Кӣ ин маҳсулоти полезиро надидаву нахӯрдааст? Оре, ҳандалак ҳар сол пеш аз харбузаву тарбуз дӯкону бозорҳои моро зиннат медиҳанд. Аҷаб меваи хуштаъму лазизу хушбӯест.
Ҳандалак аз ҷинси харбузабуда, вале нисбатан хеле хурд ва пешпазак аст. Ҳандалаки пухтарасида рангҳои гуногун дорад: зард, кабудранг, сафедча ва ғайра. Ҳандалак асосан гирди шалғамшакл ва рахдор ҳам ҳаст вале гоҳо харбузашакл ҳам ҳаст. Ҳандалаки хушзот бисёр тамъи ширин дошта, ниҳоят хушбӯй мешавад. Форсҳо онро дастанбӯя ҳам мегӯянд.
Дар мавсими ҳандалакпазӣ бисёр вақт мардуми мо дар хона ҳандалакро якчанд рӯз ба хотири хушбӯй гардонидани хона нигоҳ медоранд. Ин меваи биҳиштӣ баробари лазизу хушхӯру хушбӯй будан боз хусусиятҳои шифобахшӣ ҳам дорад:
Аввалан он ки буйи ҳандалак, яъне буйидани он ба майна қувват мебахшад ва хастагиро бартарф мегардонад. Ба қавле гиреҳи майнаро мекушояд. Дигар он ки ҳандалаки пухтарасида хусусияти пешобронӣ дошта, баданро тоза нигоҳ медорад.
Шахсе, ки дар гурда ё пешобдон санг дошта бошад, агар ҳандалаки хомро чанд рӯз бихурад, он сангҳоро майда карда мерезонад.
Хусусияти дигари ҳандалакро кадбону-пазандаҳо хубтар медонанд. Онҳо ҳангоми пӯхтани гӯшти сахт ё дерпаз ба дег порае аз ҳандалак ҳамроҳ мекунанд, ки гӯштро мулоим мегардонад, Яъне гӯшт хеле мулоиму хушхӯр мешавад.
Иқлими кишвари мо , махсусан водии Вахш барои парваришу нашъунамои ҳандалак хеле мувофиқ аст.
Шодмон Ашӯров
Нет комментариев