Гӯштқимакунаки барқӣ барои тез қима намудани гӯшти лахм, яъне осон намудани кори кадбонуҳо ҳангоми пухтупаз истифода бурда мешавад.
Оё медонед, ки гӯштқимакунакҳои барқӣ дар мобайни асри ХХ истеҳсол карда шуда, сол то сол сохти он ташаккул ёфта истодааст. Имрӯз гӯштқимакунакҳои барқии ширкатҳои Бош, Делонги, Кенвуд, Мулинекс, Панасоник, Тефал хеле машҳур буда, дар ҷаҳон васеъ истифода бурда мешаванд. Онҳо намуди хуши зоҳирӣ дошта, дар вақти коркунӣ овози паст мебароранд, пуриқтидоранд ва дорои сифати хуб ҳастанд. Гӯштқимакунаки барқии сифатноки ширкатҳои номбурдашуда иқтидори аз 1000 Вт болоро доранд. Чунин гӯштқимакунаки барқӣ метавонад дар 1 дақиқа то 1,5 кг гӯштро қима намояд.
Дар вақти интихоби гӯштқимакунаки барқӣ, Шумо, ба штрих-коди он, ки дар нишонааш дарҷ гардидааст, эътибор диҳед. Ҳарфҳои ширкат бояд бо пуррагӣ ва бехато навишта шуда бошанд. Чӣ қадаре, ки нархи гӯштқимакунаки барқӣ баланд бошад, он ҳамон қадар пуриқтидор аст. Шумо метавонед, маҳсулоти контрафакиро, ки имрӯз дар бозорҳои мо бисёранд, бо нархи арзон харидорӣ намоед, лек донед, ки онҳо бесифат буда, дар вақти корбарӣ овози баланди нофорам ва мӯҳлати ками истифодабарӣ доранд. Чӣ хеле, ки дар урфият мегӯянд: «Қиммат бе ҳиммат нест, арзон бе иллат».
Дар вақти харидорӣ ба маводи табақчаи гӯштқимакунак аҳамият диҳед. Он бояд на аз пластик, балки аз пӯлод тайёр карда шуда бошад. Қисмҳои дохилии гӯштқимакунак: шнек, корд, панҷара низ ҳатман бояд аз пӯлод сохта шуда бошанд. Пеш аз харидорӣ намудан, бояд ҳолати коршоямии корди аз пӯлоди босифат сохташударо санҷид.
Умедворем, баъд аз хондани маслиҳатҳои муфиди мо, Шумо, дар интихоби гӯштқимакунаки барқӣ хато нахоҳед кард.
Нет комментариев