Дар маркази вилоят шаҳри Хуҷанд тантанаҳои наврӯзӣ ва чорабиниҳои идона идома доранд.
Бо мусоидати Мақомоти иҷроияи ҳокимияти давлатии шаҳри Хуҷанд дар гузари «Қӯшҳавҳз»-и маҳаллаи ба номи Ҷ. Расулов Иди Наврӯзи хушпай бо шаҳомату усули хоси маҳаллӣ таҷлил гардид.
Ба хурсандии наврӯзии яке аз гузарҳои қадимаи шаҳр Раиси шаҳр Раҷаббой Аҳмадзода ва ҳайати меҳмонони бародаршаҳри Хуҷанд — шаҳри Могилев аз Ҷумҳурии Белорус бо роҳбарии муовини аввали раиси кумитаи иҷроияи шаҳр Александр Потемкин, шодишарик шуданд.
Сароғоз Раиси шаҳр меҳмононро бо ҳунарҳои халқӣ, суннат ва ойини наврӯзии мардуми тоҷик, ки аз ҷониби бошандагони маҳалла намоиш дода шуд, ошно намуд.
Ба меҳмонон ҳунарҳои сӯзанидӯзӣ, кандакорӣ, дӯзандагӣ, оростани хони наврӯзӣ, таронаҳои мардумӣ ва гулбазми наврӯзӣ писанд омад.
Баъдан Раиси шаҳри Хуҷанд иштирокдорони ид сокинони маҳалларо бо иди аҷдодиамон табрик намуда, меҳмонони белорусро хайрамақдам гуфт.
«Имрӯз сиёсати Пешвои миллат, Президенти Ҷумҳурии Тоҷикистон, Ҷаноби Олӣ, мӯҳтарам Эмомалӣ Раҳмон доири рушди соҳибкорӣ ва амалӣ гаштани сиёсати «Дарҳои боз» имкони вусъати роҳандозии ҳамкории шаҳри Хуҷандро бо кишварҳои дигар бештар намудааст. Баъди ба имзо расидани созишномаи ҳамкории байнидавлатии кишварҳои мо аз ҷониби сарони ҳарду давлат, робитаи дӯстонаи шаҳрҳои Хуҷанд ва Могилев ба сатҳу сифати нав баромад. Ҳоло марҳила ба марҳила ва ҳамасола ҳамкории иқтисодии мо вусъат гирифта, аз дурнамои ин ҳамкорӣ мо боз ҳам умедҳои хеле зиёд дорем» таъкид намуд Раиси шаҳр.
Александр Потемкин барои пазироии самимӣ ва даъвати онҳо барои иштирок дар Иди Наврӯз аз номи ҳайати гурӯҳ изҳори сипосмандӣ намуд.
Ба ҳозирон ҳамчунин барномаи ҷолиби адабию фарҳангӣ бо забонҳои тоҷикӣ–русӣ пешкаш гардид.
Манбаъ: http://www.khujand.tj/tg/arhiv/1564—lr
Нет комментариев