Мақомоти марзбонии Қирғизистон мегӯянд, рӯзи 28 март дар марзи вилояти Бодканд бо вилояти Суғди Тоҷикистон як мошини боркашро бо ҳудуди якуним тонна қурут боздошт кардаанд.Соҷира Ҷаколоева, сухангӯи Хадамоти давлатии марзбонии Қирғизистон рӯзи 29 март дар сӯҳбат бо бахши тоҷикии Радиои Озодӣ гуфт, дар робита ба ин қазия як шаҳрванди Қирғизистон дастгир шудааст: “Марзбонҳо дар ҳудуди минтақаи марзии Эки-Тош як мошини “Hyundai Porter”-ро манъ карданд. Аз дохили он 1460 кило қурут ёфт шуд. Азбаски ин бор ҳуҷҷат надошт, ронандаро ҳамроҳ бо бори қочоқиаш боздошт карданд.”
Соҷира Ҷаколоева гуфт, алайҳи ин шаҳрванди қирғиз протокол тартиб дода шуда, ӯву бори қочоқиашро ба шӯъбаи роҳи оҳани Хадамоти гумруки Қирғизистон супурдаанд: “Акнун мақомоти гумрук бояд тафтиши қазияро идома диҳанд ва қарори худро бигиранд, ки оё алайҳи ин шаҳрванд бо иттиҳоми қочоқ парванда мекушоянд ваё ӯро танҳо бо ҷарима ҷавоб диҳанд.”
Мақомоти гумрук арзиши бори мусодирашударо 200 ҳазор сом, ё ҳудуди 2800 доллар баровард кардаанд. Қонунгузории ба сурати умум либералии Қирғизистон маъмулан барои қочоқи чунин миқдори бор ҷаримаро пешбинӣ мекунад.
Соҷира Ҷоколоева мегӯяд, ин нахустин мавриди пешгирӣ аз қочоқи чунин миқдори бузурги қурут дар марз бо Тоҷикистон аст. Дар гузашта, ба гуфтаи ӯ, дар ин марз бештар мавридҳои қочоқи маҳсулоти нафтӣ, бахусус бензину солярка ошкор мешуд: “Вале дар ду соли охир қочоқи маҳсулоти нафтӣ дар марз бо Тоҷикистон хеле коҳиш ёфтааст. Ҳоло бештар дар ин марз мавридҳои қочоқи нуриҳои минералӣ, аз ҷумла селитра ошкор мешавад.”
Тоҷикистон бо Қирғизистон ҳудуди 970 километр марзи мустақим дорад, ки то имрӯз тақрибан 519 километраш пурра таъин ва аломатгузорӣ шудааст.
Қирғизистон дар соли гузашта ба узвияти Иттиҳоди иқтисодии АвруоОсиё, як созмони минтақавии таҳти нуфузи Маскав пайваст. Узвият дар ин созмон ба Қирғизистон имкон медиҳад, ки бо кишварҳои дигари узви Иттиҳоди АвроОсиё – Русия, Беларус ва Қазоқистон бидуни пардохти боҷу хироҷи гумрукӣ додугирифти мол кунад.
Шабакаҳои қочоқбар аз узвияти Қирғизистон дар ин созмон барои бароварда сохтани ҳадафҳои худ сӯиистифода мекунанд. Дар натиҷа, ба гуфтаи мақомоти гумрук ва марзбонии Қирғизистон, ин кишвар ба як нуқтаи транзит барои қочоқи молу маҳсулот аз кишварҳои узви Иттиҳоди АвроОсиё ба кишварҳои дигари Осиёи Марказӣ, бахусус ба Тоҷикистону Узбакистон табдил ёфтааст.
Ҳамин тавр, бархе тоҷирон аз Тоҷикистону Узбакистон аз узвияти Қирғизистон дар Иттиҳоди АвроОсиё барои содироти бидуни боҷу хироҷи маҳсулоташон ба Қазоқистону Русия истифода мебаранд. Дар тӯли соли 2015 дар бораи дастикам 3 мавриди дар марз бо Русия дастгир шудани мошинҳои ангур гузориш шуда буд. Мақомоти гумрукии Русия мегуфтанд, ки ин ангур дар асл аз Тоҷикистон аст, вале соҳибонаш ба хотири напардохтани боҷи гумрукӣ онро дар ҳуҷҷатҳо ҳамчун фаровардаи Қирғизистон нишон додаанд.
Манбаъ: http://www.ozodi.tj/
Нет комментариев