талаботи давру замон амал намуда, аз тарзу усули муосири корбарӣ истифода кунанд. Эҳсос намудан мумкин аст, ки дар гуфтору барномаҳои хеш роҳҳои наву замонавии ҷалби ҳарчи бештари таваҷҷӯҳи шунавандагонро меҷӯянд ва ба таври касбӣ корбаст менамоянд. Ҳар кадоми онҳо кӯшиш мекунанд, ки дар баланд бардоштани маърифату маънавиёт, васеъ намудани ҷаҳонбинии аҳли ҷомеа ва пурра нигоҳ доштани фазои иттилоотӣ саҳми арзанда гузоранд.
Тамоми ҳодисаву воқеоти сиёсиву иҷтимоӣ ва фарҳангиву варзишӣ, ки дар қаламрави вилояти Суғд рӯй медиҳанд, тавассути барномаҳои иттилоотии ин шабака бо забонҳои тоҷикиву русӣ сари вақт пешниҳоди шунавандагон карда мешаванд.
Кормандони шӯъбаи барномаҳои иттилоотӣ пайваста мекӯшанд, то ҳарчи зудтару бештар хабарҳои нав ва муҳимро дастрас ва пешниҳоди сомеон намоянд. Хабарҳои нав ҳамарӯза тавассути барномаҳои «Экспресс-хабар», «Ахбор», «Новости» ва барномаҳои «Ҳафта», «Панорама недели» ҳафтае як маротиба ба мавҷ бароварда мешаванд. Ба ҷузъ аз ин, иттилооти тозатарини маҳаллӣ, кишвар ва берун аз он дар сомонаи радио — www.tiroz.org бо забонҳои тоҷикӣ ва русӣ ҳамарӯза ҷой дода мешаванд.
Чун дирӯз имрӯз низ дар хонадони аксари сокинони шаҳри Хуҷанд ва чанд ноҳияи атрофи он садои радиои маҳбуби мардум “Тироз” танинандоз аст. Гуфторҳои радиои «Тироз» ҳамарӯза аз соати 6:00-и субҳ то соати 3:00-и субҳи дигар, яъне 21 соат аз мавҷи 103,7 FМ пахш мешаванд. Радиоро дар саросари вилоят наздик ба 1 миллион сокинони шаҳру навоҳӣ имконияти шунидан доранд. Барномаҳои радио асосан мустақиман ва ба тариқи сабт ба мавҷ бароварда мешаванд.
Чанд сол қабл ташкилоти байналхалқии Созмони амнияту ҳамкорӣ дар Аврупо байни сокинони вилоят дар мавзӯи «ВАО-и беҳтарин» пурсиши афкор гузаронд ва дар натиҷа Ширкати телевизион ва радио-рекламавии «Тироз» беҳтарин расонаи хабарӣ дониста шуд.
Кормандони шӯъбаи барномаҳои иттилоотӣ, шӯъбаи продюсерӣ ва шӯъбаи техникӣ пайваста бар он мекӯшанд, то барномаҳои ҷолибу талаби замонро пешкаши шунавандагон гардонанд.
Барномаву гуфторҳои радио вобаста ба мазмуну моҳияти он ба аудиторияи муайян равона карда шудаанд.
Масалан, чун солҳои қаблӣ имрӯз низ барномаи фароғатии «Навои дил», ки шунавандагону мухлисони зиёдеро соҳиб гардидааст ва аз субҳи барвақт оғозбахши гуфторҳои радио маҳсуб мешавад, фарогири сурудҳои классикӣ, панду андарзҳои ниёгон мебошад ва асосан барои калонсолон, шахсони фарҳангдӯсту адабпарвар таҳия карда мешавад.
Барномаҳои радио чун «Паёми субҳ», «Ҳозирҷавоб», «Радио микс», «Раззоқи олам», «Шанбе-Шоу», «Лучшие мысли человечства», «Люди и деньги», «Индомания», «Дискотека-80» ва ғайраҳо ҳамарӯза дар вақту соати муайяншуда пешниҳоди шунавандагон карда мешаванд.
Дар самти сабт, танзим ва ба мавҷ баровардани барномаҳои радио низ аз ҷониби роҳбарияти ширкат тамоми шароити мусоиди корӣ муҳайё гардидааст. Яъне, бо ҳадафи пешрафти фаъолияти радио техникаву таҷҳизоти наву замонавӣ пурра барои истифодабарӣ ба кормандони техникӣ пешкаш карда шудаанд.
Дӯстони арҷманд, чун дар оғоз гуфтем, ба ифтихори 15-солагии таъсисёбии радиои “Тироз” дар медиапортали “Тироз” – www.tiroz.org аз ҳаёту фаъолияти собиқ ва имрӯза кормандони радио силсиламаводи ҷолибу хонданӣ ва шавқовару хотирмон омода ва дар рӯзҳои сешанбе, панҷшанбе ва шанбеи ҳар ҳафта пешкаши Шумо менамоем. Ин ҷо маводи нахустинамонро доир ба таърихи таъсисёбии ҶДММ ШТРР “Тироз” ва дирӯзу имрӯзи он ба интиҳо мерасонем. Вале, ҳатман моро пайгирӣ намоед, зеро маводҳои бисёр ҷолибу хонданӣ Шуморо интизоранд.
Боқӣ дар зиндагӣ ва фаъолият ҳамеша сарбаланду муваффақ бошед!
Нет комментариев