Дастаи Медиапортали “Тироз” бохабар шуд, ки санаи 27-уми феврали соли равон Донишкадаи политехникии Донишгоҳи техникии Тоҷикистон (ДПДТТ) ба номи академик М.Осимӣ дар шаҳри Хуҷанд дар ҳамкорӣ бо Ширкати “Тсеll” бахшида ба 25-солагии Истиқлолияти Ҷумҳурии Тоҷикистон семинари илмӣ — амалии ҷумҳуриявиро дар мавзӯи “Таҳсилоти фосилавӣ” мегузаронад.
Дар рӯзу соати муайяншуда дастаи мо ба ҷойи баргузории семинари ҷумҳуриявӣ ҳозир шуд ва дар рафти он пурра иштирок намуда, шоҳиди бевоситаи баҳсу муҳокимарониҳои иштирокчиёнаш гардид.
Бояд гуфт, ки дар семинар ректорон ва устодони донишгоҳҳои Тоҷикистон иштирок намуданд. Ба кори семинар ректорон ва устодони донишгоҳҳои шаҳрҳои Душанбе, Қӯрғонтеппа ва Кӯлоб низ ба таври пахши онлайнӣ ҷалб гардиданд.
Тавре зикр намудем, семинари мазкур дар ҳамкорӣ ва дастгирии ҳамаҷонибаи Ширкати “Тсеll” доир гардид. Бахусус, дар самти пайваст намудани донишгоҳҳои минтақаҳои дигари Тоҷикистон тариқи пахши онлайн саҳми бузург гузошт. Маҳз бо ин роҳ устодони мактабҳои олии дигар вилоятҳо тавонистанд дар ҷараёни кори семинари ҷумҳуриявӣ фаъолона иштирок намуда, сари вақт фикру андеша ва саволҳои худро пешниҳод намоянд. Ҳамзамон, ҳангоми муҳокимаву баррасии масъалаҳо фаъол бошанд. Яъне, сари вақт пайваст кардани минтақаҳои дурдасти кишвар ба ҷараёни кори семинари мазкур комилан ва бо сифати баланд аз ҷониби Ширкати “Тсеll” сурат гирифт.
Ҳамин тавр, дар мавзӯи “Таҳсилоти фосилавӣ” ва ҷорӣ намудани он дар донишкадаву донишгоҳҳои Тоҷикистон директори ДПДТТ ба номи академик М.Осимӣ Дилафрӯз Сангинова, ноиби ректор оид ба илм ва робитаҳои хориҷӣ дар Донишгоҳи техникии Тоҷикистон ба номи академик М.Осимӣ И.Амонов, ректори Донишгоҳи давлатии Кӯлоб ба номи Абӯабдуллоҳ Рӯдакӣ Абдулло Ҳабибулло ва дигарон баромад карда, андешаҳои худро баён намуданд.
Чун шоҳиди баргузории семинар чанд маърӯзаи пешниҳодкардаи устодонро мехостем зикр намоем, ки фикр менамоем барои Шумо-хонандагони медиапортал низ мақбул мешавад. Масалан, сардори Маркази таҳсилоти фосилавӣ Р.Исомаддинова, мутахассиси барномасози Маркази таҳсилоти фосилавӣ Н.Муллоҷонова ва устодони марказ Х.Худойбердиев ва П.Солиев якҷоя дар мавзӯи “Сомонаи fosilavi.tj таҳсилоти фосилавӣ дар ДПДТТ” маърӯзае омода ва пешниҳоди ҷамъомадагон гардониданд, ки хеле хуш истиқбол карда шуд.
Ҳамзамон, устоди Донишгоҳи техникии Тоҷикистон ба номи академик М.Осимӣ А.Маҷидов дар мавзӯи “Вазифа ва татбиқи истифодаи барномаҳои мултимедиавӣ дар соҳаҳои гуногун”, ректори ДДХ ба номи академик Б.Ғафуров А.Мақсудов дар мавзӯи “Ташкил ва инкишофи системаи таҳсилоти фосилавӣ дар Донишгоҳи давлатии Хуҷанд ба номи академик Б.Ғафуров” баромад намуданд, ки маърӯзаҳояшон аз ҷониби иштирокдорони семинар сазовори баҳои баланд гардиданд.
Ҳамин тавр, дар семинари ҷумҳуриявӣ наздик 40 маърӯзаи илмӣ ва оммавӣ шунида шуда, роҳҳои ҷорӣ намудани таҳсилоти фосилавӣ дар таълиму тарбияи шогирдони донишкадаву донишгоҳҳои Тоҷикистон муайяну мушахас гардиданд.
Аз 40 мавзӯи иштирокчиёни баромадкардаи семинар, 14 маърӯза бо забони русӣ омода ва пешниҳод карда шуданд.
Хулоса, эҳсос карда шуд, ки ҳамаи иштирокдорону баромадкунандагон, ба семинари ҷумҳуриявӣ бо тайёрии хубу ҳамаҷониба омада буданд.
Ширкати “Тсеll” аз аввал то ба охири семинар тавонист, ки иштирокчиёнро бо алоқаи саривақтӣ ва баландсуръати интернетӣ, мустақиман пайваст шудан бо минтақаҳои дигари Тоҷикистон, пахши онлайнии кори семинари ҷумҳуриявӣ пурра ва ба дараҷаи аъло таъмин намояд. Инро мо низ хеле хуб эҳсос ва мушоҳида намудем.
Ин буд, ки шурӯъ аз қисми расмӣ то ба охири кори семинар ташкилкунандагон ва баромадкунандагону иштирокчиёни он барои таъмини саривақтии интернети баландсуръат ба Ширкати “Тсеll” арзи сипос намуданд. Инро мо-дастаи Медиапортали “Тироз” низ борҳо бо гӯши худ шунидем.
Алҳол мусоҳибаи мо бо чанд нафар аз иштирокдорони семинари илмӣ — амалии ҷумҳуриявӣ дар мавзӯи “Таҳсилоти фосилавӣ” пешкаши Шумо мегардад:
Ҳамин тавр, семинари илмӣ — амалии ҷумҳуриявӣ дар мавзӯи “Таҳсилоти фосилавӣ” бо ташаббуси Донишкадаи политехникии Донишгоҳи техникии Тоҷикистон (ДПДТТ) ба номи академик М.Осимӣ дар шаҳри Хуҷанд ва дар ҳамкорӣ бо Ширкати “Тсеll” бахшида ба 25-солагии Истиқлолияти Ҷумҳурии Тоҷикистон дар сатҳи хуби ташкилӣ ва хеле хотирмону манфиатбахш баргузор гардид.
Илҳомҷон Бобоев
Шодмон Ашӯров
Нет комментариев