Хирси малла дар минтақаҳои кўҳии Тоҷикистони Шимолӣ, Марказӣ, Бадахшон ва Помири Шарқӣ паҳн гардидааст.
Муҳити сукунати ин ҳайвон арчазор, ҷангалзорони дарахтони паҳнбарги дорои дарахтони сафедор, фарк, чормағз, олуча ва дараҳои кўҳии беҷангал ва баъди хоби зимистона дар қисмати болоии кўҳҳо маскан мегирад.
Дар солҳои охир муҳити зисти хирси малла дар ҳудуди Тоҷикистон беҳтар гардида, афзун гардидани саршумори он ба мушоҳида мерасад. Дар ҳудуди мамнуъгоҳи «Ромит» 20-25 фарди он ба қайд гирифта шудааст. Саршумори нисбатан ками хирси малла барои Бадахшон ва Помири Шарқӣ(50-60 сар) хос аст. Саршумори умумии хирси малла 700-800 сар баҳогузорӣ карда мешавад.
Дар синни 3 солагӣ болиғ мегардад. Охирҳои моҳи май (дар муддати 35-40 рўз) ҷуфт мешаванд. Давраи ҳомилагии он 7-7,5 моҳ идома меёбад. Модина дар моҳи январ 2 ва баъзан 1 бача мезояд. Аз растанӣ ва ҳайвоноти гуногун — ревоҷ, олуча, камол,себ, чормағз, тут, олу, ҳайвоноти бесутунмуҳра ва сутунмуҳрадор ва ҷасади онҳо ғизо мегирад.
Дар шароити боғи ҳайвонот нигоҳубини он имконпазир аст.
Шикори ғайриқонунӣ, ноҳинҷорӣ ва истифодаи ҷангалзорҳо ба сифати чарогоҳ, бенизом чаронидани чорво омилҳое мебошанд, ки ба саршумор ва муҳити сукунати хирси малла таъсири манфӣ мерасонад.
Назоратро аз болои шикори ғайриќонунии хирс пурзўр намуда, маҳали сукунати онро ҳифз намудан зарур аст.
Шодмон Ашӯров
Нет комментариев