Созмони байналмилалии ҳомии ҳуқуқи Amnesty International (AI) ё худ Афви Байналмилал соли 2015-ро рекордӣ аз рӯи шумори иҷрои ҳукми қатлҳо номид.
Дар гузориши рӯзи 6 апрел интишоршудаи созмон дар ин робита гуфта мешавад, соли гузашта дар саросари ҷаҳон дар маҷмӯъ беш аз 1,6 ҳазор ҳукми қатл ба иҷро расидааст, ки нисбат ба соли пешин 573 ё худ 50% ҳукм зиёдтар буда, аз тайи 25 соли ахир зиёдтарин мебошад.
Ҳукми қатл бештар дар Эрон (977 ҳукм), Покистон (320 ҳукм) ва Арабистони Саудӣ (158 ҳукм) мавриди амал қарор гирифта, дар Миср ва Сомалӣ низ шумори иҷрои ҳукми қатлҳо афзудааст.
Гуфта мешавад, дар ин маълумот нишондиҳандаҳои Чин ба қайд гирифта нашудааст, ки дар он боз ҳазорон нафар эъдом шудаанд, вале дар ин кишвар маълумот дар бораи шумори иҷрои ҳукми қатлҳо сирри давлатӣ шуморида мешавад.
Зикр мегардад, ки соли 2015 боз 4 кишвар — Фиҷи, Мадагаскар, Конго ва Суринам низ аз истифодаи ҳукми қатл даст кашида, акнун аксари кишварҳои ҷаҳон — 120 давлат пурра аз ин амал худдорӣ мекунанд.
Ҳамчунин гуфта мешавад, дар ИМА 28 ҳукми қатл ба иҷро расидааст, ки камтарин аз соли 1991 мебошад ва шумори ҳукмҳои қатли содиршуда 52 ададро ташкил дода, камтарин аз соли 1977 аст. «Иёлат (штат)-и Пенсилвания ба ҳукми қатл моратория ҷорӣ намуда, акнун дар маҷмӯъ дар 18 иёлати ИМА ҳукми қатл комилан манъ шуд», — қайд мешавад дар гузориши созмон.
Дар гузориши созмон зикр мегардад, ки Беларус ягонаи кишвари Аврупост, ки дар он ҳукми қатл боқӣ монда, ҳарчанд соли 2015 дар ин кишвар нисбати касе ҳукми қатл мавриди амал қарор нагирифта бошад ҳам, ҳадди ақал ду ҳукми қатл содир шудааст.
«Дар Қазоқистон, Русия ва Тоҷикистон мораторияи расмӣ ба истифодаи ҳукми қатл мавриди амал қарор дорад», — гуфта мешавад дар гузориш.
Манбаъ: http://www.news.tj/tj/news/
Нет комментариев